కరీంనగర్, వెలుగు: రాష్ట్రంలో తాము అధికారంలోకి వచ్చాక హైదరాబాద్లో సర్దార్ వల్లభాయ్ పటేల్ విగ్రహాన్ని పెట్టితీరుతామని కేంద్ర హోం శాఖ సహాయ మంత్రి బండి సంజయ్తెలిపారు. ‘‘పిడెకెడు మంది ఉన్న దరిద్రపు పార్టీ ఎంఐఎంకు భయపడేది జాతీయ పార్టీ అవుతుందా? ఉద్యమ పార్టీ అవుతుందా?’’ అని కాంగ్రెస్, బీఆర్ఎస్పై మండిపడ్డారు. తాము బిల్లు పెడితేనే తెలంగాణ వచ్చిందని చెప్పుకుంటున్న పార్టీలు తెలంగాణ విమోచనం కోసం జరిగిన పోరాటాలను నేటితరానికి తెలియజేయకపోవడం బాధాకరమని అన్నారు.
తెలంగాణ విమోచన దినోత్సవాల నేపథ్యంలో బుధవారం కరీంనగర్ లోని టీఎన్జీవోస్ భవన్ కల్యాణ మండపంలో కేంద్ర సమాచార ప్రసార మంత్రిత్వ శాఖ ఆధ్వర్యంలో ఏర్పాటు చేసిన 'ఫొటో ఎగ్జిబిషన్'ను బండి సంజయ్ ప్రారంభించారు. ఈ సందర్భంగా ఆయన మాట్లాడుతూ.. రజాకార్ల వారసత్వ పార్టీ ఎంఐఎంకు భయపడి ప్రస్తుత కాంగ్రెస్ సర్కారు, గత బీఆర్ఎస్ ప్రభుత్వం తెలంగాణ విమోచన దినోత్సవాన్ని అధికారికంగా జరపకపోవడం సిగ్గుచేటని పేర్కొన్నారు.
ఈ కార్యక్రమంలో ఏర్పాటు చేసిన అరుదైన చిత్రాలు 3 రోజులపాటు అందుబాటులో ఉంటాయని తెలిపారు. కాగా, కరీంనగర్ ఐటీఐ కాలేజీలో తొలిసారిగా అగ్ మెంటెడ్ రియాలిటీ, వీడియో వర్చువల్ రియాలిటీ పద్ధతిలో వివిధ కోర్సులకు సంబంధించి బోధన ప్రారంభమైంది. ఈ ల్యాబ్ ను బండి సంజయ్ప్రారంభించారు.
