కూకట్పల్లి, వెలుగు : ఏపీ నుంచి సిటీకి గంజాయి తెచ్చి అమ్ముతున్న నలుగురు సాఫ్ట్వేర్ఉద్యోగులను బాలానగర్ ఎస్ఓటీ పోలీసులు అరెస్ట్ చేశారు. కేపీహెచ్బీ పోలీసుల వివరాల ప్రకారం... రాజమండ్రికి చెందిన తోరటి రాజేశ్(24), తంగిరాల రమేశ్(27), జంపని సాయిగోపి విహారి(26), నక్కా నాగవంశీ(23) కేపీహెచ్బీలోని హాస్టల్లో ఉంటున్నారు. వీరు నలుగురూ సాఫ్ట్వేర్ ఉద్యోగులుగా చేస్తున్నారు. జల్సాలకు అలవాటు పడి, గంజాయి తెచ్చి అమ్ముతున్నారు. పక్కా సమాచారంతో గురువారం మధ్యాహ్నం బాలానగర్ ఎస్ఓటీ పోలీసులు కేపీహెచ్బీకాలనీ ఐదో ఫేజ్ డిమార్ట్ పక్కన ఉన్న గ్రౌండ్ వద్ద నిఘా పెట్టారు.
కొద్దిసేపటి తర్వాత అక్కడకు వచ్చిన నలుగురు యువకులను అదుపులోకి తీసుకున్నారు. వారి నుంచి ఒక కవర్ స్వాధీనం చేసుకున్నారు. అందులో డ్రై గంజాయి ఉన్నట్టు గుర్తించారు. నలుగురు నిందితులను ప్రశ్నించగా తాము కొంతకాలంగా రాజమండ్రి ప్రాంతం నుంచి గంజాయి తీసుకువచ్చి నగరంలో విక్రయిస్తున్నట్టు అంగీకరించారు. నిందితులను ఎస్ఓటీ పోలీసులు కేపీహెచ్బీ పోలీసులకు అప్పగించారు. పోలీసులు నిందితులను అరెస్టు చేసి రిమాండ్కు తరలించారు. వీరి నుంచి 1300 గ్రాముల డ్రై గంజాయిని, నాలుగు సెల్ఫోన్లను స్వాధీనం చేసుకున్నారు.
