- మాల సంక్షేమ సంఘం అధ్యక్షుడు బత్తుల రాంప్రసాద్
- ఎంపిరికల్ డేటా ప్రకారం ప్రూవ్ చేయాలని సవాల్
ఖైరతాబాద్, వెలుగు: రాష్ట్ర ఏర్పాటు నుంచి ఇప్పటిదాకా సంక్షేమ పథకాల ద్వారా మాదిగల కంటే మాలలు ఎక్కువ లబ్ధి పొందినట్లు నిరూపిస్తే రూ.30 లక్షలు ఇస్తామని మాల సంక్షేమ సంఘం అధ్యక్షుడు బత్తుల రాంప్రసాద్, బుద్ధిస్ట్ సొసైటీ ఆఫ్ ఇండియా అధ్యక్షుడు దిగంబర్కాంబ్లే, సింగర్ రెంజర్ల రాజేశ్, రాజు వస్తాద్ ప్రకటించారు. మంగళవారం హైదరాబాద్లోని సోమాజిగూడ ప్రెస్క్లబ్లో వారు మీడియాతో మాట్లాడారు. ప్రభుత్వ సంస్థలు, ఎస్సీ కార్పొరేషన్, సాంస్కృతిక రథ సారథి, సోషల్ వెల్ఫేర్ రెసిడెన్షియల్స్కూళ్లు.. ఇలా అన్నింటిలో మాదిగల కంటే మాలలు లబ్ధి పొందినట్టు ఎంపిరికల్ డేటా ప్రకారం 15 రోజుల్లోగా నిరూనించినోళ్లకు తాము తలో రూపాయి వేసుకుని 30 లక్షలు బహుమతిగా ఇస్తామన్నారు.
ఇటీవల బీసీ సంఘాల ఆధ్వర్యంలో జరిగిన సదస్సులో తెలంగాణ విఠల్ మాలలను సామాజిక స్మగ్లర్లంటూ కామెంట్ చేయడాన్ని వారు ఖండించారు. విఠల్కు, పృథ్వీరాజ్కు మాల, మాదిగల పంచాయితీల్లో ఏంపని అని ప్రశ్నించారు. వర్గీకరణ సాధన కోసం మాదిగలు శక్తిమేర ఏమైనా చేసుకునే అవకాశం ఉందన్నారు. ఎస్సీ వర్గీకరణను మాలలు అడ్డుకుంటున్నారని, దాని వెనుక చెన్నూర్ ఎమ్మెల్యే వివేక్ వెంకటస్వామి ఉన్నారనడం అవగాహనా లోపమని అన్నారు. తమతో ఉన్నది, తమను నడిపిస్తున్నది రాజ్యాంగ నిర్మాత అంబేద్కరేనని అన్నారు.
మంద కృష్ణ మాదిగతోపాటు ఇంకొంతమంది రాష్ట్రంలో కాంగ్రెస్ను దించి, బీజేపీ పాలన తెచ్చేందుకు ప్రయత్నిస్తున్నారని ఆరోపించారు. మాల సంఘాల జేఏసీ నేతలు గోపోజు రమేశ్, దాసరి విశాల్, ఉమాకాంతరావు, మాల రవీందర్, చొక్కంపేట ఆంజనేయులు, దాసరి లక్ష్మయ్య తదితరులు పాల్గొన్నారు.
