- ఈ నెల 11 వరకు తెలంగాణ హెరిటేజ్ వీక్
- ఉత్తర్వులు జారీ చేసిన నార్త్కరోలినా, జార్జియా, వర్జీనియా గవర్నర్లు
వాషింగ్టన్: మన బతుకమ్మ పండుగకు అమెరికాలోని మూడు రాష్ట్రాల్లో అధికారిక గుర్తింపు దక్కింది. బతుకమ్మ పండుగ నేపథ్యంలో ‘స్పెషల్ బతుకమ్మ ఫెస్టివల్ వీక్’, ‘తెలంగాణ హెరిటేజ్ వీక్’ని అక్కడి నార్త్ కరోలినా, జార్జియా, వర్జీనియా రాష్ట్రాలు ప్రకటించాయి. ఈ మేరకు ఆయా రాష్ట్రాల గవర్నర్లు అధికారికంగా ఉత్తర్వులు జారీ చేశారు. ఈ సందర్భంగా మన పూల పండుగ, మన సంస్కృతిని కొనియాడారు. విభిన్న భాషలు, సాంప్రదాయలకు నెలవుగా తెలంగాణ మారిందని ప్రశంసించారు. ఇండియన్ కల్చర్కు తెలంగాణ పూల పండుగ ప్రతిబింబంగా నిలిచిందని తెలిపారు. బతుకమ్మ వైభవాన్ని అందరికీ తెలియజేసేలా ఆడి పాడాలని సూచించారు. బతుకమ్మ అంటే ఒక ఫెస్టివల్ మాత్రమే కాదని.. ప్రకృతి, సమాజం, మహిళలు జరుపుకునే ఓ శక్తివంతమైన పూల పండుగ అని అభివర్ణించారు. సంస్కృతీ, సాంప్రదాయాలకు గుర్తింపు అని కొనియాడారు.
తమ ప్రభుత్వం తరఫున బతుకమ్మ పండుగకు అన్ని సహాయ సహకారాలు అందిస్తామని ప్రకటించారు. పూల పండుగలో భాగంగా జానపద పాటలు, సాంప్రదాయ నృత్యాలు ఎంతో బాగుంటాయని ప్రశంసించారు. ఈ నెల 3 నుంచి 11వ తేదీ దాకా ‘తెలంగాణ హెరిటేజ్ వీక్’గా ప్రకటిస్తున్నట్లు తెలిపారు. ఈ సందర్భంగా తెలంగాణ చరిత్ర, భాషను కీర్తించారు. కాగా, గతంలో కూడా కొన్ని అమెరికా సంయుక్త రాష్ట్రాలు బతుకమ్మకు అధికారిక గుర్తింపునిచ్చాయి.
