జిల్లాలో ఆయుష్ సేవలు పూర్తి స్థాయిలో అందడం లేదు. ఆయుర్వేద, హోమియో, నేచరోపతి ట్రీట్మెంట్ కు ఆదరణ పెరుగుతున్నప్పటికీ వైద్యులు, ఫార్మసిస్ట్, సిబ్బంది పోస్టులు ఖాళీగా ఉండడంతో వైద్యం అందని పరిస్థితి ఉంది. పోస్టుల భర్తీపై రాష్ట్ర ప్రభుత్వం నిర్లక్ష్యంగా వ్యవహరించడం వల్ల ఆయుష్ వైద్యం జనానికి అందడం లేదు.
ఖాళీలే ఎక్కువ
జిల్లాలో 30 ఆయుష్ హాస్పిటల్స్ ఉన్నాయి. 16 ఆయుర్వేద, 7 హోమియో, 6 యునానీ, ఒక నేచరోపతి హాస్పిటల్ ఉన్నాయి. వీటిల్లో 13 రెగ్యులర్ డాక్టర్లు, ఫార్మసిస్ట్లు, వైద్య సిబ్బందితో నడుస్తుండగా, 17హాస్పిటల్స్ కాంట్రాక్ట్ పద్ధతిలో నడుస్తున్నాయి. 13 రెగ్యులర్ హాస్పిటల్స్లలో ఐదుగురు డాక్టర్లు ఉండగా, ఎనిమిది పోస్టులు ఖాళీగా ఉన్నాయి. , ఐదుగురు కాంపౌండర్లు పని చేస్తుండగా, 8 పోస్టులు ఖాళీగా ఉన్నాయి. 11మంది అటెండర్లు పని చేస్తుండగా, మూడు పోస్టులు ఖాళీగా ఉన్నాయి. మిగిలిన 17 హాస్పిటల్స్ లో ఏడుగురు కాంట్రాక్ట్ డాక్టర్లే పని చేస్తుండగా, 10 పోస్టులు ఖాళీగా ఉన్నాయి. 17 మంది కాంపౌడర్లకు గాను 10 పోస్టులు ఖాళీగా ఉన్నాయి. చుంచుపల్లి, ఆర్. కొత్తగూడెం, జగన్నాథపురం, మణుగూరు, రొంపేడ్ ఆయుర్వేద ఆసుపత్రుల్లో మెడికల్ ఆఫీసర్తో పాటు ఫార్మాసిస్ట్ పోస్టులు ఖాళీగా ఉండడంతో రోగులను చూసే వారే లేరు. ఇల్లందు, చర్ల, పర్ణశాల, అశ్వారావుపేట హోమియో ఆసుపత్రుల్లో డాక్టర్లు, సిబ్బంది పోస్టులన్నీ ఖాళీగా ఉండడంతో ఆ దవాఖానాలను తెరవడమే లేదు.
ఆదరణ ఉన్నా పర్యవేక్షణ కరువు
భద్రాచలం, చండ్రుగొండ హోమియో ఆసుపత్రులకు జిల్లాలోని పలు ప్రాంతాల నుంచి ట్రీట్మెంట్ కోసం రోగులు పెద్ద సంఖ్యలో వస్తున్నారు. కొవిడ్ తరువాత ఆయుర్వేద వైద్యానికి డిమాండ్ పెరిగింది. దీర్ఘకాలిక రోగులు హోమియో వైపు దృష్టి పెడుతున్నారు. అయితే జిల్లాలోని ఆయుర్వేద, హోమియో హాస్పిటల్స్కు డాక్టర్లు, వైద్య సిబ్బంది అవసరం మేర లేకపోవడంతో రోగులు ప్రైవేటు దవాఖానాలను ఆశ్రయిస్తున్నారు. ఆయుష్ ఆసుపత్రులను వరంగల్ ఆర్జేడీ కార్యాలయం నుంచేపర్యవేక్షిస్తుంటారు. దీంతో జిల్లాలోని కొందరు డాక్టర్లు విధులు సక్రమంగా నిర్వహించడం లేదనే ఆరోపణలున్నాయి. ఇటీవల జరిగిన జడ్పీ స్టాండింగ్ కమిటీ సమావేశాల్లో ఆయుష్ హాస్పిటల్స్ పనితీరుపై జడ్పీ చైర్మన్ కోరం కనకయ్యతో పాటు పలువురు జడ్పీటీసీలు అసంతృప్తి వ్యక్తం చేశారు.
హాస్పిటల్ తెరిపించాలి
నేను, నా భార్య దీర్ఘకాలిక వ్యాధులతో బాధ పడుతున్నాం. ఖమ్మంలోని ప్రైవేట్ హోమియో హాస్పిటల్కు పోతే డాక్టర్ ఫీజు, మందులకు కలిపి రూ.1,500 పైగా ఖర్చు అయింది. ఇల్లందులోని హోమియో హాస్పిటల్ తెరవట్లేదు. ప్రైవేటుకు పోలేక భద్రాచలం గవర్నమెంట్ హోమియో హాస్పిటల్కు వెళ్లి ట్రీట్మెంట్ తీసుకుంటున్నాను. ఇల్లందు హోమియో హాస్పిటల్ను తెరిపించాలి.
- వేణుగోపాల్, ఇల్లందు
