భారతదేశంలో పనిచేయగలిగిన వయస్సు (15 నుంచి 64) కలిగిన జనాభా సంఖ్య 2036కు పెరుగుతుందని ఏషియన్ డెవలప్మెంట్ బ్యాంక్ (ఏడీబీ) నివేదిక పేర్కొన్నది. 2011 నాటికే భారత్లో 60 శాతం మంది పని వయస్సు జనాభా ఉందని, ఇది 2031 నాటికి 65.1 శాతానికి చేరుతుందని పేర్కొంది. అయితే, 2036 నాటికి స్వల్పంగా తగ్గుముఖం పట్టి 64.9 శాతానికి చేరే అవకాశం ఉందని తెలిపింది. ఇదే సమయంలో చైనా, జపాన్ల్లో పని వయస్సు జనాభా తగ్గుముఖం పడుతున్నదని తెలిపింది.
పని వయస్సు జనాభా పెరుగుదల కారణంగా శ్రామిక శక్తి వృద్ధి చెందుతుందని, ఆసియా, పసిఫిక్ ప్రాంతాల్లో ఆర్థిక వృద్ధికి దోహదపడుతుందని నివేదిక వివరించింది. ఆసియా, పసిఫిక్ ప్రాంతాల్లో వలసలు, మానవ వనరుల మూలధన పెట్టుబడులు కూడా తగ్గుముఖం పట్టే అవకాశం ఉందని పేర్కొంది.
ప్రస్తుతం పలు దేశాల్లో పని వయసు జనాభా తగ్గుముఖం పట్టిన నేపథ్యంలో ఆయా దేశాలు మరిన్ని విధానాలు అవలంబించాల్సి వస్తున్నదని పేర్కొంది.
