యాపిల్ కంపెనీ ఏం చేసినా స్పెషలే. దాని లోగోనే ఒక పెద్ద స్పెషల్. చిలక కొరికిన పండులా ఉంటుంది ‘యాపిల్’. ఇప్పుడు ఆ కంపెనీ క్యాంపస్ మరింత స్పెషల్. ఎందుకంటే అది ‘నేల’పైన ఉండదు కాబట్టి. సాసర్లో టీ కప్పు ఒదిగినట్టు.. స్టీల్ సాసర్ల మీద నిలబడతది ఆ క్యాంపస్. ప్రాణాంతక భూకంపాలకు పెట్టింది పేరు కాలిఫోర్నియా. అలాంటి భూకంపాలకూ ఎదురు తిరుగుతది ఆ క్యాంపస్. ‘స్పేస్షిప్’ షేప్లా దాన్ని కట్టడం మరింత స్పెషల్. బేస్ ఐసోలేషన్ టెక్నాలజీ అనే ఇంజనీరింగ్ టెక్నిక్తో దీన్ని కట్టారు. అందులో భాగంగా 692 ఉక్కు సాసర్లపై పటిష్టంగా నిలబెట్టారు దాన్ని. ఆ సాసర్లు భూమిలోపల రెండంతస్తుల కింద ఏర్పాటు చేస్తారు. పెద్ద పెద్ద భూకంపాలు వచ్చినా ఆ సాసర్లపై ఉన్న ఈ బిల్డింగ్ అటూ ఇటూ ఊగుతుందే తప్ప కూలిపోదు. అంతర్జాతీయ పత్రికకు ఇచ్చిన ఇంటర్వ్యూలో కంపెనీ చీఫ్ డిఐన్ ఆఫీసర్ జానీ ఐవ్ ఆ బిల్డింగ్ విశేషాలు వెల్లడించారు.
₹3.46 లక్షల కోట్లు
యాపిల్ పార్క్ నిర్మాణం 2018లో పూర్తయింది. దాదాపు ₹3.46 లక్షల కోట్లు (500 కోట్ల డాలర్లు) ఖర్చు చేశారు. 28 లక్షల చదరపుటడుగుల విస్తీర్ణంలో కట్టిన క్యాంపస్లో 12 వేల మంది ఉద్యోగులు పనిచేయొచ్చు. క్యాంపస్ పైకప్పుపై 8.05 లక్షల చదరపుటడుగుల విస్తీర్ణంలో సోలార్ పానెళ్లు ఏర్పాటు చేశారు. వేడిగాలి బయటకు పోయి స్వచ్ఛమైన గాలి లోపలకు వచ్చేలా ‘సోఫిట్ (ఆర్క్ లాంటి నిర్మాణం)’లు ఏర్పాటు చేశారు. దీంతో దాన్ని ‘బ్రీతింగ్ బిల్డింగ్’ అని కూడా పిలుస్తున్నారు. స్టీవ్ జాబ్స్కు కృత్రిమమైన ఎయిర్ కండిషనింగ్ వ్యవస్థలంటే నచ్చవట. అందుకే ప్రకృతి నుంచే స్వచ్ఛమైన గాలిని తీసుకునేలా ఈ ఏర్పాట్లు చేశారని చెబుతున్నారు. అంతేగాకుండా యాపిల్ పార్క్లో వెయ్యి సీట్ల స్టీవ్ జాబ్స్ థియేటర్నూ కట్టారు. అక్కడే ప్రస్తుత సీఈవో టిమ్ కుక్ కొత్త ప్రొడక్ట్లకు సంబంధించిన వివరాలు, లాంచింగ్లు చేస్తారు. యాపిల్ ప్రొడక్ట్స్ నేరుగా కొనుక్కునేందుకు యాపిల్ రిటైల్ స్టోర్నూ అందులోనే పెట్టారు. పబ్లిక్ కేఫేలూ అందుబాటులో ఉంచారు. ఇంత కట్టినా క్యాంపస్ పచ్చగా కళకళలాడేలా లోపల మొత్తం చెట్లు, మొక్కలు నాటించి పర్యావరణంపైనా ప్రేమను చాటారు. మొత్తం 9 వేల చెట్లు నాటారు. గార్డెన్లు కట్టించారు. దీంతో ఓ పెద్ద పార్క్లో ఉన్న అనుభూతి కలుగుతుందట అక్కడ పనిచేసేటోళ్లకు.
మరిన్ని ప్రత్యేకతలు
కాలిఫోర్నియాలోని కుపర్టినోలో నాలుగంతస్తుల్లో ఈ క్యాంపస్ను కట్టారు. వృత్తాకార బిల్డింగ్ నుంచి మంచి వ్యూ ఉండేలా మొత్తం గ్లాస్ విండోలు అమర్చారు. దీంతో దీన్ని ‘మాసివ్ డోనట్ గ్లాస్’ అని ముద్దుగా పిలుస్తున్నారు. అంతేకాదు, ఫిట్గా ఉండేందుకు జాగింగ్, సైక్లింగ్ కోసం 3.2 కిలోమీటర్ల ట్రాక్నూ కట్టారు. ఎప్పుడూ వెయ్యి బైకులు ఉద్యోగులకు అందుబాటులో పెడతారు. జిమ్ కూడా ఉంది. రీసెర్చ్ కోసం 3 లక్షల చదరపుటడుగుల స్థలాన్ని కేటాయించారు. అండర్గ్రౌండ్లో పార్కింగ్ సౌకర్యం కల్పించారు. ఇంత పెద్ద బిల్డింగ్కు కరెంట్ సౌకర్యం కూడా అంతే ఉండాలి కదా. ప్రధానంగా నేచురల్ గ్యాస్ (సహజంగా లభించే వాయువులు)తో కరెంట్ అవసరాలు తీర్చుకుంటారు. దానికి అదనంగా సోలార్ పానెళ్లు పెట్టారు. ఒకవేళ ఎమర్జెన్సీ ఎదురైతే స్థానికంగా ఉన్న కరెంట్ గ్రిడ్ల నుంచి కరెంట్ తీసుకుంటారు. ఏసీలు ఎక్కువగా వాడకుండా ఏడాదిలో 70 శాతం మేర ప్రకృతి వెంటిలేషన్నే వాడుకునేలా డిజైన్ చేశారు. క్యాంపస్లోనే రీసైక్లింగ్ యూనిట్లు ఏర్పాటు చేశారు. తక్కువ కరెంట్ తీసుకునే ఎల్ఈడీ లైట్లను పెట్టారు.
స్టీవ్ జాబ్స్ ఆలోచనే
దీన్నే యాపిల్ పార్క్ అని పిలుస్తున్నారు. నిజానికి ఈ ఆలోచన ఇప్పటిది కాదు. అప్పుడెప్పుడో కంపెనీ కో ఫౌండర్ (కంపెనీ పెట్టిన వారిలో ఒకరు) స్టీవ్ జాబ్స్ ఆలోచన ఇది. జపాన్లో ఎక్కువగా బేస్ ఐసోలేషన్ టెక్నాలజీతోనే బిల్డింగులు కడుతుంటారు. దాని వల్ల పెద్దగా ఆస్తి, ప్రాణ నష్టం జరగదు. దీంతో ఆ ఆలోచనే స్టీవ్ జాబ్స్ మైండ్లో మెదిలిందట. చాలా సార్లు ఈ టెక్నాలజీపై ఐవ్తో ఆయన మాట్లాడారట. 2011లో ఆయన చనిపోవడానికి కొద్ది నెలల ముందే బిల్డింగ్ రూపురేఖలను తయారు చేశారు. వృత్తాకారంలో ఉండడంతో దానికి ముద్దుగా ‘స్పేస్షిప్’ అన్న పేరు
పడిపోయింది.
