రాంపూర్: ఫేక్ బర్త్ సర్టిఫికెట్ల కేసులో ఉత్తరప్రదేశ్కు చెందిన సమాజ్‌‌వాదీ పార్టీ నాయకుడు ఆజం ఖాన్, అతని భార్య తజీన్ ఫాతిమా, కొడుకు అబ్దుల్లా ఆజంకు ఏడేండ్ల జైలు శిక్ష పడింది. అబ్దుల్లా ఆజంకు రెండు బర్త్సర్టిఫికెట్లు ఉన్నాయని.. ఒకటి లక్నో నుంచి, మరొకటి రాంపూర్ నుంచి తీసుకున్నారని బీజేపీ ఎమ్మెల్యే ఆకాశ్ సక్సేనా ఆరోపించారు. ఫేక్సర్టిఫికెట్లు పొందడంలో తమ కుమారుడికి ఆజం ఖాన్ అతని భార్య సహాయం చేశారని పేర్కొంటూ జనవరి 3, 2019న రాంపూర్‌‌లోని గంజ్ పోలీస్ స్టేషన్‌‌లో ఆయన ఫిర్యాదు చేశారు.
దీనిపై ఎంక్వైరీ చేసిన పోలీసులు.. లక్నోలో తీసుకున్న సర్టిఫికెట్లో అబ్దుల్లా ఆజం పుట్టిన తేదీ సెప్టెంబర్ 30, 1990 అని ఉందని, రాంపూర్ మున్సిపాలిటీ జారీ చేసిన సర్టిఫికెట్లో జనవరి 1, 1993 అని ఉన్నట్టు చార్జ్షీట్లో పేర్కొన్నారు. విచారణ అనంతరం యూపీలోని ఎంపీ, ఎమ్మెల్యే కోర్టు మెజిస్ట్రేట్ షోబిత్ బన్సాల్ ముగ్గురికి ఏడేండ్ల శిక్ష విధిస్తూ తీర్పు చెప్పారు. కోర్టు తీర్పు తర్వాత, ఆ ముగ్గురినీ జ్యుడీషియల్ కస్టడీకి తీసుకున్నారని, వారిని కోర్టు నుంచే జైలుకు తరలిస్తారని ప్రాసిక్యూషన్ తరపున వాదించిన మాజీ జిల్లా ప్రభుత్వ అడ్వొకేట్ అరుణ్ ప్రకాశ్ సక్సేనా తెలిపారు.
ఇదిలా ఉండగా.. అబ్దుల్లా ఆజం 2022 అసెంబ్లీ ఎన్నికల్లో సువార్ నియోజకవర్గం నుంచి ఎస్పీ టికెట్‌‌పై గెలిచాడు. 2008లో ప్రభుత్వ ఉద్యోగిని నిర్బంధించి, దాడికి పాల్పడిన కేసులో ఈ ఏడాది ఫిబ్రవరిలో మొరాదాబాద్ కోర్టు దోషిగా నిర్ధారించి రెండేండ్ల జైలు శిక్ష విధించింది. శిక్ష పడిన రెండ్రోజుల తర్వాత అతడుఉత్తరప్రదేశ్ అసెంబ్లీకి అనర్హుడయ్యాడు.
