
బషీర్బాగ్, వెలుగు: హైదరాబాద్ కోఠిలోని మహిళా యూనివర్సిటీకి రాష్ట్ర ప్రభుత్వం వీరనారి చాకలి ఐలమ్మ పేరు పెట్టిన నేపథ్యంలో ఆ ధీర వనిత భారీ చిత్రపటాన్ని వర్సిటీలోని దర్బార్హాల్ లో బుధవారం ఆవిష్కరిస్తున్నట్లు రెవల్యూషనరీ ఉమెన్ హెల్త్ ఆర్గనైజేషన్ (ఆర్ బ్ల్యూహెచ్ వో) అధ్యక్షుడు పి.హరికాంత్ తెలిపారు.
ఉపాధ్యక్షుడు కె.చరణ్, కార్యదర్శి డాక్టర్ సౌజన్యతో కలిసి మంగళవారం బషీర్ బాగ్ ప్రెస్ క్లబ్ లో పోస్టర్ ఆవిష్కరించి మాట్లాడారు. వర్సిటీ వీసీ సూర్య ధనుంజయ, సినీ నిర్మాత, దర్శకుడు బి.నర్సింగరావు, గేయ రచయిత సుద్దాల అశోక్ తేజ ముఖ్య అతిథులుగా హాజరవుతున్నట్లు చెప్పారు. యూనివర్సిటికి ఐలమ్మ పేరు పెట్టినందుకు ముఖ్యమంత్రి రేవంత్ రెడ్డికి కృతజ్ఞతలు తెలిపారు.