మహబూబ్నగర్/చిన్నచింతకుంట, వెలుగు : దేవరకద్రకు మంజూరు చేసిన మహాత్మా జ్యోతిబా ఫూలే బీసీ వెల్ఫేర్ బాయ్స్ డిగ్రీ కాలేజ్ వేరే ప్రాంతానికి తరలిస్తున్నారనే ప్రచారం జరుగుతోంది. కాలేజీని ప్రారంభించి ఐదు నెలలు అవుతున్నా సొంత బిల్డింగ్ నిర్మించడం లేదు. మెయింటెనెన్స్కు కూడా ఫండ్స్ రిలీజ్ కాలేదు. వచ్చే అకడమిక్ ఇయర్నాటికి బిల్డింగ్ కంప్లీట్కాకుంటే కాలేజీని వేరే జిల్లాకు తరలిస్తామని హయ్యర్ ఎడ్యుకేషన్ డిపార్ట్మెంట్ ఆఫీసర్లుఅంటున్నట్లు సంబంధిత అధికారులే చెబుతున్నారు. ఇదిలాఉంటే కాలేజీని ప్రారంభించినా మెయింటెనెన్స్, బిల్డింగ్ కోసం ఫండ్స్ రిలీజ్ కాకపోవడంతో అసలు కాలేజీ ఉందా? లేదా? అనే అనుమానాలు వ్యక్తమవుతున్నాయి.
సొంత బిల్డింగ్ లేకుండానే..
మహబూబ్నగర్ జిల్లా దేవరకద్ర నియోజకవర్గంలో ప్రభుత్వ డిగ్రీ కాలేజీని ఏర్పాటు చేయాలని కొన్నేండ్లుగా ఎదురు చూస్తున్నారు. 2022–-23 విద్యా సంవత్సరంలో కాలేజీని ప్రభుత్వం మంజూరుచేసింది. 8 కోర్సులను అందుబాటులోకి తెచ్చి, ఒక్కో సబ్జెక్టులో 40 మంది స్టూడెంట్స్ చొప్పున 320 మందికి అడ్మిషన్లు ఇచ్చేలా కాలేజీకి అనుమతులు ఇచ్చింది. అయితే, సొంత బిల్డింగ్ లేకపోవడంతో మహాత్మా జ్యోతిబా ఫూలే బీసీ వెల్ఫేర్ బాయ్స్ రెసిడెన్షియల్ స్కూల్ బిల్డింగ్లోని కొన్ని రూమ్స్ కాలేజీకి కేటాయించారు. గత ఏడాది నవంబరు 30న మంత్రి శ్రీనివాస్గౌడ్, పాలమూరు ఎంపీ మన్నె శ్రీనివాస్రెడ్డి, ఎమ్మెల్యే ఆల వెంకటేశ్వర్రెడ్డి కాలేజీని ప్రారంభించారు. కాలేజీ ఓపెనింగ్కు ముందే సొంత బిల్డింగ్ ఉండాలి. ఐదు నెలలు అవుతున్నా ఇప్పటి వరకు సొంత బిల్డింగ్ నిర్మించలేదు. రెవెన్యూ ఆఫీసర్లు దేవరకద్ర మండలం నాగారం వద్ద సర్వే నంబర్ 177లో ఆరెకరాల భూమిని గుర్తించారు. కానీ, ఇప్పటి వరకు బిల్డింగ్ పనులు ప్రారంభించలేదు. వచ్చే జూన్ నాటికి బిల్డింగ్ కంప్లీట్ చేయకుంటే కాలేజీ వేరే జిల్లాకు షిఫ్ట్ అయ్యే అవకాశం ఉండడంతో స్టూడెంట్స్, పేరెంట్స్ ఆందోళన చెందుతున్నారు.
‘దోస్త్’ అడ్మిషన్లు అంతంతే..
కాలేజీ ఏర్పాటు ఆలస్యం కావడంతో ఈ అకడమిక్ ఇయర్లో దోస్త్ ద్వారా 56 మంది అప్లై చేసుకున్నారు. అందులో 26 మంది వేరే కాలేజీలకు వెళ్లిపోగా, మిగలిన 30 మంది కోసం లెక్చరర్లను ఏర్పాటు చేయలేక తుక్కుగూడ కాలేజీకి షిఫ్ట్ చేశారు. ఇక దేవరకద్రకు మంజూరు చేసిన మహాత్మా జ్యోతిబా ఫూలే బీసీ బాయ్స్ డిగ్రీ కాలేజీకి ఫండ్స్ తెచ్చేందుకు జిల్లా మంత్రులు, స్థానిక ఎమ్మెల్యే ఆల వెంకటేశ్వర్రెడ్డి ప్రయత్నం చేయడం లేదనే విమర్శలున్నాయి. కాలేజీ బిల్డింగ్, హాస్టల్, ఇతర సౌలతుల కోసం రూ.5 కోట్ల ఫండ్స్ అవసరం. ఈ ఫండ్స్ను తీసుకొచ్చేందుకు సీఎం కేసీఆర్తో జిల్లా నేతలు సంప్రదించడం లేదని అంటున్నారు.
డిగ్రీ చదువుకు దూరం..
ప్రభుత్వ కాలేజీలు లేకపోవడంతో దేవరకద్ర, చిన్నచింతకుంట, కౌకుంట్ల, అడ్డాకుల, మూసాపేట మండలాలకు చెందిన స్టూడెంట్లు పాలమూరుకు వచ్చి చదువుకుంటున్నారు. ఇబ్బందులు పడుతూ డిగ్రీ చదవలేక ఇంటర్ తోనేచదువులు ఆపేస్తున్నారు. ఈ కాలేజీ ఏర్పాటుతో దేవరకద్ర, చిన్నచింతకుంట, కౌకుంట్ల, హన్వాడ, కోయిల్కొండలోని కొన్ని గ్రామాలు, నారాయణపేట జిల్లా మరికల్ మండలానికి చెందిన స్టూడెంట్లకు ఇబ్బందులు దూరమవుతాయని భావించారు.
బిల్డింగ్ ఉంటేనే కాలేజీ..
జ్యోతిబా ఫూలే బీసీ బాయ్స్ డిగ్రీ కాలేజీలో 8 కోర్సులున్నాయి. ఈ అకడమిక్ ఇయర్లో దోస్త్ ద్వారా 30 అప్లికేషన్లు మాత్రమే వచ్చాయి. దీంతో వారిని మహేశ్వరం గేట్ వద్ద ఉన్న కాలేజీకి పంపించాం. వచ్చే అకడమిక్ ఇయర్ ప్రారంభం నాటికి కాలేజీకి బిల్డింగ్ కట్టించాల్సి ఉంది.
– అమరేశ్పటేల్, ఇన్చార్జి ప్రిన్సిపాల్, దేవరకద్ర
సర్వే చేశాం..
బాయ్స్ డిగ్రీ కాలేజీ బిల్డింగ్ కోసం ప్రభుత్వ స్థలం చూయించాలని చెప్పారు. నాగారం వద్ద సర్వే నంబర్ 177లో ఆరెకరాల భూమి గుర్తించాం. ఈ రిపోర్టును ఉన్నతాధికారులకు అందజేశాం.
– జ్యోతి, తహసీల్దార్, దేవరకద్ర
