కొల్లాపూర్(నాగర్ కర్నూల్), వెలుగు: డాక్టర్లు లేకపోవడంతో నర్సులు కాన్పు చేయడానికి ప్రయత్నించడంతో శిశువు చనిపోయిందని నాగర్ కర్నూల్ జిల్లా కొల్లాపూర్ మండలం రామాపురం మాత శిశు ఆరోగ్య కేంద్రం ముందు శనివారం బంధువులు ఆందోళన చేశారు.
వివరాలిలా ఉన్నాయి. ఎన్మన్బెట్ల గ్రామానికి చెందిన అనిత అనే గర్భిణిని డెలివరీ కోసం తీసుకొచ్చారు. ఇద్దరు డాక్టర్లు డ్యూటీలో లేకపోవడంతో నర్సులు కాన్పు చేశారని, వారికి అవగాహన లేకపోవడంతో శిశువు చనిపోయిందని తల్లిదండ్రులు ఆరోపిస్తున్నారు.
ఆస్పత్రికి వస్తే ఎవరూ పట్టించుకోలేదన్నారు. రెఫర్ చేసినా వేరే ఆస్పత్రికి వెళ్లే వాళ్లమన్నారు. శిశువు మృతికి కారణమైన నర్సులపై చర్యలు తీసుకోవాలని డిమాండ్ చేశారు.
