చరిత్ర సృష్టించిన బాబర్ అజామ్.. అత్యంత విజయవంతమైన కెప్టెన్‌గా రికార్డు

డబ్లిన్‌ వేదికగా ఐర్లాండ్‌తో జరిగిన రెండో టీ20లో బాబర్ అజామ్ నేతృత్వంలోని పాకిస్థాన్ విజయం సాధించింది. మొదట బ్యాటింగ్ చేసిన ఐర్లాండ్ నిర్ణీత ఓవర్లలో 7 వికెట్ల నష్టానికి 193 పరుగులు చేసింది. లోర్కన్ టెక్టర్(34 బంతుల్లో 5 ఫోర్లు, 2 సిక్స్‌లతో 51) హాఫ్ సెంచరీ చేయగా.. గరెత్ డెలనీ(28 నాటౌట్; 10 బంతుల్లో 3 ఫోర్లు, 2 సిక్స్‌లు) మెరుపులు మెరిపించాడు. అనంతరం 194 పరుగుల లక్ష్యాన్ని పాక్.. 16.5 ఓవర్లలోనే ఛేదించింది. మహమ్మద్ రిజ్వాన్(75 నాటౌట్; 46 బంతుల్లో 6 ఫోర్లు, 4 సిక్స్‌లు), ఫకర్ జమాన్(78; 40 బంతుల్లో 6 ఫోర్లు, 6 సిక్స్‌లు) హాఫ్ సెంచరీలు చేశారు. దీంతో మూడు మ్యాచ్‌ల సిరీస్‌ను పాక్.. 1-1తో సమం చేసింది.

ఈ విజయంతో బాబర్ అజామ్ అత్యంత విజయవంతమైన కెప్టెన్‌గా రెకార్డుల్లోకెక్కాడు. అంతర్జాతీయ టీ20లలో కెప్టెన్‌గా బాబర్‌కి 45వ విజయం. ఈ ఫార్మాట్‌లో ఏ కెప్టెన్‌కైనా ఇదే అత్యధికం. ఇంగ్లాండ్‌ మాజీ సారథి ఇయాన్ మోర్గాన్, ఉగాండా మాజీ కెప్టెన్ బ్రియాన్ మసాబాలను అధిగమించి బాబర్ ఈ రికార్డు సాధించాడు. ఈ జాబితాలో రోహిత్ శర్మ ఐదో స్థానంలో ఉండగా.. ఎంఎస్ ధోని ఆరో స్థానంలో ఉన్నారు.