కేసీఆర్ సగం మందికి టికెట్లు ఎగ్గొడుతడు: బండి సంజయ్

బీఆర్ఎస్ అభ్యర్థుల జాబితా వెనక సీఎం మాస్టర్ ప్లాన్ ఉంది
బీజేపీలో చేరుతరనే భయంతోనే హడావుడిగా ప్రకటించిండు
అధికారంలోకి వచ్చేందుకు మళ్లా దొంగ హామీలిస్తడు
చంద్ర మండలంలో కూడా మూడెకరాలిస్తనంటడని విమర్శ

కరీంనగర్, వెలుగు: బీఆర్ఎస్ అభ్యర్థుల జాబితా ప్రకటన వెనక కేసీఆర్ మాస్టర్ ప్లాన్ ఉందని బీజేపీ జాతీయ ప్రధాన కార్యదర్శి, ఎంపీ బండి సంజయ్ అన్నారు. తీరా ఎన్నికల నోటిఫికేషన్ వచ్చే సమయానికి అందులో సగం మందికి టికెట్లు ఇవ్వకుండా ఎగ్గొడుతారని ఆరోపించారు. సిట్టింగ్ ఎమ్మెల్యేలంతా 30 శాతం కమీషన్లు తీసుకుంటున్నారని కేసీఆరే చెప్పారని, మళ్లీ వారినే బీఆర్ఎస్ అభ్యర్థులుగా ప్రకటించడం విడ్డూరంగా ఉందని అన్నారు. శ్రావణ శుక్రవారం వరలక్ష్మి వ్రతం పర్వదినం సందర్భంగా ఇతర రాష్ట్రాల నుంచి వచ్చిన ప్రవాసీ ఎమ్మెల్యేలతో కలిసి బండి సంజయ్ కరీంనగర్లోని మహాశక్తి ఆలయాన్ని సందర్శించి ప్రత్యేక పూజలు నిర్వహించారు. అనంతరం సంజయ్ మీడియాతో మాట్లాడారు. సిట్టింగ్ ఎమ్మెల్యేల్లో చాలా మంది బీజేపీలో చేరేందుకు సిద్ధమయ్యారని తెలుసుకున్న కేసీఆర్.. దానిని అడ్డుకునేందుకు హడావుడిగా అందరికీ టికెట్లు ఇస్తున్నట్లు ప్రకటిస్తూ అభ్యర్థుల జాబితాను రిలీజ్చేశారని చెప్పారు. ముఖ్యమంత్రి కేసీఆర్ మళ్లీ అధికారంలోకి వచ్చేందుకు ఎన్ని దొంగ హామీలైనా ఇస్తారని, చంద్రయాన్ 3 విజయవంతమైన నేపథ్యంలో బీఆర్ఎస్ను గెలిపిస్తే ఒక్కో కుటుంబానికి చంద్రమండలంలో కూడా 3 ఎకరాల భూమి ఇస్తానని హామీ ఇచ్చినా ఆశ్చర్యపోనక్కర్లేదని ఎద్దేవా చేశారు.

కాంగ్రెస్ అభ్యర్థులకు కేసీఆర్ పైసలిచ్చిండు

30 మంది కాంగ్రెస్ ఎమ్మెల్యే అభ్యర్థులకు కేసీఆర్ ముందుగానే డబ్బులిచ్చారని సంజయ్ ఆరోపించారు. గెలిచాక వాళ్లను కూడా బీఆర్ఎస్లోకి తీసుకుని ప్రభుత్వాన్ని ఏర్పాటు చేయాలన్నదే కేసీఆర్ ఎత్తుగడ అన్నారు. ఈసారి వినాయక చవితి పండుగకు కూడా పైసలిచ్చి తమవైపు తిప్పుకోవాలని కేసీఆర్ ప్లాన్ చేశారని ఆరోపించారు. ప్రతి అసెంబ్లీ నియోజకవర్గానికి ఉత్సవాల పేరుతో పెద్ద ఎత్తున డబ్బులు పంపారని పేర్కొన్నారు. ‘కేసీఆర్ బిడ్డకు టిక్కెట్ ఇస్తే మహిళా రిజర్వేషన్లకు న్యాయం జరిగినట్లేనా? 33 శాతం రిజర్వేషన్లు అమలైనట్లేనా?’ అని సంజయ్ ప్రశ్నించారు. కేసీఆర్ బిడ్డే దీనికి సమాధానం చెప్పాలని డిమాండ్ చేశారు. ఆయనను కలిసిన ప్రవాసీ ఎమ్మెల్యేల్లో కర్నాటక, తమిళనాడు, యూపీ, అసోంకి చెందిన ఎమ్మెల్యేలు సీకే రామస్వామి, బస్వరాజ్, ధర్మేశ్వర్ కోన్వర్, దిగంత కలిత, మునిరాజ్, శశాంక్ త్రివేది, హేమంత తగురియా ఉన్నారు.