మహారాష్ట్ర, హర్యానా, జార్ఖండ్లలో త్వరలో అసెంబ్లీ ఎన్నికలు జరగనున్నాయి. ఈ మూడు రాష్ట్రాల్లో పవర్లో ఉన్న బీజేపీ మరోసారి అధికారాన్ని నిలబెట్టుకోవటం పెద్ద కష్టం కాదనే అభిప్రాయం వ్యక్తమవుతోంది. ఇటీవలి లోక్సభ ఎన్నికల్లో ఎన్డీఏ తిరుగులేని విజయాన్ని సొంతం చేసుకోవటం, ప్రధాని మోడీ ఇమేజీ, కేంద్రం ఈమధ్య తీసుకున్న సంచలన నిర్ణయాలు అసెంబ్లీ ఎలక్షన్స్లో బీజేపీ గెలుపును నల్లేరుపై నడకలా మార్చనున్నాయని ఎనలిస్టులు భావిస్తున్నారు. ఆ పార్టీ ఎన్నికల ప్రచారంలో కూడా ఇదే ఉత్సాహం కొట్టొచ్చినట్లు కనిపిస్తోంది.
లోక్సభ ఎన్నికల్లో అసాధారణ విజయాన్ని ఖాతాలో వేసుకున్న బీజేపీ మరోసారి అసెంబ్లీ ఎన్నికల మోడ్లోకి వెళ్లిపోయింది. మహారాష్ట్ర, హర్యానాల్లో అక్టోబర్లో ఎన్నికలు జరుగుతాయి. జార్ఖండ్ శాసన సభకు నవబంర్ లేదా డిసెంబర్లో ఎలక్షన్స్ జరిగే అవకాశాలున్నాయి. ఈ మూడు రాష్ట్రాల్లో ఇప్పటికే అధికారంలో ఉన్న బీజేపీ రెట్టించిన ఉత్సాహంతో ఎన్నికల ప్రచారాన్ని కొనసాగిస్తోంది. ఈ విషయంలో ప్రతిపక్ష పార్టీల కన్నా చాలా ముందంజలో దూసుకుపోతోంది. మహారాష్ట్ర సీఎం దేవేంద్ర ఫడ్నవీస్, హర్యానా సీఎం మనోహర్ లాల్ ఖట్టర్ యాత్రల పేరుతో క్యాంపెయిన్ చేస్తున్నారు.
కేంద్రంలో బీజేపీ మరోసారి పవర్లోకి వచ్చింది. అసెంబ్లీ ఎన్నికలు జరగబోయే మూడు చోట్లా కమలనాథుల చేతిలోనే అధికారం ఉంది. రెండో టర్మ్లోని తొలి వంద రోజుల్లో మోడీ సర్కార్ పనితీరు బీజేపీకి మరింత ప్లస్ కానుందనే టాక్ వినిపిస్తోంది. జమ్మూ కాశ్మీర్కు స్పెషల్ స్టేటస్ను తీసేసి ఆ రాష్ట్రాన్ని ఇండియాతో సెంట్పర్సెంట్ కనెక్ట్ చేయటం ద్వారా దేశవ్యాప్తంగా మళ్లీ జాతీయ భావాన్ని రగిలించారు. అయితే, యాంటీ–ఇంకంబెన్సీ గండం లేకపోలేదు. పోయినేడాది చివరలో జరిగిన మధ్యప్రదేశ్, రాజస్థాన్ ఎన్నికల్లో బీజేపీ దెబ్బతిన్నది. కాంగ్రెస్ అధికారం దక్కించుకుంది. లోక్సభ ఎన్నికల్లో మాత్రం ఆ పార్టీ ఫుల్ మెజారిటీ సాధించగలిగింది. మిక్స్డ్ రిజల్ట్స్ నేపథ్యంలో సునాయాసంగా యాంటి ఇంకంబెన్సీని దాటేస్తామన్న ధీమాతో ఉన్నారు మహారాష్ట్ర, హర్యానా బీజేపీ నాయకులు.
అపొజిషన్ బలహీనత మరో పాజిటివ్ అంశం
ఆ రెండు రాష్ట్రాల్లోనూ బీజేపీకి ప్రధాన పోటీదారు కాంగ్రెస్ పార్టీనే. ఇది అధికార పార్టీకి కలిసొచ్చే మరో అంశమని ఎనలిస్టులు అంటున్నారు. ఎందుకంటే హస్తం పార్టీ మరీ అంత బలంగా లేదు. జార్ఖండ్లో కూడా బీజేపీని సొంతంగా ఢీకొనే శక్తిసామర్థ్యాల్లేక లోకల్ పార్టీ జార్ఖండ్ ముక్తి మోర్చా (జేఎంఎం)తో ఎన్నికల అవగాహన కుదుర్చుకుంది. హర్యానాలో పీసీసీ పగ్గాలను నిన్నగాక మొన్ననే కుమారి షెల్జాకు అప్పగించింది. ఆమె లీడర్షిప్పై పీసీసీ వర్గాల్లో నమ్మకం లేదు. ఎందుకంటే, షెల్జా ఎప్పుడూ హర్యానా రాష్ట్ర రాజకీయాల్లో లేరు. 1991లో మొదటిసారి సిర్నా (హర్యానా) నుంచి గెలిచి పీవీ నరసింహారావు కేబినెట్లో సహాయ మంత్రిగా పనిచేశారు. 1996లో సిర్సా, 2004, 2009ల ఎన్నికల్లో అంబాలా నియోజకర్గాలనుంచి గెలిచారు. ప్రస్తుతం రాజ్యసభ మెంబర్గా ఉన్నారు. లోకల్ పాలిటిక్స్పై పట్టు సాధించేసరికి పుణ్యకాలం కాస్తా గడిచిపోతుందని కాంగ్రెస్ వర్గాలు అంటున్నాయి. ఈ లోటును భర్తీ చేయటానికి ఎలక్షన్ కమిటీ హెడ్గా మాజీ సీఎం, సీనియర్ లీడర్ భూపిందర్ హూడాను నియమించింది. హర్యానాలో హస్తం పార్టీ పూర్తి స్థాయిలో ఎలక్షన్ క్యాంపెయిన్ ప్రారంభించాల్సి ఉంది.
మరోవైపు… బీజేపీ ఇప్పటికే ప్రచారాన్ని ముమ్మరంగా సాగిస్తోంది. ముఖ్యమంత్రి మనోహర్లాల్ ఖట్టర్ గత నెల (ఆగస్టు) 18న ‘జన్ ఆశీర్వాద్ యాత్ర’ చేపట్టి జనంలోకి వెళ్లిపోతున్నారు. ఈ కార్యక్రమానికి ప్రజల నుంచి వస్తున్న స్పందన పట్ల బీజేపీ హైకమాండ్ కూడా సంతృప్తిగానే ఉందని పరిశీలకులంటున్నారు.
హర్యానాలో మోడీ ప్రచారం
రిజర్వేషన్ల కోసం జాట్ల నిరసనల్ని, డేరా బాబా రామ్ రహీమ్ను అరెస్ట్ చేసినప్పుడు జరిగిన అల్లర్లనూ సీఎం ఖట్టర్ సరిగ్గా డీల్ చేయలేదన్న అసంతృప్తి వ్యక్తమైనా ఇప్పుడు అవన్నీ సర్దుకున్నాయి. ప్రస్తుతం ఆయన చాలా స్ట్రాంగ్ పొజిషన్లో ఉన్నట్లు కనిపిస్తోంది. ప్రధాని మోడీ, పార్టీ చీఫ్ అమిత్ షా అండదండలు ఆయనకు పుష్కలంగా ఉన్నాయని చెబుతున్నారు. ఇప్పటికే మోడీ హర్యానాలో ప్రచారాన్ని మొదలెట్టేశారు. రోహతక్లో ఆదివారం ‘విజయ్ సంకల్ప్’ ర్యాలీ జరిపారు. మెగా ఫుడ్ పార్క్తో పాటు పలు ప్రాజెక్టులకు శంకుస్థాపన చేశారు. రెండోసారి అధికారంలోకి వచ్చాక ఈ వంద రోజుల్లో తమ సర్కారు చేసిన పనుల్ని, పార్లమెంట్లో పాస్ చేయించిన బిల్లుల్ని జనాలకు తెలియజేశారు. దీంతోపాటు ప్రతిపక్ష కాంగ్రెస్ పార్టీలో గొడవలు, దేవీలాల్ ఫ్యామిలీకి చెందిన ఐఎన్ఎల్డీలో చీలిక బీజేపీ సక్సెస్ను మరింత సింపుల్గా మారుస్తాయంటున్నారు ఎనలిస్టులు.
జార్ఖండ్లోనూ సై…
జార్ఖండ్ అసెంబ్లీ ఎన్నికలకూ బీజేపీ రెడీ అవుతోంది. ప్రధాని మోడీని సైతం ఎన్నికల ప్రచారానికి రప్పించాలని చూస్తోంది. ఈ నెల 12న రాంచీలో జరిపే ర్యాలీలో ఆయన పాల్గొనే ఛాన్స్ ఉంది. ఇక్కడ ప్రధాన ప్రతిపక్షం జేఎంఎం. ఈ పార్టీ ట్రైబల్ ఓట్లను నమ్ముకుంది. బీజేపీ గత ఎన్నికల్లో నాన్–ట్రైబల్ వ్యక్తి (రఘువర్ దాస్)ని సీఎం చేసింది. మరోసారి అప్పర్ క్యాస్ట్ ఓట్లు రాబట్టాలన్న ప్లాన్తో ప్రచారానికి వెళ్లబోతోంది. ట్రైబల్ ఓట్ల కోసం కేంద్ర గిరిజన వ్యవహారాల మంత్రి అర్జున్ ముండాను ఎన్నికల ప్రచారంలోకి దింపనుంది. అభివృద్ధి పనుల విషయంలో రఘువర్ దాస్ సర్కారు మరింత మెరుగ్గా పనిచేసి ఉంటే బాగుండేది. అయినా ఆయన నాయకత్వంలోనే జార్ఖండ్లో మరోసారి అధికారం చేపట్టాలని బీజేపీ ఆశిస్తోంది.
మహారాష్ట్రలోకూడా ఇదే సీన్
మహారాష్ట్ర సీఎం దేవేంద్ర ఫడ్నవీస్.. ‘మహా జనదేశ్ యాత్ర’ చేపట్టారు. ఇది బీజేపీ మైలేజీని పెంచింది. భారీ వర్షాలు, వరదల వల్ల ఈ యాత్రను ఏకబిగిన కాకుండా రెండు దశల్లో నిర్వహించారు. 2014లో మాదిరిగానే ఈసారికూడా శివసేనతో కలిసి పోటీ చేయాలన్న నిర్ణయానికి వచ్చారు. సీట్ల సర్దుబాటుపై ఫైనల్ డెసిషన్ తీసుకోవలసి ఉంది. లోక్సభ ఎన్నికలకు ముందు కొంతకాలం శివసేన అటు ఇటు ఊగిసలాడింది. ఒక దశలో తమ అధికార పత్రిక ‘సామ్నా’లో మోడీ సర్కారుని, ఆయన విధానాలను తీవ్రంగా విమర్శించింది. చివరికి బీజేపీ ప్రెసిడెంట్ అమిత్ షా చొరవతో రెండు పార్టీలు కలిసే పోటీ చేశాయి. అదే తీరుగా అసెంబ్లీ ఎన్నికల్లోనూ పొత్తుకి రెడీ అయ్యాయి. ఈ రాష్ట్రంలో కూడా బీజేపీకి ప్రధాన పోటీదార్లు కాంగ్రెస్, ఎన్సీపీలే. ఆ రెండు పార్టీల్లోనూ లీడర్ల మధ్య యూనిటీ లేదు. వీళ్ల కుమ్ములాటలే ప్రతిపక్షాలకు ప్రధానంగా మైనస్ కావచ్చని అంచనా. మహారాష్ట్రలో హస్తం పార్టీకి చెప్పుకోదగ్గ సీనియర్ నేత లేరు. ఫలితంగా చోటా మోటా నాయకులను ఏకతాటిపైకి తేవటం కష్టంగా మారింది. ఎన్సీపీ చీఫ్ శరద్ పవార్ తన పార్టీ కార్యకర్తలు బీజేపీ తదితర పార్టీల్లోకి జారిపోకుండా కాపాడుకోవటానికే టైమంతా కేటాయించాల్సి వస్తోంది. ఇప్పటికే ఎన్సీపీ లీడర్లు టికెట్ల కోసం అధికార బీజేపీ ఆఫీసులో కర్చీఫ్లు వేసి ఉంచారు. సొంత పార్టీ ఆదరించి టికెట్ ఇవ్వకపోతే కాషాయ పార్టీలోకి జంప్ చేయటానికి రెడీగా ఉన్నారు. ఎన్సీపీలో శరద్ పవార్ కూతురు సుప్రియ సూలేకి, ఆమె పెదనాన్న కొడుకు అజిత్ పవార్కి మధ్య పొసగట్లేదు. వాళ్లిద్దరి మధ్య సయోధ్య కుదర్చటానికి శరద్ పవార్ శాయశక్తులా కృషి చేస్తున్నారు.
‘టినా’ ఫ్యాక్టరా మజాకా!
హర్యానాలో సీఎం మనోహర్లాల్ ఖట్టర్కు ఇప్పుడు తిరుగులేదనడానికి ఆయన అభిమానులు ‘టినా’ (టీఐఎన్ఏ) ఫ్యాక్టర్ ఎంచుకున్నారు. టినా అంటే ‘దేర్ ఈజ్ నో ఆల్టర్నేటివ్’ అని అర్థం. లోక్సభ ఎన్నికల్లో ఈ రాష్ట్రంలో బీజేపీ పదికి పది సీట్లు కైవసం చేసుకుంది. మాజీ సీఎం భూపిందర్ హుడా, ఆయన కుమారుడు దీపేంద్ర కూడా ఓడిపోయారు. దీనికితోడు బీజేపీ నాన్–జాట్ కార్డ్ ప్రయోగిస్తోంది. తద్వారా పెద్ద కులాలు, బనియాలు, వ్యాపారులు, ఓబీసీల ఓట్లకు గాలమేస్తోంది. సీఎం ఖట్టర్ కూడా ట్రేడ్ సెగ్మెంట్కే చెందిన వ్యక్తి కావటం చెప్పుకోదగ్గ విషయం.
