- భద్రాద్రి జిల్లాలో16 స్కూల్స్ ఎంపికైనా రెండింటిలోనే ఏర్పాటు
- కేంద్రానికి వివరాలు పంపించని ఆఫీసర్లు
- నష్టపోతున్న పేద విద్యార్థులు
భద్రాచలం, వెలుగు: పాఠశాల స్థాయిలోనే విద్యార్థులను శాస్త్రీయ ఆలోచనల వైపు మళ్లించాలనే ఉద్దేశంతో కేంద్రం ప్రవేశపెట్టిన అటల్ టింకరింగ్ ల్యాబ్ల ఏర్పాటు జిల్లాలో ముందుకెళ్లడం లేదు. భద్రాద్రి కొత్తగూడెం జిల్లాలో 16 హైస్కూళ్లకు ఈ ల్యాబ్లను మంజూరు చేస్తే 2 చోట్ల మాత్రమే ఏర్పాటు చేశారు. కేంద్రం అడిగిన డాక్యుమెంట్లు సకాలంలో అందించకపోవడం వల్ల మిగతా స్కూళ్లలో ల్యాబ్లు ఏర్పాటు కాలేదు. ఒక్కో ల్యాబ్కు కేంద్రం రూ.20 లక్షలు ఇస్తోంది. డాక్యుమెంట్లు ఇచ్చిన వెంటనే ఆ స్కూలులో రూ.10 లక్షలతో ఎలక్ట్రానిక్ డెవలప్మెంట్, రోబోటిక్స్, ఇంటర్నెట్ సెన్సార్లు, ప్రోటో టైపింగ్ పరికరాలు, మెకానికల్, ఎలక్ట్రానిక్ పరికరాలు, ల్యాబ్కు అవసరమైన అన్ని వస్తువులను సమకూర్చుతారు. మిగిలిన రూ.10 లక్షలు ఏడాదికి రూ.2లక్షలు చొప్పున ఐదేళ్లపాటు ల్యాబ్ నిర్వహణ, ల్యాబ్ మెంటర్ వేతనం కోసం ఇస్తారు. ల్యాబ్ ఏర్పాటు చేసిన తర్వాత రిపోర్టులు సకాలంలో కేంద్రానికి అందజేస్తే నిధులు వస్తాయి. కానీ ఇవేమీ పట్టనట్లు జిల్లా అధికారులు వ్యవహరిస్తున్నారనే ఆరోపణలున్నాయి.
ఎంపికైన పాఠశాలలు ఇవే..
భద్రాచలం, కిన్నెరసాని రెసిడెన్షియల్, మణుగూరు జడ్పీఎస్ఎస్, మణుగూరు కో ఎడ్యుకేషన్, మణుగూరు ఎక్స్లెంట్, ఉల్వనూరు ఆశ్రమ హైస్కూల్, మణుగూరు సింగరేణి, కొత్తగూడెం సింగరేణి, అశ్వారావుపేట జడ్పీఎస్ఎస్, ఇల్లందు సింగరేణి, ఇల్లందులోని చెన్నెంగులగడ్డ, ఉప్పుసాక ఆశ్రమ హైస్కూల్, దమ్మపేట, చండ్రుగొండ స్కూళ్లను ఎంపిక చేశారు. వీటిలో ఇల్లందు సింగరేణి, చండ్రుగొండ హైస్కూళ్లకు రూ.10లక్షల చొప్పున నిధులు రిలీజ్ చేసి ప్రయోగశాలలు ఏర్పాటు చేశారు. అయితే ప్రస్తుతం నిర్వహణ లోపం కారణంగా ఈ రెండు ల్యాబ్లు కూడా నిరుపయోగంగానే ఉన్నాయి. ఆన్లైన్లో కేంద్రం అడిగిన డాక్యుమెంట్లు ఇవ్వాల్సి ఉంటుంది. అలా చేస్తే ల్యాబ్ ఏర్పాటు నిధులు వస్తాయి. 1500 చదరపు అడుగుల విస్తీర్ణంలో ఖాళీ ప్రదేశం, 400 మందికి పైగా విద్యార్థులు ఉండాలి. కంప్యూటర్ ల్యాబ్, లైబ్రరీ, కరెంట్, ప్రయోగశాల, మ్యాథ్స్, సైన్స్ టీచర్లు తదితర అంశాలు కలిగి ఉండాలి.
త్వరలోనే ఏర్పాటు చేస్తాం
జిల్లాకు 16 అటల్టింకరింగ్ ల్యాబ్లు శాంక్షన్ అయ్యాయి. సెలెక్ట్ అయిన స్కూళ్లు తమ వివరాలు అన్నీ కేంద్రానికి నేరుగా ఆన్లైన్లో పంపాలి. అలా పంపినం. ఇదే విషయాన్ని అటల్ ఇన్నోవేషన్ మిషన్కు కూడా జిల్లా నుంచి రిపోర్టు చేసినం. వాళ్ల నుంచి క్లియరెన్స్ వస్తే ల్యాబ్లు ఏర్పాటు చేస్తం. – చలపతిరాజు, జిల్లా సైన్స్ ఆఫీసర్
