పంజాగుట్ట, వెలుగు: కండరాల క్షీణతతో బాధపడుతున్న తమను ప్రభుత్వం ఆదుకోవాలని మస్క్యులర్డిస్ట్ర్రోఫీ బాధితులు విజ్ఞప్తి చేశారు. మస్య్కులర్ డిస్ట్రోఫీ అవేర్నెస్ మాసోత్సవం సందర్భంగా ‘మా ఘోష’ పేరుతో సోమవారం హైదరాబాద్ లోని ప్రెస్క్లబ్లో సమావేశం నిర్వహించారు. దీనికి వందలాది మంది బాధితులు హాజరై తమ గోడు వెళ్లబోసుకున్నారు.
ఈ సందర్భంగా తెలంగాణ మస్క్యులర్ డిస్ట్రోఫీ అసోసియేషన్ అధ్యక్షుడు ఎం.వెంకటరెడ్డి మాట్లాడుతూ.. ‘‘మేం నడవలేం.. చేతులు కూడా ఎత్తే పరిస్థితి ఉండదు. మమ్మల్ని చిన్న పిల్లాడిలా నిత్యం ఒకరు సాకాలి. ప్రభుత్వం మా వ్యథను గుర్తించి కేర్టేకర్ సదుపాయం కల్పించాలి. లేదంటే దానికి అనుగుణంగా అలవెన్స్ ఇవ్వాలి” అని కోరారు. ఏపీలో ఇప్పటికే కేర్ టేకర్అలవెన్స్ ఇస్తున్నారని చెప్పారు. ఈ వ్యాధితో బాధపడుతున్నవారు రాష్ట్ర వ్యాప్తంగా 3,500 మంది ఉన్నారని తెలిపారు. గత ప్రభుత్వం తమను పట్టించుకోలేదని, కాంగ్రెస్ ప్రభుత్వమైనా ఆదుకోవాలని విజ్ఞప్తి చేశారు. కాగా, సమావేశం అనంతరం వీల్చైర్లతో ఖైరతాబాద్ చౌరస్తా వరకు ర్యాలీ నిర్వహించారు.
20 వేల పెన్షన్ ఇవ్వాలి..
కాంగ్రెస్ప్రభుత్వం మా సమస్యలపై దృష్టిపెట్టాలి. పుట్టిన పిల్లలను తల్లి కొన్నేండ్లే మోస్తుంది. కానీ మా తల్లులు మమ్మల్ని జీవితాంతం మోస్తున్నారు. తీవ్ర వైకల్యం కలిగిన మాకు రూ.20 వేలు పెన్షన్ఇవ్వాలి.
- వెంకటరెడ్డి, ప్రెసిడెంట్
మా పరిస్థితి ఎవరికీ రావొద్దు..
ఇంకొకరి సాయం లేకుండా మేం ఏమీ చేయలేం. మా పరిస్థితి మరెవరికీ రాకూడదు. సీఎం రేవంత్ రెడ్డి మాకు సాయం చేయాలి. కె.బాలకృష్ణ , నల్గొండ జిల్లా
30 ఏండ్లుగా బాధపడుతున్న..
9 ఏండ్ల వయసులో ఈ వ్యాధికి గురయ్యా. నడవలేక దాదాపు 30 ఏండ్లుగా బాధపడుతున్న. ప్రభుత్వం మమ్మల్ని ఆదుకోవాలి. రవికుమార్, ఇస్నాపూర్
ప్రభుత్వం ఆదుకోవాలి..
చిన్నప్పటి నుంచి కండరాల క్షీణత వ్యాధితో బాధపడుతున్నాను. మాది పేద కుటుంబం. ప్రభుత్వం దయతో మమ్మల్ని ఆదుకోవాలి. సైబాద్ అలీ, చేర్యాల
