న్యూఢిల్లీ: బాలిక, మహిళపై రేప్ కేసుల్లో దోషి.. జోధ్పూర్ జైలులో జీవితఖైదు శిక్ష అనుభవిస్తున్న వివాదాస్పద బాబా ఆశారాం బాపూ(83)కు సుప్రీం కోర్టు బెయిల్ మంజూరు చేసింది. 2013 లో పోలీసులు ఆశారాంను అరెస్ట్ చేశారు. అప్పటి నుంచి జైలులో ఉన్న ఆశారాంకు ఓ కేసులో కోర్టు 2018లో, మరో కేసులో 2023లో జీవిత ఖైదు విధించింది. ఈ కేసుల్లో తాజాగా సుప్రీంకోర్టు ఆయనకు మార్చి 31 వరకు మధ్యంతర బెయిలు ఇచ్చింది. 17 రోజులు పెరోల్పై బయట ఉన్న ఆయన 2025 జనవరి 1వ తేదీనే తిరిగి జైలుకు వెళ్లారు. వారం రోజుల్లోనే మళ్లీ బెయిలుపై బయటకు రావడం గమనార్హం.
ఆశారాం తీవ్ర అనారోగ్య సమస్యలతో బాధపడుతున్నాడని.. వైద్యం చేయించుకునేందుకు మధ్యంతర బెయిల్ ఇవ్వాలని కోరుతూ అతని తరఫు లాయర్లు ఇటీవల సుప్రీం కోర్టును ఆశ్రయించారు. దీన్ని న్యాయమూర్తులు జస్టిస్ ఎంఎం సుందరేశ్, రాజేశ్ బిందాల్తో కూడిన డివిజన్ బెంచ్ మంగళవారం విచారించింది. వాదనలు విన్న బెంచ్ ఆశారాంకు మార్చి 31 వరకు బెయిల్ మంజూరు చేసింది అయితే, విడుదలైన తర్వాత అనుచరులను కలవకూడదని షరతు విధించింది. ఆశారాంను ఆసుపత్రికి తరలించాలని, అయితే చికిత్స కోసం ఎక్కడికి వెళ్లాలో నిర్దేశించవద్దని అధికారులను ఆదేశించింది.
