- ఆత్మహత్యగా చిత్రీకరించే ప్రయత్నం
- తండ్రీ కొడుకుల మధ్య ఆస్తి తగాదాలే కారణం
- నిర్మల్ జిల్లా ముథోల్లో దారుణం
ముథోల్, వెలుగు: నిర్మల్ జిల్లా ముథోల్లో దారుణం జరిగింది. తన కొడుకును ఓ ఏఎస్సై, మరో కానిస్టేబుతల్తో కలిసి చంపేశాడు. ఆ తర్వాత ఆత్మహత్యగా చిత్రీకరించే ప్రయత్నం చేశాడు. ముథోల్కు చెందిన రాందాస్.. కుంటాల పోలీస్ స్టేషన్లో ఏఎస్సైగా విధులు నిర్వహిస్తున్నాడు. అతనికి 32 ఏండ్ల కొడుకు సచిన్ అలియాస్ కరుణ్ ఉన్నాడు. తండ్రీకొడుకుల మధ్య కొన్ని రోజులుగా ఆస్తి విషయంలో గొడవలు జరుగుతున్నాయి. బంధువుల దశదిన కర్మ కోసం శనివారం రాందాస్ కుంటాల నుంచి ముథోల్కు వచ్చాడు.
నిర్మల్లో కానిస్టేబుల్ గా విధులు నిర్వహిస్తున్న వరుసకు బావ అయిన అనిల్ కూడా ముథోల్లోనే ఉంటాడు. శనివారం రాత్రి సచిన్పై రాందాస్, అనిల్ దాడి చేశారు. దీంతో అతను చనిపోయాడు. సచిన్ ఉరేసుకుని ఆత్మహత్య చేసుకున్నట్లు సీన్ క్రియేట్కు ప్రయత్నించారు. ఇది గమనించిన సచిన్ భార్య సుష్మా.. 100కి డయల్ చేసి విషయం చెప్పింది. పోలీసులు ఘటనా స్థలానికి చేరుకుని పరిశీలించారు. క్లూస్ టీమ్, డాగ్ స్క్వాడ్తో తనిఖీలు చేశారు. భైంసా ఏఎస్పీ అవినాశ్ కుమార్ మాట్లాడుతూ.. ముథోల్ పోలీస్ స్టేషన్కు 100 కాల్ రావడంతో పోలీసులు ఘటనా స్థలానికి చేరుకుని పరిశీలించారు. ఏఎస్సై రాందాస్, అతని అల్లుడు కానిస్టేబుల్ అనిల్ కలిసి సచిన్ను చంపేసినట్లు సుష్మా ఫిర్యాదు చేసినట్లు తెలిపారు. ఈ మేరకు కేసు నమోదు చేసి నిందితులను అదుపులోకి తీసుకున్నట్లు వివరించారు. నిర్మల్ ఎస్పీ జానకి షర్మిల ఘటనా స్థలాన్ని పరిశీలించారు.
