- 8 నెలల కిందే ఉపాధి కోసం అర్కాన్సాస్కు వెళ్లిన గోపీకృష్ణ
- దుండగుడి కాల్పులకు మరో ఇద్దరు అమెరికన్లు బలి
- పట్టుకునేందుకు యత్నించిన పోలీసులకు బుల్లెట్ గాయాలు
- ఎదురుకాల్పులు జరిపి షూటర్ను పట్టుకున్న పోలీసులు
వాషింగ్టన్: అమెరికాలో ఓ దుండగుడు జరిపిన కాల్పులకు తెలుగు యువకుడు బలయ్యాడు. మృతుడు ఆంధ్రప్రదేశ్లోని బాపట్ల జిల్లాకు చెందిన దాసరి గోపీకృష్ణగా అధికారులు గుర్తించారు. శనివారం అర్కాన్సాస్లో జరిగిన ఈ ఘటనకు సంబంధించిన సీసీటీవీ ఫుటేజీ దృశ్యాలు వైరల్ అయ్యాయి.
రైఫిల్తో వచ్చి ఫైరింగ్..
బాపట్ల జిల్లా కర్లపాలెం మండలం యాజలికి చెందిన గోపీకృష్ణ(32) ఎనిమిది నెలల కింద ఉపాధికోసం అమెరికాకు వెళ్లాడు. అర్కాన్సాస్రాష్ట్రం ఫోర్డైస్ అనే టౌన్లోని ఓ సూపర్ మార్కెట్లో పనిచేస్తున్నాడు. శనివారం ఎప్పటిలాగా డ్యూటీకి వచ్చి బిల్లింగ్ కౌంటర్లో ఉన్న గోపీకృష్ణపై.. ఓ దుండగుడు నేరుగా వచ్చి రైఫిల్తో కాల్పులు జరిపాడు. ఆపై సూపర్ మార్కెట్లోని ఓ వస్తువు పట్టుకుని బయటపడ్డాడు. బుల్లెట్ గాయాలతో కుప్పకూలిన గోపీకృష్ణను సిబ్బంది ఆస్పత్రికి తరలించగా అక్కడ ట్రీట్మెంట్ పొందుతూ అతను ఆదివారం ప్రాణాలు కోల్పోయాడు. గోపీకృష్ణకు భార్య, కొడుకు ఉన్నారు.
ఇంకో ఇద్దరు అమెరికన్లను చంపేసిండు
దుండగుడు వెళ్తూ పార్కింగ్ ప్లేస్లో ఉన్నవాళ్లపైనా ఫైరింగ్ చేశాడు. దీంతో ఇద్దరు అమెరికన్లు అక్కడికక్కడే ప్రాణాలు కోల్పోయారు. అప్పటికే సమాచారం అందుకున్న పోలీసులు స్పాట్కు చేరుకోగా వారిపైనా నిందితుడు కాల్పులు జరిపాడు. దీంతో పోలీసులు ఎదురుకాల్పులు జరిపి నిందితుడిని పట్టుకున్నారు. పోలీసుల ఎదురుకాల్పుల్లో నిందితుడికీ బులెట్ తగిలిందని, అదుపులోకి తీసుకుని ఆస్పత్రికి తరలించామని అధికారులు తెలిపారు.
దుండగుడి ఫైరింగ్లో పార్కింగ్ ప్లేస్లో ఉన్న ఎనిమిది మందితోపాటు ఇద్దరు పోలీసులకూ బులెట్ గాయాలయ్యాయని చెప్పారు. వాళ్లంతా ఆస్పత్రిలో ట్రీట్మెంట్ పొందుతున్నారని, ప్రాణాపాయంలేదని అధికారులు వెల్లడించారు.
