నాగర్ కర్నూల్ టౌన్, వెలుగు: వేరుశనగ పంటకు గిట్టుబాటు ధర అందించేందుకు కృషి చేస్తామని వ్యవసాయ శాఖ డిప్యూటీ డైరెక్టర్ బి సింగారెడ్డి తెలిపారు. బుధవారం నాగర్ కర్నూల్ మార్కెట్ యార్డును సందర్శించారు. ఈ సందర్భంగా రైతులు, వ్యాపారులు, కమీషన్ ఏజెంట్లతో సమావేశం నిర్వహించారు. ఈ సందర్భంగా ఆయన మాట్లాడుతూ వేరుశనగ క్రయ విక్రయాలు, ధరలపై రైతులకు అవగాహన కల్పించారు. ప్రస్తుతం మార్కెట్లో క్వింటాల్కు రూ.7 వేలు ఉందని, అంతకన్నా తక్కువ ధర చెల్లిస్తే మార్కెట్ అధికారులు వ్యాపారితో చర్చించి రైతుకు మేలు చేసేలా చర్యలు తీసుకోవాలని ఆదేశించారు. మట్టి, తాలు లేకుండా, పల్లిని ఎండబెట్టి మార్కెట్కు తీసుకురావాలని రైతులకు సూచించారు. డిప్యూటీ డైరెక్టర్ పద్మ హర్ష, జిల్లా మార్కెటింగ్ ఆఫీసర్ బాలామణి, రమేశ్ పాల్గొన్నారు.
జడ్చర్ల టౌన్: రైతులు మార్కెట్కు తెస్తున్న పంట దిగుబడులకు ఇస్తున్న రేట్లను మార్కెటింగ్ జాయింట్ డైరెక్టర్ శ్రీనివాసులు పరిశీలించారు. బుధవారం జడ్చర్ల వ్యవసాయ మార్కెట్ను సందర్శించిన ఆయన యార్డులోని షెడ్లలో వేరుశనగను పరిశీలించి, రైతులతో మాట్లాడారు. సరైన ధర ఇవ్వడం లేదని పలు మార్కెట్లలోరైతులు ఆందోళన చేయడంతో, మార్కెట్ను పరిశీలించి రైతులకు ఇస్తున్న ధరలపై ఉన్నతాధికారలకు రిపోర్ట్ ఇవ్వనున్నట్లు సమాచారం.
