హైపర్లూప్ టెక్నాలజీ అత్యాధునిక సాంకేతికతను వినియోగించి మద్రాస్ ఐఐటీ తైయూర్ క్యాంపస్లో 425 మీటర్ల పొడవైన హైపర్లూప్ ట్యూబును నిర్మించారు.
సాధారణంగా భూమిపై ప్రయాణించే వాహనాలకు గాలి అనేది పెద్ద ఆటంకం. దానివల్ల అవి ఒక పరిమితికి మించిన వేగంతో వెళ్లలేవు. కానీ గాలి పీడనం బాగా తక్కువగా ఉండే హైపర్లూప్ ట్యూబ్లోకి బోగీని ప్రవేశపెడితే, దాని వేగం బాగా పెరుగుతుంది. ఈ పరిశోధనకు భారతీయ రైల్వే, ఎల్ అండ్ టీ సంస్థలు నిధులు అందిస్తున్నాయి.
తక్కువ గాలి పీడనం ఉండటం, అయస్కాంత బలం తోడు కావడం వల్ల హైపర్లూప్ బోగీ గంటకు దాదాపు 500–600 కిలోమీటర్ల వేగంతో దూసుకెళ్తుంది. ఈ ప్రయోగం విజయవంతమయ్యాక హైపర్లూప్ బోగీలో సరుకులను రవాణా చేసి పరిశీలిస్తారు. అది కూడా సఫలమైతే చివరగా హైపర్లూర్ బోగీల్లో మనుషులను కూర్చోబెట్టి ప్రయోగాలు నిర్వహిస్తారు. ఇది ఆచరణలోకి వస్తే చెన్నై నుంచి బెంగళూరుకు 30 నిమిషాల్లోనే చేరుకోవచ్చు.
