గ్రూప్స్​ అభ్యర్థుల్లో పరీక్ష రాసింది సగమే

• గ్రూప్​ పరీక్షలపట్ల అభ్యర్థుల అనాసక్తి 
• గ్రూప్​1 కంటే తగ్గిన గ్రూప్ 2, 3 అటెండెన్స్​
• ఎగ్జామ్స్​ నిర్వహణ ఏర్పాట్లు వృథా

గ్రూప్ ఎగ్జామ్స్​రాయడానికి అప్లికేషన్​లు పెట్టడంలో నిరుద్యోగ యువత చూపుతున్న ఆసక్తి పరీక్ష రాసేటైంకు ఢీలా పడుతోంది. ఎగ్జామ్​ ఫీజు కట్టి హాల్​టికెట్​ పొందేవరకు ఉన్నఉత్సాహం జాబ్​ సాధించే వరకు ఉండటం లేదు.  అభ్యర్థుల సంఖ్యలకు అనుగుణంగా అధికారులు చేస్తున్న ఏర్పాట్లు వృథా అవుతున్నాయి. ఎగ్జామ్​సెంటర్ల కోసం జిల్లాలో స్కూల్స్​క్లోజ్​చేయడంతో సహా ఇన్విలిజేషన్​ సిబ్బంది నియామకం, వెహికల్స్, పోలీసుల డ్యూటీ అంతా వృథా అవుతోంది. 

నిజామాబాద్, వెలుగు: బీఆర్ఎస్​ ప్రభుత్వం 2022లో వివిధ జాబ్​నోటిఫికేషన్లు ఇచ్చి భర్తీలను పట్టించుకోలేదు.  ప్రస్తుత కాంగ్రెస్​ ప్రభుత్వం ఆ పోస్టులను భర్తీ చేయడానికి చర్యలు చేపట్టింది.  పోస్టులకు అనుగుణంగా నోటిఫికేషన్​లు ఇస్తూ  పరీక్షలు నిర్వహిస్తూ,  మెరిట్​ ఆధారంగా భర్తీ చేస్తోంది.  ఈనెల 15, 16 తేదీల్లో ప్రభుత్వం నిర్వహించిన   గ్రూప్-2 ఎగ్జామ్​కు 19,855 మంది అభ్యర్థులు దరఖాస్తు  చేశారు. 

వారికి హాల్​ టికెట్స్​కూడా జారీ చేశారు. అయితే ఫస్ట్​ పేపర్​కు 9,070 మంది, సెకండ్​పేపర్​కు 9,020, థర్డ్​పేపర్​కు 8,915,  నాలుగో పేపర్​కు 8,911 అభ్యర్థులు  మాత్రమే హాజరయ్యారు. అటెండెన్స్​45 శాతంగా నమోదైంది.  అభ్యర్థులు అధిక సంఖ్యలో ఉన్నందున స్కూల్స్ ను క్లోజ్​ చేసి 63 సెంటర్లు ఏర్పాటు చేశారు. 12 రూట్లు ఏర్పాటు చేసి, ఆఫీసర్లకు వెహికల్స్​అరెంజ్​ చేశారు. ఇద్దరు రీజనల్​ ఇన్విజిలేటర్లు, ​ 63 మంది చొప్పున ఇన్విజిలేటర్లు, సిట్టింగ్​స్క్వాడ్​ను వందలాది పోలీసుల బందోబస్తు మధ్య పరీక్షలు నిర్వహించారు.  ఇంత మంది  సిబ్బందితో నిర్వహించిన పరీక్షలకు అభ్యర్థులు  సగానికి పైగా రాయలేదు.  

గత నెల నవంబర్17, 18 తేదీలలో ​ గ్రూప్​-3 ఎగ్జామ్​ నిర్వహించారు.  దరఖాస్తు చేసుకున్న 19,941అభ్యర్థులు హాల్​టికెట్లు పొందారు. ఫస్ట్​ పేపర్​ పరీక్షకు 10,037 మంది అభ్యర్థులు, సెకండ్​ పేపర్​కు 9,992, థర్డ్​ పేపర్ వచ్చేసరికి 9,880 మంది మాత్రమే ఎగ్జామ్​ రాశారు.  సమగ్ర కుటుంబ సర్వే కొనసాగిస్తూనే ఆఫీసర్లు గ్రూప్​-3 పరీక్ష కోసం నిర్వహణకు స్టాఫ్​ను సర్దుబాటు  చేశారు.  
    
జూన్​ 9న నిర్వహించిన గ్రూప్​-1 ప్రిలిమ్స్​కు 12,833 మంది హాల్​ టికెట్లు పొంది 9,948 మంది అభ్యర్థులే హాజరయ్యారు. 2,888 మంది గైర్హాజరు​ కారణంగా వారి కోసం చేసిన ఏర్పాట్లు వేస్ట్​ అయ్యాయి. పార్లమెంట్​ ఎలక్షన్​ కౌంటింగ్​ ముగిసి ఈవీఎం బాక్స్​లను భద్రపర్చే టైంలో జరిగిన గ్రూప్​-1 పరీక్ష నిర్వహణను చాలెంజ్​గా తీసుకొని ఆఫీసర్లు ఏర్పాట్లు చేశారు. అప్పటికే రెండుసార్లు ప్రిలిమ్స్​రిజల్టు రద్దయినందున పకడ్బందీ నిర్వహించారు.  వేల సంఖ్యలో అప్లికేషన్​లు పెడుతున్న అభ్యర్థులు పరీక్ష రాసే టైం వచ్చేసరికి ఆసక్తి చూపకపోవడం చర్చనీయాంశమవుతోంది. 

ఉత్సాహంగా ప్రిపేర్​ అవుతున్న సమయంలో గత ప్రభుత్వం ఎగ్జామ్ నిర్వహణలో జాప్యం​చేయడంతో యువత  నిరుత్సాహానికి లోనైంది.   గ్రూప్​-1  ప్రిలిమ్స్​రిజల్ట్స్​ రెండుసార్లు రద్దు కావడంతో మరింత డీలాపడ్డారు. పరిణామాలను పక్కబెట్టి  సాధించే పట్టుదలతో ఉన్న అభ్యర్థులు మాత్రమే పరీక్షలు రాస్తున్నారు.  మరికొందరిలో ప్రిపరేషన్​తో పాటు సెల్ఫ్​ కాన్ఫిడెన్స్ లోపం కూడా ఎగ్జామ్స్​ దాకా వెళ్లనీయడంలేదు.