శ్రీనగర్: జవాన్లతో వెళ్తోన్న ఆర్మీ ట్రక్ అదుపు తప్పి లోయలో పడింది. ఈ ఘటనలో ఇద్దరు జవాన్లు మృతి చెందగా.. మరో ఐదుగురు సైనికులు తీవ్రంగా గాయపడ్డారు. జమ్మూ కాశ్మీర్లోని బందిపోరా జిల్లాలో శనివారం (జనవరి 4) ఈ విషాద ఘటన చోటు చేసుకుంది. సమాచారం అందుకున్న అధికారులు ఘటన స్థలానికి చేరుకుని సహయక చర్యలు చేపట్టారు. గాయపడ్డ జవాన్లను హెలికాప్టర్లో ఆసుపత్రికి తరలించారు.
ఘటన స్థలంలో రెస్య్కూ ఆపరేషన్ కొనసాగుతోన్నట్లు అధికారులు తెలిపారు. ఈ ఘటనలో ఇద్దరు సైనికులు మృతి చెందినట్లు అధికారులు ధృవీకరించారు.
రోజువారీ పెట్రోలింగ్లో భాగంగా జవాన్లు వెళ్తుండగా.. బందిపోరా జిల్లాలోని సదర్ కూట్ పాయెన్ ప్రాంతం సమీపంలో మూల మలుపు వద్ద జవాన్లు ప్రయాణిస్తోన్న వాహనం ప్రమాదవశాత్తూ అదుపు తప్పి లోయలో పడిపోయిందని తెలిపారు అధికారులు.
ట్రక్ డ్రైవర్ వాహనంపై నియంత్రణ కోల్పోవడంతోనే ఈ ప్రమాదం జరిగిందని వెల్లడించారు. ఈ ఘటనకు సంబంధించిన పూర్తి వివరాలు తెలియాల్సి ఉంది. 2024 డిసెంబర్ 24వ తేదీన కూడా జమ్మూలోని పూంచ్ జిల్లాలో జవాన్లు ప్రయాణిస్తోన్న ఆర్మీ వాహనం 350 అడుగుల లోతు లోయలో పడిపోయిన విషయం తెలిసిందే. ఈ ఘటనలో ఐదుగురు సైనికులు మృతి చెందగా.. మరో ఐదుగురు గాయపడ్డారు.
