హైదరాబాద్: నిత్యం వాహనాలతో రద్దీగా ఉండే కూకట్పల్లి వివేకానంద నగర్ జాతీయ రహదారిపై ట్రాలీ ఆటో బీభత్సం సృష్టించింది. మద్యం మత్తులో ముందున్న రెండు కార్లు, ఓ బైకును ఢీకొట్టాడు ఆటో డ్రైవర్. ఈ ఘటనలో ముగ్గురు స్వల్పంగా గాయపడ్డారు. ఆటో డ్రైవర్ మద్యం మత్తులో ఉండటంతోనే ఈ ప్రమాదం జరిగినట్లు గుర్తించిన వాహనదారులు.. ఆగ్రహానికి గురై డ్రైవర్ను చితకబాదారు. సమాచారం అందుకున్న పోలీసులు ఘటన స్థలానికి చేరుకుని ఆటో డ్రైవర్ను అదుపులోకి తీసుకున్నారు.
ఘటన స్థలాన్ని పరిశీలించి.. ప్రమాదానికి గల కారణాలపై ఆరా తీశారు. జాతీయ రహదారిపై ఆటో బీభత్సం సృష్టించడంతో కూకట్పల్లిలో భారీగా ట్రాఫిక్ జామ్ ఏర్పడింది. కిలో మీటర్ మేర వాహనాలు ఎక్కడికక్కడే నిలిచిపోయాయి. అసలే ఆఫీసులు ముగిసి ఇంటికి వెళ్లే టైమ్ కావడంతో ఉద్యోగులు, ప్రయాణికులు ట్రాఫిక్లో చిక్కుకుని ఇబ్బంది పడ్డారు. వెంటనే అప్రమత్తమైన ట్రాఫిక్ పోలీసులు.. వాహనాల రద్దీని క్లియర్ చేశారు. కాగా, ఈ ఘటనకు సంబంధించిన పూర్తి వివరాలు తెలియాల్సి ఉంది.
►ALSO READ | ఆర్మీకోసం విరాళాలు అంటూ సోషల్ మీడియాలో పోస్టులు..తెలంగాణ పోలీస్ కీలక ప్రకటన
