- ప్రతిపాదనలు సిద్ధం చేస్తున్న అధికారులు
- పంపింగ్ చేస్తే సాగర్ ఆయకట్టుకూ ప్రయోజనం
- రూ.20 కోట్లు ఖర్చు చేస్తే 18 వేల ఎకరాలకు నీళ్లు
- పాలేరు, ఖమ్మం, కోదాడ నియోజకవర్గ రైతులకు లబ్ధి
ఖమ్మం, వెలుగు : సీతారామ ప్రాజెక్టులో భాగంగా ఖమ్మం జిల్లాలో రిజర్వాయర్ ఏర్పాటు కానుంది. పాలేరు, ఖమ్మం, కోదాడ నియోజకవర్గాలకు లబ్ధి చేకూరే విధంగా ఖమ్మం రూరల్ మండలంలో కొత్త రిజర్వాయర్ నిర్మించాలని అధికారులు ప్లాన్ చేస్తున్నారు. ఇందుకు సంబంధించిన ప్రతిపాదనలు ఇప్పటికే సిద్ధం చేసినట్టు సమాచారం. జిల్లాకు చెందిన మంత్రులు, ప్రభుత్వం నుంచి గ్రీన్సిగ్నల్ వచ్చిన తర్వాత దీనిపై పూర్తిస్థాయిలో వివరాలు వెల్లడించే అవకాశం కనిపిస్తోంది. ఇప్పటికే రాష్ట్ర రెవెన్యూ శాఖ మంత్రి పొంగులేటి శ్రీనివాస్ రెడ్డి దీనిపై కొంత క్లారిటీ ఇచ్చారు. ఇటీవల డిప్యూటీ సీఎం భట్టి విక్రమార్క, మంత్రి తుమ్మలతో కలిసి కలెక్టరేట్లో నీటిపారుదల శాఖపై నిర్వహించిన సమీక్షలో పొంగులేటి కొన్ని వ్యాఖ్యలు చేశారు. దాదాపు రూ.15 వేల కోట్ల ఖర్చుతో నిర్మిస్తున్న సీతారామ ప్రాజెక్టులో రిజర్వాయర్లు డిజైన్ చేయకపోవడం చాలా పెద్ద తప్పన్నారు. 10 నుంచి 13 టీఎంసీల కెపాసిటీతో రిజర్వాయర్ ఏర్పాటు చేయాలన్నారు. ఈ రిజర్వాయర్ నిర్మాణం వల్ల సీతారామ ప్రాజెక్టు నుంచి పంపింగ్ చేస్తే, సాగర్ఆయకట్టుకు కూడా భారీ ప్రయోజనం ఉంటుందని చెప్పారు. రూ.20 కోట్లు ఖర్చు చేస్తే 18 వేల ఎకరాలకు నీటిని అందించవచ్చని పొంగులేటి అన్నారు. దీంతో ఆయన సూచనల మేరకు ఆఫీసర్లు రిజర్వాయర్ ప్రపోజల్ సిద్ధం చేసినట్టు తెలుస్తోంది.
రిజర్వాయర్ కెపాసిటీ10 టీఎంసీలకు పైనే...
ఇప్పటికే సీతారామ ప్రాజెక్టు నుంచి పాలేరు, వైరా రిజర్వాయర్లకు గోదావరి నీటిని తరలించేందుకు కాల్వలు తవ్వుతున్నారు. ఇవి కాకుండా సత్తుపల్లి లింక్ ద్వారా లంకాసాగర్ ప్రాజెక్టుకు నీటిని తరలించే ప్రపోజల్ కూడా ఉంది. అయితే, వీటిలో పాలేరు, వైరా రిజర్వాయర్ల పూర్తి స్థాయి సామర్థ్యం చెరో 2.5 టీఎంసీలు కాగా, లంకాసాగర్ ప్రాజెక్టులో ఒక టీఎంసీ లోపు మాత్రమే నీటిని నిల్వ చేసే కెపాసిటీ ఉంది. దీంతో సీతారామ ద్వారా వచ్చిన గోదావరి నీటిని పూర్తి స్థాయిలో ఉపయోగించుకోవాలంటే 10 టీఎంసీల కెపాసిటీకి మించి రిజర్వాయర్ ఉండాలని ప్లాన్ చేస్తున్నారు. ఖమ్మం రూరల్ మండలంలో అనువైన స్థలాన్ని గుర్తించాలని భావిస్తున్నారు. ఇందుకోసం సర్వే చేసేందుకు సిద్ధమవుతున్నారు. వీటితో పాటు మున్నేరుకు వరద వచ్చిన సమయంలో ఆ నీటిని డైరెక్టుగా పాలేరులోకి గ్రావిటీ ద్వారా తరలించేందుకు మరో లింక్ కాల్వ ప్రపోజల్ కూడా సిద్ధమైనట్టు తెలుస్తోంది. మున్నేరు నుంచి డోర్నకల్వైపు దాదాపు 9 కిలోమీటర్ల కాల్వ తవ్వడం ద్వారా..పాలేరు రిజర్వాయర్కు వెళ్లే సీతారామ లింక్ కెనాల్అప్స్ట్రీమ్కు నీటిని గ్రావిటీ ద్వారా తీసుకెళ్లే అవకాశముందని తేల్చారు. దీనిపై కూడా ప్రభుత్వం నుంచి గ్రీన్ సిగ్నల్వస్తే పనులు మొదలయ్యే అవకాశం కనిపిస్తోంది.
గతంలో రోళ్లపాడు దగ్గర ప్రపోజల్
గతంలో బీఆర్ఎస్ ప్రభుత్వ హయాంలోనే రోళ్లపాడు దగ్గర రిజర్వాయర్ నిర్మాణానికి ప్రపోజల్స్పెట్టారు. 10 టీఎంసీల సామర్థ్యంతో బ్యాలెన్సింగ్ రిజర్వాయర్ నిర్మించాలని ప్లాన్ చేశారు. ఉమ్మడి జిల్లాలోనే ఎత్తయిన ప్రాంతం కావడంతో అక్కడి నుంచి గ్రావిటీ ద్వారా నీటి తరలింపు ఈజీ అవుతుందని భావించారు. అయితే, టేకులపల్లి మండలం పూర్తిగా అటవీ ప్రాంతం కావడం, రోళ్లపాడు దగ్గర వన్యప్రాణి సంరక్షిత రిజర్వుడ్ ఏరియా కూడా ఉండడంతో ఆ ప్రపోజల్ను తొలగించారు. రోళ్లపాడు రిజర్వాయర్ లేకుండానే సీతారామ ప్రాజెక్టును నిర్మిస్తున్నారు. మరోవైపు సీతమ్మ బ్యారేజీకి నేషనల్ గ్రీన్ ట్రిబ్యునల్ నుంచి ఉన్న చిక్కుల కారణంగా మరో ప్రత్యామ్నాయాన్ని కూడా ఆలోచిస్తున్నట్టు తెలుస్తోంది. భద్రాద్రి కొత్తగూడెం జిల్లాలోనూ ఒక రిజర్వాయర్ నిర్మాణం కోసం ప్లాన్ చేస్తున్నట్టు సమాచారం.
