అనంతమైన విశ్వంలో మన భూమిపై తప్ప ఇంకెక్కడా ఆక్సిజన్ ఉండకపోవచ్చని శాస్త్రవేత్తలు ఇప్పటివరకు భావించారు. కానీ మనకు అత్యంత సుదూరంలో ఉన్న ఒక నక్షత్ర మండలం(గెలాక్సీ)లో ఆక్సిజన్ ఆనవాళ్లను గుర్తించారు. అంతేకాకుండా భారీ లోహాల జాడను సైతం కనిపెట్టారు. ఈ గెలాక్సీ భూమి నుంచి ఏకంగా 1340 కోట్ల కాంతి సంవత్సరాల దూరంలో ఉన్నది.
విశ్వం ఏర్పడిన తొలినాళ్లలోనే ఇది ఏర్పడి ఉండవచ్చని పరిశోధకులు భావిస్తున్నారు. విశ్వం పుట్టుకకు కారణమైన బిగ్బ్యాంగ్1380 కోట్ల ఏళ్ల క్రితం సంభవించిందన్న వాదనలు ఇప్పటికీ ఉన్నాయి.
ఈ నక్షత్ర మండలానికి జేడ్స్–జీఎస్–జెడ్14–0 అని నామకరణం చేశారు. నిజానికి దీన్ని 2024, జనవరిలోనే ప్రాథమికంగా గుర్తించారు. జేమ్స్ వెబ్స్పేస్ టెలిస్కోప్ ఈ గెలాక్సీ ఉనికిని వెలుగులోకి తీసుకువచ్చింది. కాకపోతే దానిపై ప్రాణవాయువు ఉన్నట్లు కనిపెట్టడం కీలక పరిణామమని సైంటిస్టులు చెబుతున్నారు.
ఆ ఆక్సిజన్ ఏ రూపంలో ఎంత పరిమాణంలో ఉందన్నది తేల్చడానికి పరిశోధనలు చేస్తున్నారు. పరిమాణంలో అత్యంత భారీగా ఉన్న ఈ నక్షత్ర మండలం కాంతివంతమైంది కూడా. మన భూగోళం ఉన్న గెలాక్సీకి సమీపంలో ఇప్పటివరకు మరో 700 గెలాక్సీలను జేమ్స్ వెబ్ టెలిస్కోప్ గుర్తించింది.
