- మిగిలిన డబ్బులో ఒక్కో నెల ఒక్కో వర్గానికి ఇస్తా
- వైఎస్ స్ఫూర్తితో ఈ నిర్ణయం తీసుకున్నా
- ప్రభుత్వ విప్, ఆలేరు ఎమ్మెల్యే బీర్ల అయిలయ్య
యాదాద్రి, వెలుగు : ‘తెలంగాణ ఇచ్చిన సోనియాగాంధీ సాక్షిగా నా జీతం ఆలేరు ప్రజలకే ఇస్తా’ అని ప్రభుత్వ విప్, ఆలేరు ఎమ్మెల్యే బీర్ల అయిలయ్య ప్రకటించారు. తనకు ప్రతి నెలా వచ్చే జీతంలో రూ. 9 మాత్రమే తీసుకొని మిగిలిన మొత్తాన్ని ప్రతి నెల ఒక్కో వర్గానికి అందజేస్తానని తెలిపారు. జీతాన్ని ప్రజలకు..జీవితాన్ని ప్రజా సంక్షేమానికి వెచ్చిస్తానన్నారు. డిసెంబర్ నెల జీతంతో 6 నుంచి పదో తరగతి వరకు చదువుతున్న స్టూడెంట్స్కు.. ఎగ్జామ్స్ కోసం అవసరమైన సామగ్రిని కొనిచ్చానని చెప్పారు.
యాదాద్రి జిల్లా భువనగిరిలో శుక్రవారం ఆయన మీడియాతో మాట్లాడారు. పాల సెంటర్ చైర్మన్గా ఉన్న తనకు రాజకీయంగా ఎదగడానికి కాంగ్రెస్ ఎన్నో అవకాశాలు ఇచ్చిందన్నారు. మంత్రి కోమటిరెడ్డి వెంకటరెడ్డి అన్ని విధాలుగా అండగా నిలిచి, ఎమ్మెల్యే కావడానికి కారకులయ్యారన్నారు. రాజకీయాల్లో మాజీ ముఖ్యమంత్రి వైఎస్ రాజశేఖర్రెడ్డి తనకు స్ఫూర్తి అని, ఆయన కూడా జీతం తీసుకోకుండా పని చేశారని, అందుకే తాను కూడా అదే నిర్ణయం తీసుకున్నట్టు చెప్పారు. ఆలేరు నియోజకవర్గంలోని అనాథలు, ఒంటరి మహిళలు, దివ్యాంగులు, వృద్ధులు , ఆటో డ్రైవర్లు, జర్నలిస్టులు ఇలా ఒక్కో నెల ఒక్కో వర్గానికి తన జీతాన్ని ఖర్చు చేస్తానన్నారు.
