న్యూఢిల్లీ: భారతీయ ఆటో మార్కెట్ అమ్మకాలు గత నెల కొద్దిగా పెరిగాయి. కొన్ని కంపెనీల సేల్స్ మాత్రం నిరాశపర్చాయి. మారుతి సుజుకి మార్చి 2024 లో 1,87,196 యూనిట్లను అమ్మగా, మార్చి 2025 లో మొత్తం 1,92,984 యూనిట్ల అమ్మకాలను సాధించింది. ఏడాది లెక్కన సేల్స్ మూడు శాతం పెరిగాయి. 2025 ఆర్థిక సంవత్సరంలో మారుతి సుజుకి 22,34,266 యూనిట్లను విక్రయించింది.
మహీంద్రా అండ్ మహీంద్రా బలమైన వృద్ధిని కనబర్చింది. దీని అమ్మకాలు ఏడాది లెక్కన 68,413 యూనిట్ల నుంచి 23 శాతం పెరిగి 83,894 యూనిట్లకు చేరాయి. దేశీయ యుటిలిటీ వెహికల్ మార్కెట్‌‌లో మహీంద్రా 48,048 బండ్లను విక్రయించింది. ఈ సెగ్మెంట్ అమ్మకాలు 18శాతం పెరిగాయి. టీవీఎస్ మోటార్స్ గత మార్చిలో 3,54,592 యూనిట్లను అమ్మగా, ఈసారి ఇవి 17 శాతం పెరిగి 4,14,687 యూనిట్లకు చేరుకున్నాయి.
టాటా మోటార్స్ సేల్స్ 90,822 యూనిట్ల నుంచి 90,500 యూనిట్లకు తగ్గాయి. ఐషర్ మోటార్స్ గత మార్చిలో 75,551 బైకులను అమ్మగా, ఈసారి మార్చిలో 1,01,021 యూనిట్లను అమ్మింది. ఏడాది ప్రాతిపదికన అమ్మకాల్లో 34శాతం పెరుగుదల కనిపించింది. హ్యుందాయ్ మార్చి 2025 లో 67,320 యూనిట్లు అమ్మింది. ఓలా ఎలక్ట్రిక్ 2025 ఆర్థిక సంవత్సరం లో 3,44,005 యూనిట్లను అమ్మింది.
