ఆఫీసర్లు, సొసైటీ చైర్మన్లు కలిసి రైతులను ముంచిన్రు

అధికారుల విచారణ లో వెలుగులోకి అక్రమాలు
గుర్రంపోడు, నాంపల్లి, మర్రిగూడలో వడ్ల పైసల్లో భారీ కోత
ఒక్క గుర్రంపోడు పరిధిలోనే రూ.18 లక్షల నష్టం
బోగస్ సెంటర్లు నడిపించిన ఆఫీసర్లు

నల్గొండ, వెలుగు : జిల్లాలోని పలు ప్రాథమిక వ్యవసాయ సహకార పరపతి సంఘాలు (పీఏసీఎస్లు) రైతులను నట్టేట ముంచాయి. యాసంగి వడ్ల కొనుగోళ్ల వ్యవహారంలో సొసైటీ అధికారులు, చైర్మన్లు కలిసి రైతులను మోసం చేశారు. రైతులకు చెప్పకుండా ఇష్టంవచ్చినట్లు తరుగు పేరుతో భారీ కోత పెట్టారు. పర్మి షన్ లేకుండానే బోగస్ సెంటర్లు ఓపెన్ చేసి రైతులకు టోపీ పెట్టారు. రైతులకు ట్రక్షీట్లు ఇవ్వకుండా మిల్లర్లకు ట్రక్షీట్లు ఇచ్చిన సిబ్బంది, క్వింటాకు నాలుగైదు కిలోల చొప్పున కోత పెట్టినట్లు అధికారుల ప్రాథమిక విచారణలో తేలింది.

రైతులను మోసం చేశారు ఇలా...

గుర్రంపోడు, నాంపల్లి, మర్రిగూడ మండలాల్లోని పీఏసీఎస్సెంటర్ల వడ్ల కొనుగోళ్లలో భారీ అవకతవకలు జరిగినట్లు అధికారుల విచారణలో తేలింది. వడ్లు నాణ్యంగా లేవని మిల్లర్లు దింపుకోట్లేదని రైతులను మోసం చేశారు. గుర్రంపోడు పీఏసీఎస్ పరిధిలోని పోచంపల్లి, చామలోనిబావి, కొప్పోలు సెంటర్లలో పీఏసీఎస్ సిబ్బంది, మిల్లర్లు కుమ్మకై ఆడిన డ్రామాలో రైతులు భారీగా నష్టపోయారు. రైతుల నుంచి కొన్న వడ్లకు రశీదులు ఇవ్వలేదు. అయితే మిల్లర్లకు మాత్రం రైతుల పేర్లతో ట్రక్ షీట్లు ఇచ్చారు. మిల్లులకు వడ్లు తరలించే క్రమంలో సిబ్బంది కొత్త డ్రామాకు తెరలేపారు. వడ్లు రంగు మారాయనే కారణాలతో మిల్లర్లు దిగుమతి చేసుకోవడం లేదని క్వింటాకు రెండు, మూడు కిలోల చొప్పున కోత పెట్టారు. సిబ్బంది నిర్వాహకంతో ఈ మూడు సెంటర్ల పరిధిలో వెయ్యి క్వింటాళ్ల వడ్లను రైతులు నష్టపోయారు. వీటి విలువ సుమారు రూ.18 లక్షల వరకు ఉండొచ్చని అధికారులు అంచనా వేశారు. పర్మిషన్ లేకుండానే పోచంపల్లి సెంటర్ పరిధిలో బోగస్ సబ్ సెంటర్ ఓపెన్ చేసి సుమారు 12 లారీల వడ్లు కొన్నట్లు గుర్తించారు.

నాంపల్లి మండల కేంద్రంలోని పీఏసీఎస్ సెంటర్లో, మర్రిగూడ పీఏసీఎస్ పరిధిలో శివన్నగూడెం, ఎర్రగండ్లపల్లి, మర్రిగూడ, చండూరు పీఏసీఎస్ సెంటర్లలో క్వింటాకు పది, పదిహేను కిలోల వడ్లను తరుగు పేరుతో కోత పెట్టారు. ఒక్కో సెంటర్లో రైతులు రూ.3‌‌‌‌నుంచి రూ.50 లక్ష ల వరకు నష్టపోయారని అధికారులు ప్రాథమికంగా గుర్తించారు. రెండు రోజుల క్రితం మర్రిగూడ సెంటర్ ఇన్చార్జి శివసాయికుమార్ను అధికారులు సస్పెండ్ చేశారు. మర్రిగూడ చైర్మన్, సెక్రటరీలకు మాత్రం షోకాజ్ నో టీసులు ఇచ్చి చేతులు దులుపుకున్నారు.

సెంటర్ ఇన్చార్జిలను అడ్డం పెట్టుకుని...

సొసైటీలో సీఈఓ, సిబ్బందితోపాటు, ప్రతి సెంటర్కు ప్రైవేట్గా ఒక ఇన్చార్జిని పెట్టారు. నెలకు రూ.10వేల జీతం ఇచ్చి కొనుగోళ్ల నిర్వహణ అప్పగించి పీఏసీఎస్ అధికారులుచేతులు దులుపు కున్నారు. అధికారుల నిర్లక్ష్యంతోనే ఇదంతా జరిగిందని చెపుతున్నారు. జిల్లా వ్యాప్తంగా ఏడు లక్షల మెట్రిక్ టన్నుల వడ్లు కొనుగోలు చేస్తే కేవలం ఈ మూడు మండలాల్లో మాత్రమే అక్రమాలు వెలుగులోకి వచ్చాయి. ఐకేపీ, పీఏపీఎస్ పరిధిలోని చాలా సెంటర్లలో తరుగు పేరుతో రైతులు నష్టపో యారు. కానీ రైతులకు ఏదోరకంగా నచ్చచెప్పుకోవడంతోనే తరుగు దోపిడీ గుట్టు బయటపడలేదు. యాసంగి చివరి దశలో 8 నుంచి 12 సార్లు అకాల వర్షాలు పడ్డాయి. తడిసిన వడ్లను కొనడం ఇష్టం లేని మిల్లర్లు దిగుమతి చేసుకోకుండా రకరకాల కొర్రీలు పెట్టారు. ఈ క్రమంలోనే సెంటర్ల నిర్వహకులు, మిల్లర్లు కలిసి హైడ్రామా నడిపించారు.

కానీ మిల్లర్ల పైన చర్యలు తీసుకునేందుకు అధికారికంగా ఎలాంటి రుజువులు లేకపోవడంతో పీఏసీఎస్ సిబ్బంది అడ్డంగా దొరికిపోయారు. రైతుల పేరు మీద ట్రక్షీట్లు ఇవ్వడంతో సిబ్బంది విచారణలో సులువుగా దొరికి పోయారు. ఇంకోవైపు అమ్మిన వడ్ల గురించి రైతులు పెద్దగా పట్టించుకోకపోవడం కూడా తరుగు దోపిడీకి దారితీసింది.