హైదరాబాద్ సిటీ, వెలుగు: వచ్చే నెల 1న బల్దియా కౌన్సిల్ సమావేశం జరగనుంది. ఇందులో 2025–26 ఆర్థిక సంవత్సరానికి సంబంధించి స్టాండింగ్ కమిటీ ఆమోదించిన రూ.8,440 కోట్ల బడ్జెట్పై చర్చించనున్నారు. ఇప్పటికే కార్పొరేటర్ల నుంచి అధికారులు ప్రశ్నలను సేకరించారు. కౌన్సిల్ ఏర్పడి నాలుగేండ్లు కావస్తుండడంతో ప్రజలకు ఇచ్చిన హామీలు ఎంత మేరకు అమలయ్యాయనే దాంతో పాటు అభివృద్ధి, సమస్యలు, చేసిన పనులపై చర్చకు కార్పొరేటర్లు పట్టుబట్టే అవకాశమున్నట్టు సమాచారం.
బడ్జెట్ను ఇప్పటికే స్టాండింగ్ కమిటీ సభ్యులు ఒకసారి తిరస్కరించిన తర్వాత ఆమోదం తెలిపారు. బీఆర్ఎస్ నుంచి గెలిచిన మేయర్ గద్వాల్ విజయలక్ష్మి.. కాంగ్రెస్ ప్రభుత్వం ఏర్పడిన తర్వాత అధికార పార్టీలో చేరారు. స్టాండింగ్ కమిటీ మెంబర్స్ కూడా ప్రస్తుతం బీఆర్ఎస్, ఎంఐఎంకి చెందినవారే ఉండడంతో మేయర్ కు మద్దతుగా ఎవరూ లేరు.దీంతో బడ్జెట్కు వెంటనే ఆమోదం లభించలేదు. ఇదే విధంగా కౌన్సిల్ లోనూ బడ్జెట్కు ఆమోదం లభిస్తుందా? లేదా అన్నదానిపై ఉత్కంఠ నెలకొంది. గ్రేటర్ లో 150 మంది కార్పొరేటర్లుండగా, కాంగ్రెస్ నుంచి ముగ్గురు మాత్రమే గెలుపొందారు. వివిధ పార్టీలోంచి చేరిన కార్పొరేటర్లతో కలిపి ఆ పార్టీ బలం 24కు చేరింది.
