- కొల్లూరు సంఘం భూమి అమ్మడంతో రంగంలోకి బీసీ కార్పొరేషన్
- భూములపై ఆరా.. నిషేధిత జాబితాలో కార్పొరేషన్ల భూమి!
యాదాద్రి, వెలుగు : జిల్లోని ‘కొల్లురు’ ఘటన నేపథ్యంలో జీవాల కోసం కో ఆపరేటీవ్ సొసైటీలకు ఇచ్చిన భూముల పరిరక్షణకు ఆఫీసర్లు చర్యలు చేపడుతున్నారు. ఈ భూములు ఉన్నాయా? అమ్ముకున్నారా? అనేదానిపై ఆరా తీస్తున్నారు. భూములను అమ్కుండా నిషేధిత జాబితాలో చేర్చేందుకు రంగం సిద్ధం చేస్తున్నారు. ఉమ్మడి ఆంధ్రప్రదేశ్లో చంద్రబాబు సర్కారు 2003–-04లో ‘కోటి వరాలు’ పేరుతో కుల వృత్తులకు సంబంధించిన కో ఆపరేటీవ్ సొసైటీలకు లోన్లు ఇచ్చింది. యాదాద్రి జిల్లాలోని 24 షీప్ బ్రీడింగ్ కో ఆపరేటీవ్ సొసైటీలకు ఒక్కోదానికి రూ. లక్ష చొప్పున లోన్ మంజూరు చేసింది. ఈ సొమ్ముతో ఒక్కో సొసైటీ 4 నుంచి 7 ఎకరాల వరకూ భూములు కొనుగోలు చేసి బీసీ కార్పొరేషన్కు మార్టిగేజ్ చేశాయి. ఈ భూములను గొర్రెల మేత కోసం ఉపయోగించుకొని వాటి ద్వారా ఏండ్లుగా ఉపాధి పొందారు.
భూములపై కొందరి కన్ను
తెలంగాణ రాష్ట్రం ఏర్పడిన తర్వాత రియల్ ఎస్టేట్ రంగం ఊపందుకుంది. యాదాద్రి జిల్లాలో యాదగిరిగుట్ట శ్రీలక్ష్మీ నర్సింహస్వామి టెంపుల్ పునర్నిర్మాణంతో జిల్లా వ్యాప్తంగా భూములు రేట్లు బాగా పెరిగాయి. ఈ క్రమంలో పడావుగా ఉన్న షీప్ బ్రీడింగ్ కో ఆపరేటీవ్ సొసైటీల భూములపై కొందరి కన్ను పడింది. సబ్సిడీ చెల్లించినందున తమ భూమిని మార్టిగేజ్ నుంచి తప్పించాలని కార్పొరేషన్ ఎంప్లాయీస్ను కొందరు ఆశ్రయించి ఎన్వోసీ పొందారు. ఆ తర్వాత వాటిని మార్కెట్లో అమ్మకానికి పెట్టినట్టుగా తెలిసింది. ఈ తరహాలో కొన్ని సొసైటీలు భూములను అమ్ముకున్నాయని ప్రచారం జరుగుతోంది.
ఇప్పటికే యాదాద్రి జిల్లా ఆలేరు మండలం కొల్లూరుకు చెందిన మల్లికార్జున షీప్ బ్రీడింగ్ కో ఆపరేటీవ్ సొసైటీకి చెందిన కొందరు ఐదెకరాల భూమిని అమ్మి రిజిస్టేషన్చేసుకున్న విషయం తెలిసిందే. సొసైటీ మెంబర్ల మధ్య విబేధాలు వచ్చి కలెక్టర్ కు ఫిర్యాదు చేశారు. కలెక్టర్ ఆదేశాలతో బీసీ డెవలప్మెంట్ఆఫీసర్ విచారణ చేపట్టి అమ్మకం వాస్తవమేనని తేల్చారు. ఈ క్రమంలో ఆ భూమి అమ్మిన, కొనుగోలు చేసి వ్యక్తులపై ఆఫీసర్లు చర్యలకు సిద్ధమయ్యారు.
మిగతా సొసైటీల భూములపై ఆరా...
కొల్లూరు సొసైటీ భూమిని అమ్ముకున్న విష యం వెలుగులోకి రావడంతో జిల్లాలోని మిగ తా సొసైటీల భూములు ఉన్నాయా? అమ్ముకున్నారా? అనే చర్చ మొదలైంది. ఆ భూములకు సం బంధించిన వివరాలను నల్గొండ నుంచి బీసీ కార్పొరేషన్ ఆఫీసర్లు తెప్పించి పరిశీలిస్తున్నారు. ఈ భూముల క్రయ విక్రయాలు మళ్లీ జరగకుండా సర్వే నెంబర్లను బ్లాక్ చేసేలా చర్యలు చేపడుతున్నారు.
నిషేధ జాబితాలో చేరుస్తాం
సొసైటీ భూమల పరిరక్షణ కోసం చర్యలు తీసుకుంటాం. వాటిని నిషేధిత జాబితాలో చేర్చడానికి నిర్ణయం తీసుకోనున్నాం. కొల్లూరులో అమ్మిన సొసైటీ భూమి కూడా మరోసారి చేతులు మారకుండా ఈ జాబితాలో చేరుస్తాం. - ఎంవీ భూపాల్రెడ్డి,ఆర్డీవో, భువనగిరి
బాధ్యులపై చర్యలు
33 జిల్లాల్లో ఉన్న షీప్ పెడరేషన్ భూము ల వివరాలు సేకరించాలని ఆఫీసర్లకు ఆదేశాలు ఇచ్చాం. కొల్లూరులో భూ విక్రయంపై విచారణ జరిపి బాధ్యులపై చర్యలు తీసుకోవాలని ఆఫీసర్లకు సూచించాం. భూములు కాపాడడానికి అన్ని చర్యలు తీసుకుంటాం. - దూదిమెట్ల బాలరాజు యాదవ్, తెలంగాణ షీప్స్ అండ్ గోట్స్ డెవలప్ మెంట్ కార్పొరేషన్
