నిజాంషుగర్స్ భూముల రిజిస్ట్రేషన్లపై నిషేధం ఇంకెన్నాళ్లు?
ధరణిలో క్లియర్ గా ఉంది..
స్లాట్ కూడా బుకవుతోంది.. కానీ రిజిస్ట్రేషన్లు బంద్ పెట్టిన ఆఫీసర్లు
నిజామాబాద్, వెలుగు: ధరణిలో క్లియర్గా ఉంది.. స్లాట్కూడా బుక్అవుతోంది.. కానీ రిజిస్ట్రేషన్లు చేయడంలేదు.. నిజాంషుగర్స్కు చెందిన అగ్రికల్చర్ల్యాండ్స్ పరిస్థితి ఇది. గతంలో కార్పొరేషన్ఇచ్చిన భూములు అనే ఒకే ఒక్క కారణంతో 9వేల ఎకరాల పట్టాభూములపై నిజామాబాద్ జిల్లా ఆఫీసర్లు అప్రకటిత నిషేధం అమలుచేస్తున్నారు. ఫలితంగా భూముల అమ్మకాలు, కొనుగోళ్లు ఆగిపోయి రైతులు తీవ్ర ఇబ్బందులు పడ్తున్నారు. విషయం తెలియక ఇప్పటికే భూములు అమ్మి అడ్వాన్స్లు తీసుకున్నవాళ్లు వాటిని పిల్లల చదువులు, పెళ్లిళ్లు, ఇతర అవసరాలకు మళ్లించారు. ఆ మొత్తాన్ని వెనక్కి ఇవ్వలేక, కొన్నవారికి రిజిస్ట్రేషన్ చేయించలేక నరకం అనుభవిస్తున్నారు.
ఇదీ జరిగింది..
బోధన్లోని నిజాంషుగర్స్లో చక్కెర ఉత్పత్తికి కావల్సిన ముడిసరుకు చెరకును సొంతగా సాగు చేయడానికి నిజాం ప్రభువు మిల్లు చుట్టూ సుమారు 30 కిలోమీటర్ల పరిధిలో 16,395 ఎకరాల భూమి సేకరించారు. అప్పట్లో కేవలం చెరుకు పండించడానికే ఈ భూమిని ఉపయోగించేవారు. పంట సాగు పర్యవేక్షణకు కోటగిరి, బోధన్, ఎడపల్లి, రెంజల్ మండలాల్లో 11 ఫారాలను పాలనా కేంద్రాలుగా ఏర్పాటు చేసి అధికారులు, ఉద్యోగులను నియమించారు. సాగు నష్టాలు పెరగడంతో 1996 నుంచి 2002 వరకు పలు విడతల్లో భూముల అమ్మకం ప్రారంభించారు. రైతులు వేలం పాటలో 6 వేల ఎకరాల దాకా కొనుగోలు చేశారు. ప్రభుత్వ ఆదేశాలతో యాజమాన్యం మరో 9 వేల ఎకరాలను ఎస్సీ, ఎస్టీ, బీసీ, మైనారిటీ కార్పొరేషన్లకు విక్రయించింది.
పూర్తిస్థాయిలో యాజమాన్య హక్కులు
ప్రభుత్వ కార్పొరేషన్లు కొనుగోలు చేసిన నిజాం షుగర్స్ భూములను ఫారాలలోని ఆయా సామాజిక వర్గాలకు కుటుంబానికి ఎకరం చొప్పున పంపిణీ చేశారు. అప్పటి మార్కెట్ ధర ప్రకారం ఎకరానికి రూ.20 వేలు నిర్ణయించి లబ్ధిదారుల కంట్రిబ్యూషన్ కింద రూ.5 వేలు తీసుకొని, మిగిలిన రూ.15 వేలను ఏడాదికి కొంత చొప్పున కిస్తీ రూపంలో చెల్లించాలని సూచించారు. ఈ క్రమంలో ఆయా లబ్ధిదారులకు రిజిస్ట్రేషన్లు కూడా చేసి పూర్తి స్థాయి యాజమాన్య హక్కు కల్పించారు. 2006–-07లో అప్పటి కేంద్ర ప్రభుత్వం రైతులకు రుణమాఫీ చేసింది. దీంతో నిజాంషుగర్స్ భూములను కార్పొరేషన్ల ద్వారా పొందిన లబ్దిదారుల రుణాలు పూర్తిగా మాఫీ అయ్యి, పూర్తిస్థాయి యజమానులయ్యారు.
అమ్మకాలు..కొనుగోళ్లు
పూర్తిస్థాయి యాజమాన్య హక్కులు రావడంతో రైతులు తమ అవసరాల కోసం భూములను అమ్మడం, కొనడం చేశారు. రిజిస్ట్రేషన్ శాఖ రిజిస్ట్రేషన్లు చేయగా, రెవెన్యూ అధికారులు మ్యూటేషన్లు చేసి పట్టాదారు పాస్బుక్లు అందిస్తూ వచ్చారు. ఈ లావాదేవీలకు ఆమోదం ఉందని ప్రభుత్వ న్యాయవాదులు (జీపీ)కూడా రెవెన్యూ శాఖకు లిఖితపూర్వకంగా స్పష్టత ఇచ్చారు. ఈక్రమంలో ఒక్కో సర్వేనంబర్పై పదేసి రిజిస్ట్రేషన్లు కూడా జరిగాయి. కానీ ధరణి వచ్చాక కొత్త చిక్కులు సృష్టించారు.
రిజిస్ట్రేషన్లు బంద్..
ధరణిలో స్లాట్ బుక్ అవుతున్నా రెవెన్యూ అధికారులు రిజిస్ట్రేషన్లు మాత్రం చేయడంలేదు. భూమిని అమ్మినవాళ్లు తాము తీసుకున్న అడ్వాన్సులను వేరే అవసరాలకు వాడుకున్నారు. తీరా ఇప్పుడు రిజిస్ట్రేషన్లు కాకపోవడంతో కొన్నవాళ్లకు రిటర్న్ చేయలేకపోతున్నారు. ఎడపల్లి మండలంలో ఒక వ్యక్తి నాలుగు ఎకరాలను రూ.కోటి 80 లక్షలకు కొనుగోలు చేసి అందులో సగం డబ్బును అడ్వాన్సుగా ఏడాది కింద అందజేశాడు. కానీ భూమి రిజిస్ర్టేషన్ కాకపోవడంతో అడ్వాన్స్తిరిగి ఇమ్మని అడిగినా అమ్మిన వ్యక్తి ఇవ్వలేని పరిస్థితి. ఇక జిల్లా కేంద్రానికి చెందిన ఒక డాక్టర్ రూ.40 లక్షలకు ఎకరం ఒప్పందంతో భూమి కొనుగోలు చేసి రిజిస్ట్రేషన్ కోసం చూస్తున్నారు. కూతురు పెళ్లి కోసం ఈ భూమిని పట్టాదారు విక్రయించాడు. ఇలాంటి కేసులు వందల్లో ఉన్నాయి.
వారం పది రోజుల్లో క్లారిటీ
ఈ ఇష్యూ గురించి గవర్నమెంటుకు లెటర్ రాశామని పది రోజుల్లో స్పష్టత వస్తుందని కలెక్టర్ రాజీవ్గాంధీ హన్మంతు ఇటీవల జడ్పీ మీటింగ్లో సభ్యుల ప్రశ్నకు సమాధానంగా చెప్పారు. ఈ భూములు అసైన్మెంట్ కిందికి రాకపోయినా కొన్ని అనుమానాల రీత్యా క్లారిటీ కోరామన్నారు.
- కలెక్టర్ రాజీవ్గాంధీ హన్మంతు
