- బూత్కు 50 మందిని చేర్చేలా ప్రయత్నాలు
- విషయం బయటపడకుండా ఆన్లైన్లోనే అప్లికేషన్లు
- అధికార పార్టీ పనేనంటూ ప్రతిపక్షాల విమర్శలు
నిజామాబాద్, వెలుగు: అసెంబ్లీ ఎన్నికలు సమీపిస్తున్న వేళ జిల్లాలో బోగస్ఓటర్ల నమోదు లొల్లి కాక రేపుతోంది. ఇప్పటికే జిల్లావ్యాప్తంగా మూడు నియోజకవర్గాల్లో అనుమానాస్పద విషయాలు బయటకు రాగా, మిగతా సెగ్మెంట్లలోనూ నడుస్తున్నట్లు తెలుస్తోంది. ఈ విషయంలో అధికార బీఆర్ఎస్ పై ప్రతిపక్ష కాంగ్రెస్, బీజేపీలు విమర్శలు గుప్పిస్తున్నాయి. సరిహద్దున ఉన్న మహారాష్ట్రతో జిల్లాలోని అనేక కుటుంబాలకు బంధుత్వం, వ్యాపార సంబంధాలు ఉంటాయి. మంజీరా నదిలో ఇసుక క్వారీలు నడిచినప్పుడు జిల్లా లీడర్లకు పార్ట్నర్షిప్ ఉంటుంది. క్వారీ అవసరాలకు వేల సంఖ్యలో పక్క రాష్ట్ర కూలీలతో పనిచేయించుకొని డబ్బులు చెల్లించేవారు.
ఆ సమయంలో సేకరించిన ఫోన్నెంబర్ల ద్వారా ఇప్పుడు వారిని సంప్రదిస్తున్నట్లు సమాచారం. ఒకరి నుంచి మరొకరిని చైన్పద్ధతిలో రీచ్అవుతున్నారు. ధర్మాబాద్, బిలోలి, నర్సీ, నాయేగావ్, దెగ్లూర్ మొదలుకొని నాందేడ్ దాకా జిల్లా మొత్తం ఎమ్మెల్యేలకు చెందిన టీంలు పనిచేస్తున్నాయి. అక్కడివారికి గవర్నమెంట్పథకాలు, నగదు ఇస్తామని ఆశచూపి ఓటరుగా నమోదు చేయిస్తున్నారు.
ఇంటి బై నంబర్లతో అప్లికేషన్లు..
ఇటీవల ఎన్నికల ఆఫీసర్లు ఓటర్ డ్రాఫ్ట్ లిస్ట్ ప్రకటించారు. అందులో మార్పు చేర్పుల కోసం గత నెల 26, 27 తేదీల్లో స్పెషల్ క్యాంప్లు నిర్వహించారు. ప్రతీ పోలింగ్ బూత్వద్ద బీఎల్వోలు అర్జీలు స్వీకరించగా, జిల్లా మొత్తం మీద 5,600 దరఖాస్తులు అందాయి. వీటిని పరిశీలించాల్సి ఉంది. మరో పక్క సెప్టెంబర్19 వరకు కొత్త ఓటర్ల నమోదు ప్రక్రియ నడుస్తోంది. అక్టోబర్4న ఫైనల్లిస్టును ప్రకటించనున్నారు. ఆ తర్వాత మార్పులకు ఛాన్స్ ఉండదు.
ఎన్నికలకు ఆ లిస్టే ప్రామాణికంగా కానుంది. ఇలా చివరి స్టేజ్లో ఓటర్ లిస్టును వీలైనంత మేర తమకు అనుకూలంగా మార్చడానికి లీడర్లు యత్నిస్తున్నారు. స్థానికులు కానివారి పేర్లతో ఆన్లైన్లోనే దరఖాస్తులు చేస్తున్నారు. ఇప్పుడున్న ఇంటి నంబర్లకు బై నంబర్లు తగిలించి అప్లికేషన్లు పెడుతున్నారు. ఇంటి యజమానులకు తెలియకుండా అదే ఇంట్లోని ఓటర్లకు అదనంగా కొత్త పేర్లు చేరుస్తున్నారు.
ఫీల్డ్ విజిట్ మస్ట్..
ఓటర్ లిస్టుపై వివాదాలు తలెత్తిన నేపథ్యంలో లొసగులు లేని ఫైనల్లిస్ట్ను తయారు చేయడం ఆఫీసర్లకు కత్తి మీద సాములా మారింది. ఎలక్షన్ కమిషన్ గైడ్లైన్స్ ఒక ఇంటి నంబర్పై ఆరు కంటే ఎక్కువ ఓట్లు ఉంటే క్రాస్చెక్ చేసి, కన్ఫర్మ్ చేసుకోవాలి. ఇంటి యాజమాని ధ్రువీకరణ తీసుకొని, కొత్త ఓటర్లను నమోదు చేయాల్సి ఉంటుంది.
ఆన్లైన్పైనే అర్జీ..
ఎమ్మార్వో ఆఫీసుకు వెళ్లి ఆఫ్లైన్లో వందల సంఖ్యలో అర్జీలిస్తే, బయటపడతామని ఉద్దేశంతో ఆన్లైన్ రూట్ఎంచుకుంటున్నారు. బోధన్లో రెండు, నిజామాబాద్లో రెండు మీ–సేవా సెంటర్లు ఇందు కోసమే ప్రత్యేకంగా పనిచేస్తున్నాయి. గడిచిన 15 రోజుల్లో కేవలం బోధన్లోనే 6,225 కొత్తగా ఓటు హక్కు కోసం ఆన్లైన్ దరఖాస్తులు పెట్టారు. ఆఫ్లైన్లో ఒక్క దరఖాస్తు రాకపోవడం స్థానికంగా దుమారం రేపుతోంది. అయిదు పోలింగ్ బూత్ల పరిధిలో 500 వందలకు మించి ఆర్జీలు రావడం అనుమానాస్పదంగా మారింది.
నాలుగు రోజుల కింద నిజామాబాద్ సిటీలోని ఒక పోలింగ్బూత్లో సర్వే ఏజెన్సీ పేరుతో కొందరు అనుమానితులు హల్చల్చేశారు. ఓటర్ లిస్టులో తమవద్ద ఉన్న ఫొటోలు అంటించే ప్రయత్నం చేశారు. జిల్లావ్యాప్తంగా 1549 పోలింగ్బూత్లు ఉండగా, బూత్కు కనీసం 50 చొప్పున స్థానికేతర ఓట్లను చేర్చేలా లక్ష్యం పెట్టుకున్నట్లు తెలుస్తోంది.
