మంచిర్యాల, వెలుగు: నవంబర్ 30న జరగనున్న అసెంబ్లీ ఎన్నికల పోలింగ్లో ప్రజలు తమ ఓటు హక్కును నిర్భయంగా వినియోగించుకోవాలని మంచిర్యాల జిల్లా ఎన్నికల అధికారి, కలెక్టర్ బదావత్ సంతోష్ అన్నారు. అసెంబ్లీ ఎన్నికల నేపథ్యంలో ప్రజల్లో భరోసా కల్పించేందుకు రామగుండం పోలీస్ కమిషనర్ రెమా రాజేశ్వరి, డీసీపీ సుధీర్ రాంనాథ్ కేకన్ కలిసి సీఆర్పీఎఫ్, పోలీసు బలగాలతో మంగళవారం సాయంత్రం మంచిర్యాలలో ఫ్లాగ్మార్చ్నిర్వహించారు.
ఐబీ చౌరస్తాలో ప్రారంభించి వెంకటేశ్వర థియేటర్, మార్కెట్ రోడ్, బెల్లంపల్లి చౌరస్తా, బస్టాండ్ మీదుగా జడ్పీ బాయ్స్ హైస్కూల్ వరకు ఫ్లాగ్మార్చ్ కొనసాగించారు. ఈ సందర్భంగా కలెక్టర్ మాట్లాడుతూ.. ప్రజలు నిర్భయంగా ఓటు హక్కును వినియోగించుకునేలా సీఆర్పీఎఫ్, పోలీసు సిబ్బందితో భద్రత కల్పిస్తున్నామన్నారు. సీపీ రెమా రాజేశ్వరి మాట్లాడుతూ ఇప్పటివరకు రామగుండం కమిషనరేట్ పరిధిలో 5 కేంద్ర బలగాలు వచ్చాయని, ఇందులో మహిళా బలగాలు కూడా ఉన్నాయని తెలిపారు. ఎన్నికల సందర్భంగా ఎలాంటి అవాంఛనీయ సంఘటనలు జరగకుండా బందోబస్తు ఏర్పాటు చేస్తున్నామని చెప్పారు.
