- బీజేపీ టికెట్ కోసం బీఆర్ఎస్ను వీడిన రమేశ్
- మోదీ ఇమేజ్ తో గెలుపు ధీమా
- వ్యక్తిగత వ్యతిరేకతతో ఓటమి
హనుమకొండ, వెలుగు: వరంగల్ లోక్సభ స్థానంలో బీజేపీ నుంచి బరిలో దిగిన అభ్యర్థి ఆరూరి రమేశ్కు నిరాశే ఎదురైంది. పార్లమెంట్ ఎన్నికలకు ముందు వరకు బీఆర్ఎస్లో కొనసాగిన ఆయన.. గెలిచే టికెట్గా భావించి బీజేపీలో చేరినా ఫలితం మాత్రం దక్కలేదు. కేంద్రంలో మోదీ, బీజేపీ ఇమేజ్ తో ఇన్నాళ్లు గెలుపు ధీమాతో ఉన్న ఆయనకు లోక్ సభ ఫలితాలు ఊహించని షాక్ ని ఇవ్వగా దిక్కుతోచని స్థితిలో పడ్డారు. ఆరూరిపై వ్యక్తిగత వ్యతిరేకత ఉండడంతో మోదీ చరిష్మా కూడా పని చేయలేదని పలువురు అంటున్నారు.
మోదీపైనే ఆశలతో బీజేపీలోకి..
వర్ధన్నపేట ఎమ్మెల్యేగా 2014, 2018 అసెంబ్లీ ఎన్నికల్లో లక్ష ఓట్ల మెజారిటీతో గెలిచిన ఆరూరి రమేశ్..2023 శాసనసభ ఎన్నికల్లోనూ లక్షకుపైగా మెజారిటీ ఆశించారు. ఎమ్మెల్యేగా హ్యాట్రిక్ కొట్టి, బీఆర్ఎస్ సర్కారు ఏర్పడితే మంత్రి పదవి పొందాలని ఆశపడ్డారు. కానీ ఆయనపై, అనుచరులపై ఉన్న వ్యతిరేకతతో 19,458 ఓట్ల తేడాతో ఓడిపోయారు. తర్వాత బీఆర్ఎస్ నుంచి ఎంపీ టికెట్ ప్రయత్నాలు చేసినప్పటికీ గులాబీ పార్టీకి, వ్యక్తిగతంగా తనకు పరిస్థితి అనుకూలంగా లేకపోవడంతో మోదీ చరిష్మాతోనైనా గెలవవచ్చనే ఉద్దేశంతో బీజేపీ వైపు చూశారు.
బీఆర్ఎస్ ఎంపీ టికెట్ఇస్తానన్నా వద్దనుకుని నాటకీయ పరిణామాల మధ్య మార్చి17న కాషాయ కండువా కప్పుకున్నారు. ఇదివరకటితో పోలిస్తే క్షేత్రస్థాయిలో బీజేపీకి పెరిగిన ఓటు బ్యాంక్, మోదీ ఇమేజ్తో గెలుపు తనదేనన్న భావనతో కౌంటింగ్ ముందు వరకు ధీమాతోనే ఉన్నారు. వరంగల్లో మోదీ సభ కూడా నిర్వహించారు. కానీ, మొదటిసారి పోటీ చేసిన కాంగ్రెస్ అభ్యర్థి కావ్య చేతిలో ఓడిపోయారు.
