హైదరాబాద్: టాలీవుడ్లో విషాదం నెలకొంది. బలగం చిత్రంలో నటించిన ప్రముఖ జానపద కళాకారుడు మొగిలయ్య కన్నుమూశారు. గత కొంత కాలంగా తీవ్ర అనారోగ్యంతో బాధపడుతోన్న ఆయన.. 2024, డిసెంబర్ 19వ తేదీ గురువారం తెల్లవారుజూమున ఆరోగ్యం మరింత విషమించడంతో తుదిశ్వాస విడిచారు. మొగిలయ్య మృతి పట్ల పలువురు సంతాపం వ్యక్తం చేస్తున్నారు.
తెలంగాణ గ్రామీణ నేపథ్యంలో కమెడియన్ వేణు దర్శకత్వంలో తెరకెక్కిన బలగం సినిమా సూపర్ హిట్గా నిలిచిన విషయం తెలిసిందే. ఎలాంటి అంచనాలు లేకుండా వచ్చిన ఈ మూవీ ఇండస్ట్రీని షేక్ చేసింది. ప్రస్తుత ఉరుకుల పరుగుల జీవితంలో మర్చిపోయిన మానవ సంబంధాలను ఈ సినిమా ద్వారా వేణు అద్భుతంగా చూపించడంతో బలగం సినిమాకు ప్రజలు బాగా కనెక్ట్ అయ్యారు.
ఇక, బలగం మూవీలో ‘తోడుగా మాతోడుండి నీడగా మాతో నడిచి.. నువ్వెక్కడికెళ్లినావు కొమురయ్యా’ అంటూ సినిమాలో క్లైమాక్స్పాటతో అందరినీ కన్నీరు పెట్టించాడు బుడిగె జంగాల కళాకారుడు పస్తం మొగిలయ్య. వరంగల్‍ జిల్లా దుగ్గొండి మండల కేంద్రానికి మొగిలయ్యకు ఈ పాత్ర మంచి గుర్తింపు తెచ్చింది. బలగం మూవీతో ఫేమ్ సంపాదించుకున్న మొగిలయ్యను అనారోగ్యం వెంటాడింది. ప్రపంచాన్ని గడగడలాడించిన కరోనా బారిన పడటం, ఇతర అనారోగ్య కారణాలతో మొగిలయ్య తీవ్ర అస్వస్థతకు గురి అయ్యారు.
పేదింటికి చెందిన మొగిలియ్యను గత బీఆర్ఎస్, ప్రస్తుత కాంగ్రెస్ ప్రభుత్వం ఆర్థికంగా ఆదుకున్నాయి. మొగిలయ్యకు ప్రభుత్వ సంక్షేమ పథకాలు ఇవ్వడంతో పాటు మెరుగైన వైద్యం అందించాలని వైద్యులను ఆదేశించాయి. ఈ క్రమంలో గత కొంతకాలంగా ట్రీట్మెంట్ తీసుకుంటున్న మొగిలయ్య.. ఆరోగ్యం విషమించడంతో గురువారం (డిసెంబర్ 19) కన్నుమూశాడు. మొగిలయ్య మరణవార్త తెలుసుకున్న పలువురు సినీ, రాజకీయ ప్రముఖులు సంతాపం వ్యక్తం చేశారు.
