భద్రాచలం, వెలుగు : ఛత్తీస్గఢ్ దండకారణ్యంలోకి చొచ్చుకుపోతున్న కేంద్ర భద్రతా బలగాలు తాజాగా శనివారం బీజాపూర్ జిల్లా భీకర అటవీ ప్రాంతంలోని కొండపల్లి గ్రామంలో కొత్త బేస్ క్యాంప్ను ఏర్పాటు చేశాయి. గత నాలుగు రోజులుగా ఈ ప్రాంతంలోకి ప్రవేశించిన సీఆర్పీఎఫ్ బలగాలు సమీప గ్రామాల్లో మావోయిస్టులు నిర్మించిన అమరవీరుల స్మారక స్థూపాలను కూల్చివేసిన సంగతి తెలిసిందే.
బేస్ క్యాంప్ను నిర్మించుకున్నాక బలగాలు అక్కడ అన్ని ఏర్పాట్లు, సౌలతులు కల్పించుకున్నాయి. గ్రామస్తులతో సమావేశమై గ్రామాభివృద్ధికి బలగాలు తోడ్పడతాయని వారిలో భరోసా నింపారు. 2026 నాటికి మావోయిస్టు పార్టీని నిర్మూలిస్తామన్న కేంద్ర హోంశాఖ, తన యాక్షన్ ప్లాన్ను అమలు చేస్తోంది. దీనిలో భాగంగానే మావోయిస్టుల ప్రాంతాలను స్వాధీనం చేసుకుంటోంది.
