భద్రాచలం, వెలుగు: రాష్ట్రపతి భద్రాచలం పర్యటనకు శరవేగంగా ఏర్పాట్లు జరుగుతున్నాయి. శ్రీసీతారామచంద్రస్వామి దర్శనం కోసం వస్తున్న రాష్ట్రపతి కేంద్ర టూరిజం శాఖ ఆధ్వర్యంలో చేపట్టే రూ.41.38 కోట్ల పనులకు భూమి పూజ చేయనున్నారు. ఐటీసీ గెస్ట్ హౌస్లో దిగి కొద్ది సేపు సేద తీరాక రాముడి దర్శనానికి వస్తారు.
దీంతో ఆమె ప్రయాణించే మార్గంలో ఈ నెల 28 ఉదయం 8 గంటల నుంచి మధ్యాహ్నం 2 గంటల వరకు ఆంక్షలు పెట్టారు. గోదావరి వంతెనపై వాహనాల రాకపోకలను నియంత్రిస్తారు. విజయవాడ–-జగదల్పూర్ హైవే, భద్రాచలం–చండ్రుపట్ల స్టేట్ హైవేలను రిపేరు చేస్తున్నారు. హైదరాబాద్ నుంచి హెలికాప్టర్ ద్వారా రాష్ట్రపతి వస్తారు. టుబాకో బోర్డు ఆవరణలో హెలీప్యాడ్ ఏర్పాటు చేశారు. సోమవారం ట్రయల్ ల్యాండింగ్ నిర్వహించారు.
కరోనా టెస్టులు..
కరోనా నిబంధనలు కఠినతరం చేశారు. స్టాఫ్కు సోమవారం ఐటీసీ, వీరభద్ర ఫంక్షన్హాల్లో కరోనా టెస్టులు చేశారు. దేవస్థానం ఈవో శివాజీతో పాటు స్థానాచార్యులు స్థలసాయి, ప్రధానార్చకులు అమరవాది విజయరాఘవన్, సీతారామానుజం, వేదపండితులు మురళీకృష్ణమాచార్యులు, ఉప ప్రధానార్చకులు అమరవాది మురళీకృష్ణమాచార్యులు, ఈఈ రవీందర్, సీసీ అనిల్కుమార్ లతో పాటు ఆలయంలో పని చేసే ఉద్యోగులుందరికీ టెస్టులు చేశారు. వీరభద్ర పంక్షన్ హాలు వద్ద 145 మంది గిరిజన పూజారులు రాష్ట్రపతితో భేటీ కానున్నారు. రాష్ట్రపతిని కలిసే పటేళ్లు, పూజారులు, యాపారీలకు పరీక్షలు చేయనున్నారు. వారిని ఉదయం 8 గంటలకే ఫంక్షన్ హాలుకు తరలించాలని వనవాసీ కల్యాణీ ఆశ్రమం నిర్వాహకులను ఐటీడీఏ ఆఫీసర్లు ఆదేశించారు. షాపులను మూసివేయించడంతో పాటు 144 సెక్షన్ విధించారు. నేషనల్ మీడియాకు మాత్రమే అనుమతి ఉందని, స్థానిక మీడియాకు పర్మిషన్ లేదని కలెక్టర్ తెలిపారు.
విధులు పకడ్బందీగా నిర్వహించాలి..
రాష్ట్రపతి ద్రౌపది ముర్ము పర్యటనలో భాగంగా విధులు కేటాయించిన ఆఫీసర్లు 27న ఉదయం 11 గంటలకు రిపోర్ట్ చేయాలని కలెక్టర్ తెలిపారు. సోమవారం భద్రాచలం ఆర్డీవో ఆఫీసులో సమీక్ష సమావేశం నిర్వహించారు. ఈ సందర్భంగా ఆయన మాట్లాడుతూ మంగళవారం ట్రయల్ రన్ నిర్వహించడం జరుగుతుందని చెప్పారు. గుర్తింపు కార్డులు జారీ చేస్తామని, అధికారులు వారికి కేటాయించిన ప్రాంతాల్లో డ్యూటీకి సిద్ధంగా ఉండాలని చెప్పారు.
దేవాలయంలో షామియానాలు, కార్పెట్లను వేయాలని ఆదేశించారు. దేవాలయంలో గ్రీన్ రూమ్ సిద్ధంగా ఉంచాలని సూచించారు. స్వామి వారి ప్రత్యేక పూజల అనంతరం వీరభద్ర ఫంక్షన్ హాల్ కు రాష్ట్రపతి చేరుకుంటారని, కొమ్ముకోయ నృత్యంతో రాష్ట్రపతికి స్వాగతం పలుకుతారన్నారు. అనంతరం వర్చువల్ గా మహబూబాబాద్, ఆసిఫాబాద్ జిల్లాల్లో నిర్మించిన ఏకలవ్య మోడల్ రెసిడెన్షియల్ స్కూల్స్ను ప్రారంభిస్తారని చెప్పారు. అడిషనల్ కలెక్టర్ వెంకటేశ్వర్లు, ఏఎస్పీ రోహిత్ రాజ్, వివిధ శాఖల జిల్లా అధికారులు పాల్గొన్నారు.
అనంతరం బూర్గంపాడు, సారపాక ఐటీసీ బీపీఎల్ స్కూల్లో ఏర్పాటు చేసిన హెలీపాడ్ పనులను కలెక్టర్, ఎస్పీ డా వినీత్ పరిశీలించారు. వాయుసేన సిబ్బంది హెలికాప్టర్ ట్రయల్ నిర్వహించారని, ట్రయల్ రన్ అనంతరం చేసిన సలహాలు, సూచనల ప్రకారం మంగళవారం వరకు పనులు కంప్లీట్ చేయాలని సూచించారు. అలాగే దేవాలయం, వీరభద్ర ఫంక్షన్ హాలులో ఏర్పాట్లను
పరిశీలించారు.
