ఫోల్డబుల్, మల్టీ ఫోల్డబుల్ ఫోన్లపై పేటెంట్కు దరఖాస్తు
మడతబెట్టే ఫోన్లు ఇప్పుడో ట్రెండ్. ఆమధ్య శాంసంగ్ గెలాక్సీ ఫోల్డ్ పేరిట మడతబెట్టే ఫోన్లను తీసుకొచ్చింది. అంతకన్నా ముందే.. హువావీ మేట్ ఎక్స్ 11ను పరిచయం చేసింది. గూగుల్, సోనీలూ ఆ టెక్నాలజీపై పనిచేస్తున్నాయి. ఇప్పుడు తాజాగా యాపిల్ కూడా ఫోల్డింగ్ ఫోన్లపై దృష్టి పెట్టినట్టుంది. అవసరమైతే ట్యాబ్లా లేకపోతే ఫోన్లా వాడే ఫోల్డింగ్ ఫోన్, మల్టీ ఫోల్డబుల్ ఫోన్లను తయారు చేసింది. దానిపై పేటెంట్కు దరఖాస్తు చేసుకుంది. 37 బొమ్మలతో తన టెక్నాలజీని వివరిస్తూ పేటెంట్కు అప్లై చేసింది. తాము తయారు చేస్తున్న ఫోల్డింగ్ ఫోన్లు ఎలా పనిచేస్తాయో వివరించింది.
180 డిగ్రీలు, 90 డిగ్రీల కోణంలో ఫోన్ను రెండువైపులా మలచుకోవచ్చట. మల్టీఫోల్డింగ్ ఫోన్లను మలిచినప్పుడు అవి పాడుకాకుండా ఉండేలా సిరామిక్ లేయర్ ఉంటుందని యాపిల్ తన పేటెంట్ వెబ్సైట్ పేటెంట్లీలో పేర్కొంది. ఈ లేయరే ఫోన్ నిర్మాణం చెడిపోకుండా చూస్తుందని చెప్పింది. కేవలం ఐఫోన్ల వరకే పరిమితం కాకుండా ఐప్యాడ్ మ్యాక్బుక్, యాపిల్ వాచ్లనూ ఫోల్డింగ్ టెక్నాలజీతో తయారు చేస్తున్నట్టు యాపిల్ పేర్కొంది. వాటికి సంబంధించిన డిజైన్లను వెబ్సైట్లో పెట్టింది. గత ఏడాది అక్టోబర్ 12నే ‘ఫ్లెగ్జిబుల్ డిస్ఫ్లే డివైజ్’ పేరిట యాపిల్ ఓ పేటెంట్కు దరఖాస్తు చేసుకుంది. తాజాగా ఇంకో పేటెంట్కు అప్లై చేసింది.
ఐట్యూన్స్ అవుట్!
యాపిల్ ఐఫోన్ అనగానే ముందు గుర్తొచ్చేది ఐట్యూన్స్. మ్యూజిక్లో అది ఒక రెవల్యూషన్నే తెచ్చింది. 2001 జనవరి 9న నాటి కంపెనీ సీఈవో స్టీవ్ జాబ్స్ దానిని ప్రపంచానికి పరిచయం చేశారు. ఇప్పుడు 18 ఏళ్ల తర్వాత ఆ ఐట్యూన్స్కు బైబై చెప్పబోతోంది సంస్థ. సోమవారం జరిగే డెవలపర్ కాన్ఫరెన్స్లో ఐట్యూన్స్ను తీసేస్తున్నట్టు అధికారికంగా ప్రకటించబోతోంది. దాని స్థానంలో యాపిల్ మ్యూజిక్, యాపిల్ టీవీ, పాడ్కాస్ట్స్ను తీసుకొస్తుందంటున్నారు. ఐట్యూన్స్ను ఎందుకు తీసేస్తున్నారన్నది ప్రస్తుతానికైతే సస్పెన్సే.
