బ్యాన్ చేసిన చైనా యాప్‎లు మళ్లీ భారత్‎లోకి ఎంట్రీ.. ఈ సారి మామూలు ప్లాన్ కాదుగా..!

న్యూఢిల్లీ: దేశ భద్రతా కారణాల దృష్ట్యా పొరుగు దేశం చైనాకు చెందిన వివిధ యాప్‎లపై భారత్ నిషేదం విధించిన విషయం తెలిసిందే. యువతను ఎంతో ఆకట్టుకున్న పబ్జీ, టిక్ టాక్ వంటి ప్రముఖ యాప్‎లను ఇండియాలో బ్యాన్ చేసింది కేంద్ర ప్రభుత్వం. అయితే.. భారత్ నిషేదం విధించిన చైనా యాప్‎లు కొన్ని మళ్లీ దేశంలోకి రీ ఎంట్రీ ఇచ్చాయి. దాదాపు 36 యాప్‎లు గూగుల్ ప్లే స్టోర్, ఆపిల్ స్టోర్లలో యూజర్లకు అందుబాటులోకి వచ్చాయి. భారత్ బ్యాన్ చేసిన చైనా యాప్‎లు సెలెంట్‎గా మళ్లీ ఇండియా మార్కెట్లోకి రావడం చర్చనీయాంశంగా మారింది.

అయితే.. ఈ యాప్‎ల రీ ఎంట్రీకి కారణం భారత్, చైనా దేశాల మధ్య ఇటీవల దౌత్య సంబంధాలు మెరుగుపడటమేనని తెలుస్తోంది. 2020లో గాల్వన్ వ్యాలీ ఘర్షణతో భారత్, చైనా మధ్య దౌత్య సంబంధాలు పూర్తిగా దెబ్బతిన్న విషయం తెలిసిందే. ఈ నేపథ్యంలో దేశ భద్రతను దృష్టిలో పెట్టుకుని చైనాకు చెందిన పలు యాప్‎లను భారత్ నిషేదించింది.

2020లో గాల్వన్ వ్యాలీ ఘర్షణ తర్వాత భారత ప్రభుత్వం యూసీ బ్రౌజర్, షీన్, టిక్‌టాక్‌తో సహా 59 చైనీస్ యాప్‌లపై బ్యాన్ విధించింది. ఆ తరువాత 2022లో పబ్జీ, గరెనా ఫ్రీ ఫైర్ వంటి యాప్‌లపైన కొరడా ఝులిపించింది. ఇలా మొత్తంగా దాదాపు 200 చైనీస్ యాప్‌లపై భారత్ నిషేదం విధించింది. ఇటీవల న్యూఢిల్లీ, బీజింగ్ మధ్య సంబంధాలు కాస్త మెరుగుపడటంతో ఈ యాప్‎లు తిరిగి భారత్‎ మార్కెట్లోకి వచ్చినట్లు తెలుస్తోంది.

Also Read :- థియేటర్/ ఓటీటీల్లో రిలీజ్ కానున్న సినిమాలు

ప్రస్తుతం చైనాకు చెందిన 36 యాప్‎లు ఐవోఎస్, ఆండ్రాయిడ్ యూజర్లకు అందుబాటులో ఉన్నాయి. అయితే.. భారత్‎లోకి రీ ఎంట్రీ ఇచ్చిన చైనా యాప్‎లు కొన్ని భారతీయ కంపెనీల భాగస్వామ్యంతో రాగా.. ఇంకొన్ని కొత్త పేర్లతో మార్కెట్లోకి ఎంటర్ అయ్యాయి. ఎలాగంటే.. చైనాకు చెందిన ప్రముఖ ఫ్యాషన్ బ్రాండ్ షీన్.. రిలయన్స్‌తో కలిసి భారత మార్కెట్‌లోకి రీ ఎంట్రీ ఇచ్చింది.