జైనూర్, వెలుగు: ఆదివాసీ మహిళపై అత్యాచారయత్నం చేసిన ఆటో డ్రైవర్,ఆమె అంగీకరించకపోవడంతో హత్యా యత్నానికి పాల్పడ్డాడు. నాలుగు రోజుల కింద జరిగిన ఈ ఘటనలో తీవ్రంగా గాయపడిన మహిళ.. మంగళవారం స్పృహలోకి వచ్చి స్టేట్మెంట్ ఇవ్వడంతో పోలీసులు నిందితుడిని అరెస్ట్చేశారు. ఈ ఘటనను నిరసిస్తూ 3 మండలాల ఆదివాసీ నాయకులు ధర్నా చేపట్టి నిందితుడిని ఉరి తీయాలని డిమాండ్ చేశారు. కేసుకు సంబంధించిన వివరాలను డీఎస్పీ సదయ్య వెల్లడించారు. జైనూర్ మండలం దేవుగూడ గ్రామానికి చెందిన ఓ ఆదివాసీ మహిళ ఈ నెల 1న సిర్పూర్(యు) మండలం సోయంగూడకు వెళ్లడానికి జైనూర్ లో ఆటో ఎక్కింది. ఆటో డ్రైవర్ మగ్దూమ్ రాగాపూర్దాటిన తర్వాత నిర్మానుష్య ప్రదేశంలో ఆమెపై అత్యాచారానికి యత్నించాడు. ఆమె అంగీకరించకపోవడంతో దాడి చేశాడు.
ముఖంపై బండరాయితో కొట్టడంతో బాధితురాలు తీవ్రంగా గాయపడింది. అనంతరం నిందితుడు పరారయ్యాడు. తీవ్ర గాయాలతో ఉన్న ఆమెను స్థానికులు ఆసుపత్రికి తరలించారు. అక్కడి నుంచి ట్రీట్మెంట్ కోసం హైదరాబాద్ కు రెఫర్ చేశారు. మొదట యాక్సిడెంట్గా కేసు నమోదు చేసుకున్న పోలీసులు.. మంగళవారం ఆమె స్పృహలోకి వచ్చి స్టేట్మెంట్ ఇవ్వడంతో అసలు విషయం బయటకు వచ్చింది. నిందితుడిని అరెస్ట్చేసి అత్యాచారయత్నం, హత్యాయత్నం, ఎస్సీ, ఎస్టీ అట్రాసిటీ కేసు ఫైల్ చేసినట్లు పోలీసులు తెలిపారు. ఇదిలాఉంటే ఆదివాసీ మహిళపై దాడికి పాల్పడిన మగ్దూమ్ ను ఉరి తీయాలని డిమాండ్ చేస్తూ ఆదివాసీ సంఘాల నేతలు జైనూర్ మెయిన్ రోడ్డుపై ధర్నాకు దిగ్గారు. ఈ ఘటనను నిరసిస్తూ బుధవారం ఏజెన్సీ బంద్కు పిలుపునిచ్చారు.
