కొత్తగూడెం రింగ్​ రోడ్డు స్పీడప్ .. తాజాగా టెండర్లను పిలిచిన ఎన్​హెచ్​

• పట్టణం చుట్టూ రూ.400 కోట్లతో రింగ్ ​రోడ్డు
• డీపీఆర్ రూపొందించేందుకు రూ.కోటి శాంక్షన్​
• కొత్తగూడెం, పాల్వంచలో బైపాస్ ​రోడ్ల నిర్మాణాలకు ప్రపోజల్స్..​

భద్రాద్రికొత్తగూడెం, వెలుగు : జిల్లా కేంద్రమైన కొత్తగూడెం, పాల్వంచ పట్టణాలను కలుపుతూ చేపట్టనున్న రింగ్ ​రోడ్డుకు ఏర్పాట్లు స్పీడప్​ అయ్యాయి. డీపీఆర్ ​రూపొందించేందుకు తాజాగా రూ.కోటి శాంక్షన్​ చేశారు. ఈ మేరకు టెండర్లను పిలిచారు. మరోవైపు కొత్తగూడెం, పాల్వంచ పట్టణాల్లో ట్రాఫిక్​ సమస్యను నియంత్రించేందుకు బైపాస్​ రోడ్లను నిర్మించేందుకు ఆర్​అండ్​ బీ ఆఫీసర్లు ప్రపోజల్స్​ తయారు చేస్తున్నారు. 

రూ. 400కోట్లతో..

కొత్తగూడెం చుట్టూ రింగ్​ రోడ్డు నిర్మాణానికి రూ. 400 కోట్ల మేరకు కేంద్రం నిధులు తీసుకువస్తున్నట్టు అగ్రికల్చర్ ​మినిస్టర్​ తుమ్మల నాగేశ్వరరావు ఇటీవల పేర్కొన్నారు. కొత్తగూడెం-, ఇల్లెందు రోడ్డులోని అనిశెట్టిపల్లి నుంచి హేమచంద్రాపురం, హౌసింగ్​ బోర్డు కాలనీ, రామవరం, దమ్మపేట రోడ్​ మీదుగా పాల్వంచలోని పెద్దమ్మ తల్లి టెంపుల్​వద్దకు దాదాపు 24కిలోమీటర్ల మేర రింగ్​ రోడ్డు నిర్మాణానికి నేషనల్​ హైవే ఆఫీసర్లు ప్రాథమికంగా ప్రతిపాదనలు రూపొందించారు. ఖమ్మం టూ కొత్తగూడెం స్టేట్​ హైవేకు రింగ్​రోడ్డును అనుసందించేలా ప్లాన్​ చేస్తున్నారు. 

ఇదే క్రమంలో పాల్వంచ టు భద్రాచలం మీదుగా జగదల్​ పూర్​కు వెళ్లే నేషనల్​ హైవేకు రింగ్​ రోడ్డు టచ్​ అయ్యేలా చర్యలు చేపడుతున్నారు.  వరంగల్​ నుంచి మహబూబాబాద్, ఇల్లెందు నుంచి భద్రాచలం, మణుగూరు, జగదల్​పూర్​ వెళ్లే భారీ వెహికల్స్​ రింగ్​ రోడ్డు మీదుగా పాల్వంచ వెళ్లకుండా పట్టణ శివారులోని పెద్దమ్మ గుడి ప్రాంతం గుండా నేషనల్​ హైవేకు కనెక్ట్​ చేయనున్నారు. ఇందులో భాగంగానే డీపీఆర్​ రూపొందించేందుకు ఎన్​హెచ్​ డిపార్ట్​మెంట్ రెండు రోజుల కింద రూ. కోటి శాంక్షన్​ చేసింది. దీనికి అధికారులు టెండర్లను కూడా పిలిచారు. 

బైపాస్​ రోడ్లతో ట్రాఫిక్​ సమస్యకు చెక్.. 

కొత్తగూడెం, పాల్వంచ పట్టాణాల్లో ట్రాఫిక్​ సమస్య రోజు రోజుకూ తీవ్రమవుతోంది. కొత్తగూడెం పట్టణం గుండా భారీ వెహికల్స్​ రాకపోకలను పోలీసులు పగలు నిషేధించారు. దీంతో భారీ వెహికల్స్​ను డ్రైవర్లు పట్టణ సరిహద్దుల్లోనే పగలంతా నిలిపి ఉంచే పరిస్థితి నెలకొంది. సింగరేణితో పాటు కేటీపీఎస్, ఎన్టీపీసీ, ఐటీసీ, హెవీవాటర్​ ప్లాంట్, బీటీపీఎస్​ లాంటి పలు పరిశ్రమలకు నిత్యం భారీ వెహికల్స్​ పెద్ద సంఖ్యలో రాకపోకలు సాగిస్తుంటాయి. ఈ క్రమంలో చుంచుపల్లి మండలం నుంచి పాల్వంచకు బైపాస్​ రోడ్డు నిర్మాణానికి అప్పటి ఎమ్మెల్యే జలగం వెంకట్రావ్​ ప్లాన్​ చేశారు. 

చుంచుపల్లి బైపాస్​ నుంచి కొత్తగూడెం పట్టణంలోని గోధుమ వాగు బ్రిడ్జి సమీపంలోని సీఎపీఎఫ్​ ఆఫీస్​ వరకు రోడ్డు నిర్మాణం కొనసాగింది. గోధుమ వాగుపై నేషనల్​ హైవే బ్రిడ్జీలు ఉండడంతో, రైల్వే ట్రాక్​ నేపథ్యంలో మరిన్ని నిధుల కోసం యత్నించే టైంలో అసెంబ్లీ ఎన్నికలు రావడం, బీఆర్​ఎస్​ నుంచి పోటీ చేసిన ఆయన ఓడిపోవడం జరిగింది. తర్వాత బైపాస్​ రోడ్డుపై పెద్దగా కదలిక లేకుండా పోయింది. తాజాగా ప్రస్తుత ఎమ్మెల్యే కూనంనేని సాంబశివరావు బైపాస్​ రోడ్ల నిర్మాణానికి నడుం బిగించారు. ఆర్​ అండ్​ బీ ఆఫీసర్లతో ఎమ్మెల్యే మీటింగ్​లు పెట్టారు.

ALSO READ : సన్నొడ్ల రేట్లు పైపైకి: సర్కారు బోనస్​తో ధరపెంచుతున్న వ్యాపారులు, మిల్లర్లు

 అగ్రికల్చర్​ మినిస్టర్​ తుమ్మల నాగేశ్వరరావుతో పాటు డిప్యూటీ సీఎం భట్టి విక్రమార్క, రెవెన్యూ శాఖ మంత్రి పొంగులేటి శ్రీనివాస రెడ్డి, జిల్లా ఇన్​చార్జి మంత్రి కొమటిరెడ్డి వెంకటరెడ్డికి వినతిపత్రాలు ఇచ్చారు. సీఎం రేవంత్​ రెడ్డికి బైపాస్​ రోడ్ల ఆవశ్యకతను వివరించారు. దీనికి సంబంధించి ఇప్పటికే ప్రాథమిక ప్రతిపాదనలను ఎమ్మెల్యే ప్రభుత్వం దృష్టికి తీసుకెళ్లారు. డిపార్ట్​మెంట్​ నుంచి కూడా ప్రతిపాదనలు పంపాలని కొమటి రెడ్డి ఆర్​అండ్​బీ అధికారులను ఆదేశించినట్టుగా తెలిసింది. రింగ్​ రోడ్డు, బైపాస్​ రోడ్ల నిర్మాణంతో కొత్తగూడెం, పాల్వంచ పట్టణాలు అభివృద్ధితోపాటు ట్రాఫిక్​ సమస్య తీరనుందని స్థానికులు ఆనందం వ్యక్తం చేస్తున్నారు.