హైదరాబాద్ సిటీ నెట్వర్క్, వెలుగు: సంక్రాంతికి ప్రజలు ఊర్లబాట పట్టడంతో.. హైదరాబాద్లోని పలు ప్రాంతాలు ఖాళీగా మారాయి. ముఖ్యంగా ఆంధ్ర ప్రాంత ప్రజలు నివసించే ఏరియాలు బోసిపోతున్నాయి.
కూకట్పల్లి, మియాపూర్, శేరిలింగంపల్లి, ఎల్బీనగర్, కుత్బుల్లాపూర్ కేపీహెచ్బీ తదితర ప్రాంతాల్లోని ఏపీ ప్రజలు ఇప్పటికే సొంతూళ్లకు పయనమయ్యారు. ఆయా ఏరియాల్లో రోడ్లన్నీ ఖాళీగా కనిపిస్తున్నాయి.
సికింద్రాబాద్, కాచిగూడ, చర్లపల్లి, నాంపల్లి రైల్వే స్టేషన్లు గత రెండు రోజులుగా ప్రయాణికులతో నిండిపోయాయి. ఎంజీబీఎస్, జేబీఎస్, కూకట్పల్లి, ఆరామ్ఘర్, ఉప్పల్ రింగ్ రోడ్, దిల్ సుఖ్నగర్, ఎల్బీనగర్, శేరిలింగంపల్లి, కుత్బుల్లాపూర్, జీడిమెట్ల, నిజాంపేట్ తదితర ప్రాంతాల్లోని బస్టాండ్లు ప్రయాణికులతో కిక్కిరిసిపోతున్నాయి.
హైదర్నగర్ నుంచి ఫుల్ ట్రాఫిక్ జామ్!
శుక్రవారం రాత్రి కూకట్పల్లి ఏరియా నుంచి దాదాపు 1,500 ప్రైవేటు ట్రావెల్ సర్వీసులు ఆంధ్రతో పాటు తెలంగాణలోని పలు జిల్లాలకు వెళ్లాయి. ఈ బస్సులన్నీ ఇక్కడి నుంచి వెళ్లటానికి అర్ధరాత్రి 2.30 వరకు టైమ్ పట్టింది.
కూకట్పల్లి, కేపీహెచ్బీ కాలనీ, మూసాపేట, హైదర్నగర్ ప్రాంతాల్లో ముంబై జాతీయ రహదారి ప్రయాణికులతో కిటకిటలాడింది. ఆర్టీసీతో పాటు, ప్రైవేటు ట్రావెల్స్ బస్సు సర్వీసులు పెద్ద సంఖ్యలో అదనంగా నడపుతున్నప్పటికీ సరిపోవటం లేదు.
దీంతో హైదర్నగర్ నుంచి మూసాపేట వరకు దాదాపు ఏడెనిమిది కిలోమీటర్ల వరకు ట్రాఫిక్ స్తంభించింది. ట్రాఫిక్ పోలీసులు వాహనాల రాకపోకలు సజావుగా సాగేలా చర్యలు చేపడ్తున్నారు.
ఎల్బీనగర్ చౌరస్తా నుంచి సుష్మా చౌరస్తా వరకు సుమారు మూడు కిలోమీటర్ల మేర వివిధ ట్రాన్స్ పోర్ట్ ల బస్ స్టాఫ్ పాయింట్స్ ఉండటంతో పాటు ఏపీఎస్ ఆర్టీసీ, టీజీఎస్ఆర్టీసీ పాయింట్స్ ఉండడంతో బస్సులు రోడ్ల మీద బారులు తీరుతున్నాయి. ఉప్పల్ – వరంగల్ ప్రధాన రహదారి రద్దీగా మారింది.
