గ్రేటర్ వ్యాప్తంగా బతుకమ్మ వేడుకలు, దేవీ నవరాత్రుల ఉత్సవాలు కొనసాగుతున్నాయి. గాంధీ హాస్పిటల్లోని ఐసీటీసీ(ఇంటిగ్రేటెడ్ కౌన్సెలింగ్ టెస్టింగ్ సెంటర్---) విభాగంలో అమ్మవారికి పూజలు నిర్వహించారు. హెచ్వోడీ ప్రొఫెసర్ ఎస్. రాజేశ్వర్ రావు, ప్రొఫెసర్ నాగమణి, అసోసియేట్లు డాక్టర్ నవనీత, డాక్టర్ పూజ, అసిస్టెంట్ డాక్టర్ అర్చన, టెక్నికల్ ఆఫీసర్ శివన్న పాల్గొన్నారు. దసరా పండుగను సంబురంగా జరుపుకోవాలని బీజేపీ శేరిలింగంపల్లి సెగ్మెంట్ ఇన్చార్జి యోగానంద్ అన్నారు. దేవీ నవరాత్రుల్లో భాగంగా శేరిలింగంపల్లి, బతుకమ్మ కుంట, తారానగర్లో ఏర్పాటు చేసిన అమ్మవారి మండపాలను శనివారం ఆయన సందర్శించి ప్రత్యేక పూజలు చేశారు. అనంతరం అన్నదాన కార్యక్రమంలో పాల్గొన్నారు. ఆయన వెంట రంగారెడ్డి అర్బన్ జిల్లా ఉపాధ్యక్షుడు పోరెడ్డి బుచ్చిరెడ్డి, నాయకులు ఉన్నారు. గచ్చిబౌలిలోని ఓ కన్వెన్షన్ సెంటర్లో సైబరాబాద్ కమిషనరేట్ పరిధిలో పనిచేస్తున్న మహిళా పోలీసులు, సిబ్బంది బతుకమ్మ ఆడారు. సీపీ స్టీఫెన్ రవీంద్ర, అదికారులు, సిబ్బంది, వారి కుటుంబసభ్యులు పాల్గొన్నారు. అంబర్ పేటలోని సిటీ ఆర్మ్డ్ హెడ్ క్వార్టర్స్ లో రాచకొండ కమిషనరేట్కు చెందిన మహిళా పోలీసులు, సిబ్బంది బతుకమ్మ ఆడారు. మరోవైపు సిటీలో దసరా జోష్ పెరిగింది. దాండియా నైట్ ఈవెంట్లకు యువత ఆసక్తి చూపిస్తున్నారు. గర్బా డ్యాన్స్, దాండియా ఈవెంట్లలోనే యువత ఎక్కువగా కనిపిస్తున్నారు. సాయంత్రం 6 నుంచి అర్ధరాత్రి వరకు ఈ ప్రోగ్రామ్లు జరుగుతున్నాయి.
- వెలుగు, హైదరాబాద్/పద్మారావునగర్/గచ్చిబౌలి/నేరెడ్ మెట్/ఎల్బీనగర్/శంషాబాద్
