- కొత్తగూడెం పట్టణంలో నిరుపేదలకు ఒక్కొక్కరికీ 75 గజాల చొప్పున ఇండ్ల స్థలం కేటాయింపు
- 1,891 మంది నుంచి దరఖాస్తుల వస్తే 800 మంది సెలక్ట్
- ఆర్నెళ్ల కింద పట్టాల పంపిణీ.. ఆపై పట్టించుకోని ఆఫీసర్లు
- ఎదురుచూపుల్లో లబ్ధిదారులు.. క్యాన్సిల్ అవుతాయనే ప్రచారంతో ఆందోళన
భద్రాద్రికొత్తగూడెం, వెలుగు : కొత్తగూడెం పట్టణంలో అర్హులైన నిరు పేదలకు ఇండ్ల స్థలాలు ఇస్తామని గత ప్రభుత్వ హయాంలో అధికారులు పట్టాలిచ్చి ఇప్పటి వరకు హద్దులు చూపలేదు. ఆర్నెళ్లల్లో ఇండ్లు కట్టుకోకపోతే ఆ పట్టాలు క్యాన్సిల్ అవుతాయనే ప్రచారంతో లబ్ధిదారులు ఆందోళన చెందుతున్నారు. కొత్తగూడెంలో ఆర్నెళ్ల కింద నిరుపేదలు ఇండ్ల కోసం దరఖాస్తు చేసుకోవాలని కలెక్టర్తో పాటు తహసీల్దార్, అప్పటి ఎమ్మెల్యే ప్రజలకు సూచించారు.
దీంతో 1,891 మంది ఇండ్ల స్థలాల కోసం దరఖాస్తు చేసుకున్నారు. అందులో 800 మంది వరకు లబ్ధిదారులను గుర్తించారు. పాత కొత్తగూడెంలోని డబుల్ బెడ్ రూమ్ ఇండ్ల దగ్గర స్థలాలు ఇస్తామని చెప్పారు. వీరికి గతేడాది సెప్టెంబర్ 25న అప్పటి బీఆర్ఎస్ ఎమ్మెల్యే వనమా వెంకటేశ్వరరావు, మున్సిపల్ చైర్ పర్సన్ కే. సీతాలక్ష్మి, తహసీల్దార్, మున్సిపల్ కమిషనర్ సమక్షంలో ఇండ్ల స్థలాల పట్టాలు పంపిణీ చేశారు. కొద్ది రోజుల్లోనే వారికి హద్దులు చూపిస్తామని చెప్పారు. గృహలక్ష్మి స్కీం వచ్చేలా చూస్తామన్నారు.
రోడ్లు, డ్రైనేజీలు, కరెంట్స్తంభాలు, పార్క్లతో అద్భుతమై కాలనీ నిర్మిస్తామని గొప్పలు చెప్పడంతో లబ్ధిదారులు ఎగిరి గంతేశారు. కానీ నెలలు గడుస్తున్నా హద్దులు చూపకపోవడంతో వారిలో ఆందోళన పెరుగుతోంది. పేదలకు ఇచ్చిన ల్యాండ్కు సమీపంలోనే ప్రభుత్వ స్థలాన్ని కొందరు బీఆర్ఎస్ ప్రజాప్రతినిధులు ఆక్రమించుకునేందుకు యత్నించిన దాఖలాలున్నాయి.
ఆ స్థలాన్ని ఎప్పుడు.. ఎవరు కాజేస్తారోనని భయపడుతున్నారు. మరో వైపు తమకు పొజిషన్ సర్టిఫికెట్ ఇచ్చిన టైంలో ఆర్నెళ్ల లోపు ఇండ్లు కట్టుకోకపోతే స్థలాలను తిరిగి ప్రభుత్వం తీసుకుంటుందని ఆఫీసర్లు చెప్పడంతో లబ్ధిదారులు ఆందోళన చెందుతున్నారు. ఆఫీసర్ల నిర్లక్ష్యంతోనే ఇప్పటి వరకు హద్దులు చూపలేదని వారు ఆరోపిస్తున్నారు. ప్రస్తుత ఎమ్మెల్యే కూనంనేని సాంబశివరావు, కలెక్టర్ ప్రియాంక అల స్పందించి తమకిచ్చిన పొజిషన్ పట్టా ప్రకారం హద్దులు చూపించాలని కోరుతున్నారు.
హద్దులు చూపిస్తాం..
లబ్ధిదారులకు ఇచ్చిన ల్యాండ్ను మూడు బిట్లుగా చేశాం. ఒక బిట్లో హద్దులు వేశాం. మిగతా బిట్లలో హద్దులు గుర్తించాల్సి ఉంది. ఎవరూ ఆందోళన చెందవద్దు. త్వరలోనే హద్దులు చూపిస్తాం.
- పుల్లయ్య, తహసీల్దార్, కొత్తగూడెం
