ధర్పల్లి, వెలుగు: బాల్యవివాహాలు సామాజిక దురాచారమని, వీటి వల్ల బాలల విద్య, రక్షణ, ఆరోగ్యం, అభివృద్ధి, భవిష్యత్తుపై ప్రభావం పడుతుందని తహసీల్దారు మాలతి అన్నారు. ధర్పల్లి కస్తూర్బాగాంధీ స్కూల్లో బుధవారం ''బాల్ వివాహ్ ముక్త్ భారత్'' కార్యక్రమాన్ని వివిధ శాఖల సమన్వయంతో ఐసీడీఎస్ ఆధ్వర్యంలో నిర్వహించారు. ఈ సందర్భంగా ఆమె మాట్లాడుతూ బాల్యవివాహాలను అడ్డుకోవాలన్నారు.
బాలలకు చట్టంలో సమానత్వం ఉందని గుర్తుంచుకోవాలని అన్నారు. రాజకీయంగా, ఆర్థికంగా, సామాజికంగా చైతన్యం రావాలని, మహిళలు తమని తాము తక్కువగా అంచనా వేసుకోవద్దని సూచించారు. కార్యక్రమంలో ఎంపీడీఓ బాలకృష్ణ, ఎస్ఐ రామకృష్ణ, మెడికల్ ఆఫీసర్ డాక్టర్ మౌనిక, ప్రిన్సిపాల్ సుమలత పాల్గొన్నారు.
బోధన్, వెలుగు: బాల్య వివాహాలు చేస్తే పిల్లలు అనారోగ్యానికి గురవుతారని జిల్లా మహిళా సాధికారత కేంద్రం సమన్వయ కర్త పి.స్వప్న అన్నారు. బుధవారం బోధన్ లోని రాకాసిపేట్ ప్రభుత్వ ఉన్నత పాఠశాలలో బాల్యవివాహాలపై అవగాహన కార్యక్రమం నిర్వహించారు. ఈ సందర్భంగా ఆమె మాట్లాడుతూ.. ఆడపిల్లలు చిన్న వయస్సులో గర్భవతులు కావడంతో తీవ్ర అనారోగ్యానికి గురవుతారన్నారు.
ఎవరైనా బాల్యవివాహాలు జరిపితే సమాచారం అందించాలన్నారు. అనంతరం విద్యార్థులతో ర్యాలీ నిర్వహించి, స్కూల్ ఆవరణలో మానవహారం నిర్మించారు. కార్యక్రమంలో ఐసీడీఎస్ సూపర్వైజర్లు గోపిలక్ష్మి, ఆసియా బేగం, హెడ్మాస్టర్ బాలచందర్, అంగన్వాడీ టీచర్లు పాల్గొన్నారు.
ఎడపల్లి , వెలుగు: బోధన్ ఐసీడీఎస్ ఆధ్వర్యంలో ఎడపల్లి బాలికల గురుకుల పాఠశాలలో బుధవారం బాల్యవివాహాలు, సైబర్ నేరాలు, పోక్సోచట్టాలు, సెల్ఫోన్లు దుర్వినియోగంపై అవగాహన కార్యక్రమం నిర్వహించారు. ఈ సందర్భంగా తహసీల్దార్ దన్వాల్ మాట్లాడుతూ.. చట్ట ప్రకారం బాల్య వివాహాలు చేయడం నేరమన్నారు. బాల్య వివాహం చేస్తే రెండేళ్ల జైలుశిక్ష, రూ. లక్ష జరిమానా విధిస్తారన్నారు.
అనంతరం బాల్య వివాహాలకు వ్యతిరేకంగా విద్యార్థినులతో ప్రతిజ్ఞ చేయించారు. అనంతరం ''బాల్ వివాహ్ ముక్త్ భారత్'' ర్యాలీ నిర్వహించారు. కార్యక్రమంలో ఎస్ఐ వంశీకృష్ణా రెడ్డి, ఐసీడీఎస్ సూపర్వైజర్ విజయరాణి, చైల్డ్ హెల్ప్ లైన్ సూపర్ వైజర్ సాయి కిరణ్, ప్రన్సిపాల్గంగా శంకర్, అంగన్ వాడీ టీచర్స్ తదితరులు పాల్గొన్నారు.
