సత్తుపల్లి, వెలుగు : ఎమ్మెల్యే సండ్రకు అండగా తానున్నానని, సత్తుపల్లి నియోజకవర్గ అభివృద్ధికి ప్రభుత్వ నిధులు లభించకపోతే తన సొంత నిధులతో అభివృద్ధి పనులు చేస్తానని ఎంపీ, హెటిరో డ్రగ్స్ అధినేత డాక్టర్ బండి పార్థసారథి రెడ్డి హామీ ఇచ్చారు. సత్తుపల్లిలో మినీ ఐటీ టవర్ నిర్మిస్తానని చెప్పారు. ఆదివారం సాయిస్ఫూర్తి ఇంజనీరింగ్ కళాశాలలో ఏర్పాటు చేసిన విలేకరుల సమావేశంలో ఆయన మాట్లాడారు.
తాను ఉపాధి పొందుతూ పదిమందికి ఉపాధి కల్పించాలనే సంకల్పంతోనే ఈ స్థాయికి వచ్చానని తెలిపారు. స్నేహితులు, శ్రేయోభిలాషులతో కలిసి సామాజిక స్పృహతో సేవా కార్యక్రమాలు ప్రారంభించానన్నారు. ప్రభుత్వం స్థలమిస్తే కన్వెన్షన్ హాల్ నిర్మాణం చేపడతానని, ఇప్పటికే రూ.4 కోట్లతో సత్తుపల్లిలో లైబ్రరీ నిర్మించానని తెలిపారు. మరోసారి సండ్రను భారీ మెజార్టీతో గెలిపించాలని కోరారు.
