త్వరలోనే ట్రిపుల్ ఆర్ ల్యాండ్ విలువ పెంపు

60 నుంచి 120 శాతం వరకూ పెంచేలా ప్రపోజల్స్
మండలాల పరిధిలో 60 నుంచి 80 శాతం
భువనగిరిలో 100 నుంచి 120 శాతం

యాదాద్రి, వెలుగు: రీజినల్ రింగ్ రోడ్డు (ట్రిపుల్ ఆర్) ఉత్తర భాగం కోసం భూములు కోల్పోనున్న రైతులకు కొంత ఊరట లభించే విధంగా ఆఫీసర్లు చర్యలు తీసుకుంటున్నారు. సీఎం రేవంత్ ఆదేశాల మేరకు రింగ్రోడ్డు కోసం సేకరించే భూముల విలువను పెంచే ప్రయత్నాలు కొలిక్కి వచ్చాయి. ఈ పరిధిలోని భూముల రిజిస్ట్రేషన్ విలువ 60 శాతం నుంచి 120 శాతం వరకూ పెంచేందుకు ఆఫీసర్లు ప్రపోజల్స్ రెడీ చేసి నేషనల్ హైవే అథారిటీకి పంపించారు.

భారత్మాల పరియోజన ఫేస్-1లో భాగంగా రీజినల్ రింగ్ రోడ్డు (ట్రిపుల్ ఆర్) ఉత్తర భాగం యాదాద్రి జిల్లా మీదుగా 59.33 కిలోమీటర్లు రానుంది. జిల్లాలోని తుర్కపల్లి, యాదగిరిగుట్ట, భువనగిరి, వలిగొండ, చౌటుప్పల్ మండలాల్లో 1927 ఎకరాలను సేకరించాల్సి ఉంది. దీని కోసం గతంలోనే కొంత భూమికి త్రీ ఏ, త్రీ డీ నోటిఫికేషన్లతో పాటు త్రీ జీ గెజిట్ నోటిఫికేషన్ విడుదల చేశారు. ఉత్తర, దక్షిణ రింగ్ రోడ్డును కలపడానికి చౌటుప్పల్లో అదనంగా సేకరించే భూమికి సంబంధించి త్రీ ఏ నోటిఫికేషన్ జారీ చేశారు. త్రీ డీ నోటిఫికేషన్ జారీ చేయడానికి రంగం సిద్దం చేస్తున్నారు. అయితే భూ సేకరణను వ్యతిరేకిస్తూ భువనగిరి మున్సిపాలిటీలోని రాయగిరి రైతులు హైకోర్టును ఆశ్రయించడంతో స్టే విధించింది.

రిజిస్ట్రేషన్ విలువ ఇలా..

రింగ్ రోడ్డు కోసం భూములు కోల్పోతున్న రైతులకు 'అవార్డు' మంచిగా ఇచ్చే విధంగా చర్యలు తీసుకోవాలని సీఎం రేవంత్ రెడ్డి ఆదేశించిన సంగతి తెలిసిందే. దీంతో రిజిస్ట్రేషన్ విలువ పెంపుపై యాదాద్రి ఆఫీసర్లు రెగ్యులర్గా కసరత్తు నిర్వహించారు. సేకరించే భూమి ప్రస్తుత రిజిస్ట్రేషన్ విలువను సబ్ రిజిస్టార్ల నుంచి తీసుకున్నారు. ఏ ఏ సర్వే నెంబర్ల భూమి నేషనల్, స్టేట్ హైవేలతో పంచాయతీ రోడ్ల పక్కన ఉన్నాయో వివరాలను సేకరించారు. అర్బన్ కమర్షియల్, రూరల్, రూరల్ కమర్షియల్ విభాగాలుగా భూములను విభజించారు.

వెంచర్లలోని ప్లాట్లకు సంబంధించిన వివరాలను విడిగా ప్రస్తావించారు. దీంతో పాటు బహిరంగ మార్కెట్లో ఆ భూములు విలువ ఎంత ఉందో వివరాలు సేకరించారు. తుర్కపల్లి, యాదగిరిగుట్ట మండలాల్లో ఎకరానికి రూరల్, కమర్షియల్ విభాగాల్లో రూ. 3.50 లక్షల నుంచి రూ. 4 లక్షల వరకూ విలువ ఉంది. భువనగిరి మున్సిపాలిటీ పరిధిలోని రాయగిరి, మండలం పరిధిలోని గ్రామాల్లో అర్బన్, కమర్షియల్ విభాగాల్లో రూ. 7 లక్షల నుంచి రూ. 30 లక్షల వరకు ఉంది. వలిగొండలో రూరల్, కమర్షియల్ పరిధిలో రూ. 12 లక్షల వరకూ ధర ఉంది. చౌటుప్పల్లోనూ అర్బన్, రూరల్, కమర్షియల్ పరిధిలో రూ. 7 లక్షల నుంచి రూ. 21 లక్షల వరకూ ఉంది. ఇండ్ల స్థలాలకు రూ. 800 నుంచి 3100 వరకూ రిజిస్ట్రేషన్ విలువ ఉంది.

ప్రపోజల్స్ ఓకే అయితే

భూమి విలువ పెంపు ప్రపోజల్స్ను నేషనల్ హైవే అథారిటీ యాథావిధిగా ఓకే చేసినా, మార్పులు చేర్పులు చేసినా వ్యాల్యూ మాత్రం పెరిగే అవకాశం ఉంది. రిజిస్ట్రేషన్ వ్యాల్యూ పెరిగిన తర్వాత ఖరారు చేసిన రేటు ప్రకారం రూరల్ ఏరియాలో మూడు రెట్లు, అర్బన్ ఏరియాలో రెండు రెట్లు అవార్డు అందిస్తారు. తుర్కపల్లి పరిధిలో ఎకరానికి ప్రస్తుతం రూ. 3.50 లక్షలు ఉంది. ప్రపోజల్స్ ప్రకారం విలువ పెరిగితే రూ. 5 లక్షల నుంచి రూ. 6 లక్షల వరకూ పెరిగే అవకాశం ఉంది. యాదగిరిగుట్టలో ఎకరానికి రూ. 4 లక్షలు ఉంది. ప్రపోజల్స్ ప్రకారం పెరిగితే రూ. 7 లక్షల నుంచి రూ. 8 లక్షల వరకూ చేరుతుంది. వలిగొండలో రూ. 12 లక్షలు ఉండగా, విలువ పెరిగిన పక్షంలో అది రూ. 20లక్షల వరకూ చేరుతుంది. చౌటుప్పల్ పరిధిలో రూ. 7 లక్షల నుంచి రూ. 21 లక్షలు ఉంది. ప్రపోజల్స్ ప్రకారం పెంచితే ఎకరానికి రూ. 13 లక్షల నుంచి రూ. 30 లక్షల వరకూ చేరుతుంది. భువనగిరి పరిధిలో రూ. 7 లక్షల నుంచి రూ. 30 లక్షల వరకూ ఉంది.

రూపొందించిన ప్రపోజల్స్ ప్రకారం రూ. 14 లక్షల నుంచి రూ. 60 లక్షలకు పైగా పెరుగుతుంది. ఇండ్ల స్థలాలు గజానికి రూ. 800 నుంచి రూ. 3100 ఉంది. ప్రపోజల్స్ ప్రకారం పెరిగితే రూ. 1500 నుంచి రూ. 6200 వరకూ చేరుతుంది. రిజిస్ట్రేషన్ వ్యాల్యూ పెంపు ప్రతిపాదనలుభూ సేకరణ జరిగే ప్రాంతాల్లో భూమికి ఇంటి స్థలాల రిజిస్ట్రేషన్ వ్యాల్యూ సేకరించిన ఆఫీసర్లు సంబంధించి డేటా రూపొందించినట్టు తెలుస్తోంది. రిజిస్ట్రేషన్ వ్యాల్యూ పెంపుపై కసరత్తు నిర్వహించిన ఆఫీసర్లు ప్రతిపాదనలు రూపొందించారు.

దీంతో రూరల్ ఏరియాల్లో భూమి ఉన్న ఏరియా బట్టి 60 నుంచి 80 శాతం పెంచాలని ప్రపోజల్స్ రూపొందించారు. అర్బన్ ఏరియాల్లో 80 శాతం లేదా ఎకరానికి రూ. 10 లక్షల వరకూ పెంచాలని ప్రపోజల్స్ రూపొందించారు. వీటిని నేషనల్ హైవే అథారిటీకి పంపించారు. భువనగిరి పరిధిలోని రాయగిరి రైతులు హైకోర్టును ఆశ్రయించడంతో స్టే విధించిన సంగతి తెలిసిందే. దీంతో ఈ పరిధిలోని భూముల రిజిస్ట్రేషన్ విలువను వంద నుంచి 120 శాతం పెంచాలని ప్రపోజల్స్ రూపొందించినప్పటికీ.. వాటిని నేషనల్ హైవే అథారిటీ పంపలేదని తెలుస్తోంది.