-
మా సమస్యలను వీసీ పట్టించుకుంటలే
-
ఎస్సీ, ఎస్టీ కమిషన్ ముందు బాసర ట్రిపుల్ ఐటీ స్టూడెంట్ల గోడు
-
వీసీ వెంకటరమణ క్యాంపస్లో ఉంటలే
-
నాణ్యమైన భోజనం అందిస్తలే.. సరిపోయే ఫ్యాకల్టీ లేదు
-
చీఫ్ వార్డెన్ శ్రీధర్ను, వీసీని తొలగించాలని ఫిర్యాదు
భైంసా/బాసర, వెలుగు: బాసర ట్రిపుల్ ఐటీ చీఫ్ వార్డెన్ శ్రీధర్ లైంగిక వేధింపులకు పాల్పడుతున్నారని స్టూడెంట్స్ఆవేదన వ్యక్తం చేశారు. ఆయన మీద ఇప్పటికే వీసీ వెంకటరమణకు చాలాసార్లు ఫిర్యాదు చేశామని, అయినా పట్టించుకోవడం లేదని వాపోయారు. రాష్ట్ర ఎస్సీ, ఎస్టీ కమిషన్ చైర్మన్ బక్కి వెంకటయ్య, సభ్యులు శుక్రవారం బాసర ట్రిపుల్ఐటీని సందర్శించారు. అడ్మినిస్ట్రేటివ్ బిల్డింగ్ కాన్ఫరెన్స్హాల్లో స్టూడెంట్లతో విడివిడిగా మాట్లాడారు. చీఫ్ వార్డెన్ లైంగిక వేధింపులకు పాల్పడుతున్నారని, వర్సిటీ సమస్యలను వీసీ పట్టించుకోవడం లేదని తెలిపారు. దాదాపు 2 గంటల పాటు విద్యార్థులు చెప్పిన విషయాలను విన్న చైర్మన్ వెంకటయ్య.. వాటిని రికార్డు చేయించారు. విచారణ జరిపి చర్యలు తీసుకుంటామని హామీ ఇచ్చారు.
క్యాంపస్లో వీసీ ఉంటలే
వీసీ వెంకటరమణ క్యాంపస్లో ఉండడంలేదని, హైదరాబాద్లోనే ఉంటున్నారని, దీంతో సమస్యలను ఆలకించే నాథుడు లేకుండా పోయారని విద్యార్థులు ఆవేదన వెలిబుచ్చారు. మెస్ కాంట్రాక్టర్లను మార్చి మళ్లీ టెండర్లు నిర్వహించాలని కోరు తున్నప్పటికీ.. పాత ఏజెన్సీలనే వీసీ కొనసాగిస్తున్నారని, ఈ ఏజెన్సీలు నాణ్యమైన భోజనం అందించడం లేదని ఎస్సీ, ఎస్టీ కమిషన్ చైర్మన్ దృష్టికి తెచ్చారు. వీసీ పర్యవేక్షణ కొరవడిందని, ప్రొఫెసర్లతో పాటు అనేక పోస్టులు ఖాళీలు ఏండ్ల తరబడి ఖాళీగా ఉన్నాయన్నారు. ప్రశ్నించే స్టూడెంట్లను క్రమశిక్షణ పేరుతో వేధిస్తున్నారని వాపోయారు. వెంకటరమణను వెంటనే వీసీ పదవి నుంచి తప్పించాలని, చీఫ్ వార్డెన్ శ్రీధర్ను విధుల నుంచి తొలగించాలని విద్యార్థులు డిమాండ్ చేశారు.
6 వేల మందికి నలుగురే కేర్ టేకర్లా?: వెంకటయ్య
బాసర ట్రిపుల్ఐటీలో దాదాపు 6 వేల మంది విద్యార్థులుండగా.. కేవలం నలుగురు కేర్ టేకర్లు ఉండడం పట్ల ఎస్సీ, ఎస్టీ కమిషన్ చైర్మన్ బక్కి వెంకటయ్య సీరియస్ అయ్యారు. విద్యార్థుల విషయంలో అధికారులు ఎందుకు నిర్లక్ష్యంగా వ్యవహరిస్తున్నారని ఆయన మండిపడ్డారు. వెంటనే స్టూడెంట్ల సంఖ్యకు తగ్గట్టు కేర్ టేకర్లను నియమించాలని ఆదేశించారు. ఎస్సీ, ఎస్టీ కమిషన్ వస్తున్నట్టు తెలిసినా చీఫ్ వార్డెన్ శ్రీధర్ అక్కడికి రాలేదు.
