ప్రత్యర్థులతోనూ అజాతశత్రువు అనిపించుకున్న మహోన్నతుడు అటల్​జీ

మన దేశంలో సుపరిపాలనకు పితామహుడు వాజ్​పేయి. తన జీవితాంతం ఓటమికి బెదరని నిఖార్సయిన నాయకుడిగా నిలిచిన ఆయన.. అధికారం కోసం అడ్డదారులు తొక్కకుండా, అసత్య రాజకీయాలకు చోటివ్వకుండా రెండుసార్లు ప్రధాని పదవిని సైతం వదులుకున్నారు. భవిష్యత్​ను ముందే ఊహించి ప్రధానిగా మహోన్నత నిర్ణయాలు, ఆదర్శభావాలతో దేశాన్ని ముందుకు నడిపించారు. రాజకీయంగా, వ్యక్తిగతంగా ఎన్ని ఇబ్బందులు ఎదురైనా ఎదురొడ్డి నిలిచిన యోధుడాయన. తన మంచితనంతో రాజకీయ ప్రత్యర్థులతోనూ అజాతశత్రువు అనిపించుకున్నారు. మధ్యప్రదేశ్ ​గ్వాలియర్​లో ఒక మధ్య తరగతి బ్రాహ్మణ కుటుంబంలో 1924 డిసెంబర్​ 25న వాజ్​పేయి జన్మించారు. గ్వాలియర్​లోనే ప్రాథమిక విద్య నుంచి గ్రాడ్యుయేషన్ వరకూ చదివారు. కాన్పూర్ లోని డీఏవీ కాలేజీలో పొలిటికల్ సైన్స్​లో పీజీ పూర్తి చేశారు. స్టూడెంట్​గా ఉన్నప్పట్టి నుంచే ఆర్యసమాజం భావాలకు ప్రభావితమయ్యారు. 1939లో అంటే తన 16వ ఏట ఆర్ఎస్ఎస్‌లో చేరారు. 1944లో ఆర్యకుమార్​సభ జనరల్​ సెక్రెటరీగా ఎన్నికయ్యారు. 1947లో ఆర్​ఎస్​ఎస్​ ప్రచారక్​గా మారారు. దేశ విభజన సందర్భంగా చెలరేగిన అల్లర్ల కారణంతో వాజ్​పేయి లా డిగ్రీని మధ్యలోనే ఆపేశారు. ఆ తర్వాత విస్తారక్​గా ఉత్తరప్రదేశ్​ వెళ్లారు. అక్కడ దీన్​దయాళ్​ ఉపాధ్యాయ నేతృత్వంలో నడుస్తున్న రాష్ట్రధర్మ(హిందీ మంత్లీ), పాంచజన్య(హిందీ వీక్లీ)తో పాటు స్వదేశ్, వీర్​ అర్జున్​ డైలీల్లోనూ పనిచేశారు. 1951లో కొత్తగా ఏర్పడిన జనసంఘ్ లో దీన్​దయాళ్​ ఉపాధ్యాయతో కలిసి చేరారు. జనసంఘ్ వ్యవస్థాపకుడు శ్యాంప్రసాద్ ముఖర్జీ ముఖ్య అనుచరునిగా ఎదిగారు. ఏ విషయంపైనైనా అనర్గళంగా మాట్లాడే సామర్థ్యం కలిగిన వాజ్​పేయి అనతికాలంలోనే సంఘ్​ ముఖ్య నాయకుల్లో ఒకరిగా మారారు. 1957లో తొలిసారి పార్లమెంటుకు.. 1957లో ఉత్తర ప్రదేశ్ లోని బలరాంపూర్ నియోజకవర్గం నుంచి తొలిసారి లోక్​సభకు ఎన్నికయ్యారు. 1974లో ఎమఋర్జెన్సీకి వ్యతిరేకంగా పోరాటం చేశారు. 1975లో ఇందిరాగాంధీ ప్రభుత్వం వాజ్​పేయిని అరెస్ట్ చేసి 1977 వరకు జైల్లో ఉంచింది. ‘‘చీకటి రాత్రి విసిరిన సవాల్ ఇది. కిరణమే చివరి అస్త్రం అవుతుంది”అని జైలు నుంచే తన కవిత్వంతో ప్రభుత్వానికి సవాల్ విసిరారు. 1980లో వాజ్​పేయి ప్రెసిడెంట్​గా భారతీయ జనతా పార్టీ ప్రాణం పోసుకుంది. ఈ రోజు ఆసేతు హిమాచలం అంత ఎత్తుకు బీజేపీ ఎదిగిందంటే దానికి దార్శనికుడు వాజ్​పేయే. రెండు సీట్లే రావడంతో బీజేపీ ఎప్పటికీ అధికారంలోకి రాదంటూ కాంగ్రెస్​ ఎంపీ పార్లమెంట్​లో చేసిన కామెంట్లపై వాజ్​పేయి ఘాటుగానే స్పందించారు. ‘‘ఇప్పుడు బీజేపీ భంగపడి ఉండొచ్చు. కానీ, భవిష్యత్​లో దేశమంతా కాషాయం విస్తరించే రోజు కచ్చితంగా వస్తుంది. ఆ రోజు కోసం ఎదురుచూస్తా”అని చెప్పడం ఆయన ముందు చూపుకు నిదర్శనం. ఆనాడు వాజపేయి చెప్పినట్టే ఈరోజు బీజేపీ దేశమంతటా విస్తరించగలిగింది. దేశాభివృద్ధికి విప్లవాత్మక కార్యక్రమాలు మూడుసార్లు ప్రధాని పదవిని చేపట్టిన వాజ్​పేయి దేశాభివృద్ధి కోసం ఎన్నో విప్లవాత్మక కార్యక్రమాలు చేపట్టారు. రహదారులతోనే దేశాభివృద్ధి పరుగులు పెడుతుందని గుర్తించి స్వర్ణ చతుర్భుజి పథకం ప్రారంభించారు. ఈశాన్య రాష్ట్రాల నుంచి గుజరాత్​ వరకు ఈస్ట్– వెస్ట్ కారిడార్ గా, కాశ్మీర్ నుంచి కన్యాకుమారి వరకు నార్త్-సౌత్ కారిడార్ గా దేశంలో వ్యవసాయపరంగా, పారిశ్రామికంగా, సాంస్కృతికంగా అభివృద్ధి చెందిన నగరాలను కలుపుతూ ఆరు వేల కిలోమీటర్ల వరకు హైవేలు నిర్మించారు. గ్రామీణ యువత పట్టణ ప్రాంతాలకు వెళ్లి చదువుకోవడానికి, ఉద్యోగావకాశాలు పొందడానికి ఈ పథకం ఎంతో ఉపయోగపడింది. అలాగే గ్రామీణ ప్రాంతంలో రైతులు పండించే వ్యవసాయ ఉత్పత్తులను పట్టణ ప్రాంతాలకు తీసుకెళ్లి అమ్ముకోవడానికి అవకాశం దక్కింది. అలాగే ప్రధానమంత్రి గ్రామ సడక్ యోజన ద్వారా మారుమూల ప్రాంతాలకు కూడా తారు రోడ్లు వేసి గ్రామీణ ప్రాంతాలను పట్టణ ప్రాంతాలతో అనుసంధానం చేశారు. మొబైల్​ విప్లవం అటల్​జీ చలవే వాజ్​పేయి ప్రధానిగా ‘‘ఆపరేషన్ శక్తి” పేరుతో పోక్రాన్ లో అణు పరీక్షలు నిర్వహించడం పెను సంచలనం సృష్టించింది. దీంతో అమెరికా, ఫ్రాన్స్, బ్రిటన్ దేశాలు మనపై ఆంక్షలు విధించాయి. దీంతో ఆర్థిక సంక్షోభం అంచుల వరకు చేరుకున్న దేశాన్ని తన పాలనా దక్షతతో గాడిన పెట్టారు. 2001లో వాజ్​పేయి ప్రభుత్వం సర్వ శిక్షా అభియాన్​ను ప్రారంభించింది. దీని ముఖ్య ఉద్దేశం అందరికీ ఉచిత, నిర్బంధ విద్యను కల్పించడం, ఆరేండ్ల నుంచి 14 ఏండ్లలోపు పిల్లలకు విద్యను ప్రాథమిక హక్కుగా చేయడం. దీని ద్వారా ఐదేండ్లలోనే స్కూల్ డ్రాప్ అవుట్ సంఖ్య 60 శాతానికి తగ్గింది. ప్రభుత్వాలు చేసే ఖర్చుల్లో నియంత్రణ తేవడానికి, ద్రవ్యలోటు తగ్గించడానికి 2003లో ఎఫ్​ఆర్​బీఎం చట్టం తెచ్చారు. ఈ చట్టం.. ప్రభుత్వ పొదుపును పెంచడమే కాక, ఆ నిధులను అభివృద్ధి పథకాలకు మళ్లించడానికి ఉపయోగపడింది. టెలికం రంగంతో ఆర్థికాభివృద్ధి ముడిపడి ఉందని కొత్త టెలికం విధానాన్ని తీసుకొచ్చారు. ప్రజల శ్రేయస్సే తన శ్రేయస్సుగా, దేశాభివృద్ధి, దేశ రక్షణ తన జీవిత లక్ష్యంగా భావించి ఆ దిశగా అడుగులు వేసి భవిష్యత్​ తరాలకు దారి చూపిన మహోన్నత వ్యక్తి వాజ్ పేయి. – ఎన్.రామచంద్రరావు ఎమ్మెల్సీ, బీజేపీ.